വർഷം 2026 ആയിട്ടും ‘ക്ഷുദ്രപ്രയോഗം’ അഥവാ അന്ധവിശ്വാസങ്ങളുടെ പേരിൽ ഇന്ത്യയിൽ കൊലപാതകങ്ങൾ തുടരുകയാണ്. ഉത്തർപ്രദേശിൽ 30 വയസ്സുള്ള യുവാവ് സമാനമായ സംശയത്തിന്റെ പേരിൽ കൊല്ലപ്പെട്ട് ദിവസങ്ങൾ തികയും മുമ്പാണ് ജാർഖണ്ഡിൽ നിന്നും മറ്റൊരു ദാരുണ സംഭവം പുറത്തുവരുന്നത്.
ജാർഖണ്ഡിലെ വെസ്റ്റ് സിംഗ്ഭൂം ജില്ലയിൽ ആഭിചാരം നടത്തുന്നതായി സംശയിച്ച് 46 കാരിയായ സ്ത്രീയെ അടിച്ചു കൊലപ്പെടുത്തി. സംഭവവുമായി ബന്ധപ്പെട്ട് ‘ഓജ’ എന്നറിയപ്പെടുന്ന നാട്ടുവൈദ്യൻ ഉൾപ്പെടെ നാല് പേരെ ഒക്ടോബർ 25 ഞായറാഴ്ച പോലീസ് അറസ്റ്റ് ചെയ്തു. ഒക്ടോബർ 24 ശനിയാഴ്ച രാവിലെ കരൈക്കേല പോലീസ് സ്റ്റേഷൻ പരിധിയിലെ കോൾജോംറോ ഗ്രാമത്തിൽ നിന്നാണ് രക്തത്തിൽ കുളിച്ച നിലയിൽ രെന്ദായ് സുംഭുരുയി എന്ന സ്ത്രീയുടെ മൃതദേഹം കണ്ടെത്തിയത്. ഒക്ടോബർ 23 വെള്ളി രാത്രി വീട്ടിൽ ഉറങ്ങുകയായിരുന്ന സ്ത്രീയെ പ്രതികൾ അതിക്രമിച്ചു കയറി മർദ്ദിച്ച ശേഷം ശ്വാസം മുട്ടിച്ച് കൊലപ്പെടുത്തുകയായിരുന്നു. കൊല്ലപ്പെട്ട സ്ത്രീയുടെ ഭർത്താവിന്റെ പരാതിയിൽ ബി.എൻ.എസ്, അന്ധവിശ്വാസ നിരോധന നിയമങ്ങൾ പ്രകാരം കേസ്സെടുത്ത പോലീസ് ബുധു ഹോൻഹാഗ, മാർട്ടിൻ ദിഗ്ഗി, മാർത്തൂസ് ഹോൻഹാഗ, മധുസൂദനൻ ഹോൻഹാഗ എന്നിവരെ അറസ്റ്റ് ചെയ്തു.
ഇതിന് ഏതാനും ദിവസങ്ങൾക്ക് മുമ്പ്, ഒക്ടോബർ 22-ന് ഉത്തർപ്രദേശിലെ കാൺപൂർ ദെഹാത് ജില്ലയിലും സമാനമായ രീതിയിൽ 30 വയസ്സുള്ള രാംഗണേഷ് എന്ന യുവാവ് അയൽക്കാരാൽ കൊല്ലപ്പെട്ടിരുന്നു. അയൽക്കാരുടെ രോഗിയായ മകൾക്ക് നേരെ രാംഗണേഷിന്റെ പിതാവ് ആഭിചാരക്രിയകൾ നടത്തിയെന്ന സംശയത്തെത്തുടർന്നായിരുന്നു ആക്രമണം. ഗലൗലി ഗ്രാമത്തിലെ വീടിന് പുറത്തുവെച്ച് യുവാവിനെ മൂന്നംഗ സംഘം മർദ്ദിക്കുകയും തുടർന്ന് കുത്തിക്കൊലപ്പെടുത്തുകയുമായിരുന്നു.
