സോഷ്യൽ മീഡിയയിൽ തരംഗമായി മാറിയിരിക്കുന്ന അരിവെള്ളം ചർമ്മസംരക്ഷണത്തിനും മുടി വളർച്ചയ്ക്കും ഉത്തമമാണെന്ന അവകാശവാദങ്ങൾക്ക് പിന്നിലെ സത്യമെന്തെന്ന് പരിശോധിക്കുകയാണ് വിദഗ്ധർ. ബാംഗ്ലൂർ ഡോ. സ്വേതാസ് സ്കിൻ സൂത്ര ക്ലിനിക്കിലെ മെഡിക്കൽ ഡയറക്ടറായ ഡോ. സ്വേത ശ്രീധർ ഇതുമായി ബന്ധപ്പെട്ട യാഥാർത്ഥ്യങ്ങൾ വ്യക്തമാക്കുന്നു.
മുടി നീളത്തിലും കട്ടിയിലും വളരാൻ അരിവെള്ളം സഹായിക്കുമെന്നാണ് സോഷ്യൽ മീഡിയ ഇൻഫ്ലുവൻസർമാർ പ്രധാനമായും അവകാശപ്പെടുന്നത്. അരിവെള്ളത്തിൽ ധാന്യപ്പൊടിയും (starch), അമിനോ ആസിഡുകളും, വിറ്റാമിനുകളും ധാതുക്കളും അടങ്ങിയിട്ടുണ്ടെങ്കിലും ഇത് മുടി നീളത്തിലും കട്ടിയിലും വളരാൻ സഹായിക്കുമെന്നതിന് ശക്തമായ ശാസ്ത്രീയ തെളിവുകളില്ലെന്ന് ഡോ. ശ്രീധർ പറയുന്നു. മുടിയുടെ പുറംഭാഗത്തെ സംരക്ഷിക്കാൻ സഹായിക്കുന്ന ‘ഇനോസിറ്റോൾ’ ഇതിൽ അടങ്ങിയിട്ടുണ്ടെങ്കിലും, തലയോട്ടിയിൽ പുരട്ടുമ്പോൾ മുടി വളർച്ച വർദ്ധിക്കുമെന്നോ മുടി കൊഴിച്ചിൽ തടയുമെന്നോ ഉള്ളതിന് ക്ലിനിക്കൽ തെളിവുകൾ ലഭ്യമല്ല.
അരിവെള്ളത്തിലെ അന്നജത്തിന്റെ അംശം മുടിക്ക് താൽക്കാലികമായി മിനുക്കവും പൂർണ്ണതയും നൽകിയേക്കാം. എന്നാൽ ഇത് മുടിയുടെ വളർച്ചാ നിരക്കിനെയോ ഫോളിക്കുകളുടെ എണ്ണത്തെയോ ബാധിക്കില്ല. ജനിതക ഘടന, ഹോർമോൺ വ്യതിയാനങ്ങൾ, പോഷകാഹാരം, തലയോട്ടിയുടെ ആരോഗ്യം എന്നിവയാണ് മുടിയുടെ വളർച്ചയെ സ്വാധീനിക്കുന്ന പ്രധാന ഘടകങ്ങൾ.
അരിവെള്ളം അമിതമായി ഉപയോഗിച്ചാൽ പാർശ്വഫലങ്ങളും ഉണ്ടാകാം. അന്നജവും പ്രോട്ടീനും മുടിയിൽ അടിഞ്ഞുകൂടി മുടി വരണ്ടതാകാനും കട്ടി കൂടാനും ഇടയാക്കും. പ്രത്യേകിച്ച് സെൻസിറ്റീവ് ആയ തലയോട്ടിയുള്ളവർക്ക് ഇത് അസ്വസ്ഥത ഉണ്ടാക്കാം. അമിതമായി മുടി കൊഴിയുന്നവർ വീട്ടു വൈദ്യങ്ങളെ ആശ്രയിക്കുന്നതിന് പകരം ഇരുമ്പിന്റെ കുറവ്, തൈറോയ്ഡ് പ്രശ്നങ്ങൾ തുടങ്ങിയ അടിസ്ഥാന കാരണങ്ങൾ കണ്ടെത്തി ഡർമറ്റോളജിസ്റ്റിന്റെ സഹായത്തോടെ ചികിത്സ തേടുകയാണ് വേണ്ടത്.
