കെ എല് രാഹുലിനും രവീന്ദ്ര ജഡേജയ്ക്കും പരിക്കേറ്റതിനെ തുടര്ന്ന് വെള്ളിയാഴ്ച (ഫെബ്രുവരി 2) ആരംഭിക്കുന്ന ഇംഗ്ലണ്ടിനെതിരായ രണ്ടാം ടെസ്റ്റിനുള്ള ടീമില് വന് മാറ്റം. മൂന്ന് വര്ഷത്തിന് ശേഷം വാഷിംഗ്ടണ് സുന്ദറിനെ ടെസ്റ്റ് ടീമിലേക്ക് തിരിച്ചുവിളിച്ചു, അതേസമയം അണ്ക്യാപ്ഡ് താരങ്ങളായ സര്ഫറാസ് ഖാനും സൗരഭ് കുമാറും ടീമിലേക്ക് വിളിക്കപ്പെട്ടു.
2014 ലെ അണ്ടര് 19 ലോകകപ്പ് മുതല് തലക്കെട്ടുകളില് ഇടം നേടിയ സര്ഫറാസ് അറിയപ്പെടുന്ന ഒരു പേരാണ്, കൂടാതെ 2018 ല് വിരാട് കോഹ്ലിക്കും എബി ഡിവില്ലിയേഴ്സിനും ഒപ്പം റോയല് ചലഞ്ചേഴ്സ് ബാംഗ്ലൂര് (ആര്സിബി) നിലനിര്ത്തുകയും ചെയ്തെങ്കിലും അദ്ദേഹം തെളിയിക്കപ്പെട്ട പ്രകടനം നടത്തിയിട്ടില്ല. സ്റ്റാര് ഓള്റൗണ്ടര് ജഡേജയുടെ പകരക്കാരനായി ടീം ഇന്ത്യ കൊണ്ടുവന്നിരിക്കുന്നത് ഉത്തര്പ്രദേശില് നിന്നുള്ള 30 കാരനായ സ്പിന്നര് സൗരഭ് കുമാറിനെയാണ്.
ശ്രീലങ്കയ്ക്കെതിരായ ഹോം പരമ്പരയിലും 2022 ല് ബംഗ്ലാദേശിനെതിരായ എവേ പരമ്പരയിലും സൗരഭ് ഇന്ത്യന് ടെസ്റ്റ് ടീമിന്റെ ഭാഗമായിരുന്നു. സൗരഭ് കുമാര്, ഒരു ഇടങ്കയ്യന് സ്പിന്നറാണ്. ആഭ്യന്തര സര്ക്കറ്റിലെ പരിചയസമ്പന്നനായ അദ്ദേഹം മികച്ച ബാറ്റ്സ്മാന് കൂടിയാണ്. തന്റെ കരിയറില്, സൗരഭ് മൊത്തം 68 ഫസ്റ്റ് ക്ലാസ് മത്സരങ്ങള് കളിച്ചിട്ടുണ്ട്, കൂടാതെ 24.41 ശരാശരിയില് 290 വിക്കറ്റുകളും നേടിയിട്ടുണ്ട്. ബാറ്റിംഗില് 27.11 ശരാശരിയില് 2061 റണ്സാണ് അദ്ദേഹത്തിന്റെ സമ്പാദ്യം.
സമീപകാലത്ത് സൗരഭ് ഇന്ത്യ ‘എ’യുടെ ഭാഗമാണ്. കഴിഞ്ഞയാഴ്ച, അഹമ്മദാബാദിലെ നരേന്ദ്ര മോദി സ്റ്റേഡിയത്തില് അഞ്ച് വിക്കറ്റ് നേട്ടത്തോടെ ഇംഗ്ലണ്ട് ലയണ്സിനെതിരെ ഒരു ഇന്നിംഗ്സിനും 16 റണ്സിനും വന് വിജയം നേടിയപ്പോള് നിര്ണ്ണായക പ്രകടനം നടത്തിയിരുന്നു. 2022 ഡിസംബറില്, സില്ഹറ്റില് ഇന്ത്യ ‘എ’യ്ക്കായി ബംഗ്ലാദേശ് ‘എ’യ്ക്കെതിരെ 6-74 എന്ന അതിശയിപ്പിക്കുന്ന സ്പെല് കണ്ടെത്തിയിരുന്നു.
2015/16ല് ഉത്തര്പ്രദേശിലേക്ക് മാറുന്നതിന് മുമ്പ് 2014/15 സീസണില് സര്വ്വീസസിനായി ഫസ്റ്റ് ക്ലാസ് അരങ്ങേറ്റം കുറിച്ച സൗരഭ് അതിനുശേഷം സ്വന്തം ടീമിനൊപ്പം വന്നു. സൗരഭിനെ 2017ല് റൈസിംഗ് പൂനെ സൂപ്പര്ജയന്റ്സ് വാങ്ങി. ലേലത്തില് 10 ലക്ഷം രൂപയായിരുന്നു തുക. 2021-ല് പഞ്ചാബ് കിംഗ്സ് അദ്ദേഹത്തെ 20 ലക്ഷത്തിന് വാങ്ങിയെങ്കിലും രണ്ട് ടീമുകള്ക്കും വേണ്ടി പ്ലെയിംഗ് ഇലവനില് ഇടം നേടാനായില്ല. അതുകൊണ്ടു തന്നെ ഇതുവരെ ഐപിഎല്ലില് അരങ്ങേറ്റം കുറിക്കാനായിട്ടില്ല.