‘ലാൻഡ് കരാ ദേ ഭായ്’ എന്ന വൈറൽ പാരാഗ്ലൈഡിംഗ് വീഡിയോയിലൂടെ ഇന്റർനെറ്റിൽ തരംഗമായി മാറിയ വിപിൻ സാഹു, ആ വീഡിയോയുടെ മീം അവകാശം (meme rights) വിറ്റതിലൂടെ 22 ലക്ഷം രൂപയും യൂട്യൂബിലൂടെ ഏകദേശം 20 ലക്ഷം രൂപയും സമ്പാദിച്ചതായി വെളിപ്പെടുത്തി.
കണ്ടന്റ് ക്രിയേറ്ററായ നിഷു തിവാരിയുമായുള്ള അഭിമുഖത്തിലാണ് വൈറൽ താരമായതിന് ശേഷമുള്ള തന്റെ യാത്രയെക്കുറിച്ച് സാഹു മനസ്സ് തുറന്നത്. യൂട്യൂബ് വരുമാനത്തിലൂടെയും മീം അവകാശം വിറ്റതിലൂടെയും ആ വീഡിയോയിൽ നിന്ന് ഏകദേശം 42 ലക്ഷം രൂപയോളം ലഭിച്ചതായാണ് അദ്ദേഹം പറയുന്നത്.
2019-ൽ ഹിമാചൽ പ്രദേശിൽ പാരാഗ്ലൈഡിംഗ് നടത്തുന്നതിനിടെ പകർത്തിയ വീഡിയോ സോഷ്യൽ മീഡിയയിൽ വൈറലായതോടെയാണ് വിപിൻ സാഹു പ്രശസ്തനായത്. ഭയന്നുവിറച്ച് പാരാഗ്ലൈഡർ താഴെ ഇറക്കാൻ ഇൻസ്ട്രക്ടറോട് ആവർത്തിച്ച് അപേക്ഷിക്കുന്നതും, ഇതിനിടയിൽ അദ്ദേഹം പറഞ്ഞ ‘ലാൻഡ് കരാ ദേ ഭായ്’ എന്ന വാക്കുകളും പിന്നീട് വലിയ രീതിയിൽ മീമുകളായി മാറുകയായിരുന്നു.
ഇന്റർനെറ്റിലൂടെ പ്രശസ്തനാകുന്നതിന് മുൻപ് തന്നെ താൻ നിരവധി ബിസിനസ്സുകൾ നടത്തിയിരുന്നുവെന്ന് അഭിമുഖത്തിൽ സാഹു വ്യക്തമാക്കി. തനിക്ക് നിരവധി ജിമ്മുകളും ടൈൽ ഷോറൂമുകളും സ്വന്തമായുണ്ടെന്നും, ഇന്ത്യ, ദുബായ്, നിലവിൽ താമസിക്കുന്ന ജോർജിയ എന്നിവിടങ്ങളിൽ ബിസിനസ്സ് താല്പര്യങ്ങളുണ്ടെന്നും അദ്ദേഹം പറഞ്ഞു. വൈറൽ വീഡിയോയിലൂടെ ലഭിച്ച പ്രതിച്ഛായ മാറ്റിയെടുക്കാനും, ഒരു എൻ.ജി.ഒ (NGO) വഴി താൻ നടത്തുന്ന ജീവകാരുണ്യ പ്രവർത്തനങ്ങൾ ആളുകളിലേക്ക് എത്തിക്കാനുമാണ് എം.ടി.വി റോഡീസിൽ (MTV Roadies) പങ്കെടുത്തതെന്നും അദ്ദേഹം വെളിപ്പെടുത്തി.
വൈറൽ പ്രശസ്തിക്ക് സാധാരണയായി ഏതാനും മാസങ്ങളുടെ ആയുസ്സ് മാത്രമേ ഉണ്ടാകൂ എന്നും, അതിനാൽ ഇന്റർനെറ്റ് പ്രശസ്തിയെ മാത്രം ആശ്രയിക്കാതെ സ്വന്തം ജോലിയിൽ ശ്രദ്ധ കേന്ദ്രീകരിക്കണമെന്നും അദ്ദേഹം പുതിയ കണ്ടന്റ് ക്രിയേറ്റർമാരോട് ഉപദേശിച്ചു.
