” പുതച്ചുമൂടി കിടന്ന് വിയർക്കുക” – പനി പിടിക്കുമ്പോൾ ആളുകൾ സാധാരണയായി നൽകുന്ന പ്രധാ‍ന ഉപദേശങ്ങളിൽ ഒന്നാണിത്. വിയർക്കുന്നതിലൂടെ ശരീരത്തിലെ അണുബാധ പെട്ടെന്ന് വിട്ടുമാറുമെന്നാണ് കരുതപ്പെടുന്നത്. എന്നാൽ വിയർക്കാൻ വേണ്ടി നിർബന്ധിതമായി ശ്രമിക്കുന്നത് അണുബാധ തടയാൻ സഹായിക്കില്ലെന്നാണ് ന്യൂഡൽഹി പി.എസ്.ആർ.ഐ ഹോസ്പിറ്റലിലെ സീനിയർ കൺസൾട്ടന്റായ ഡോ. നീതു ജെയിൻ വ്യക്തമാക്കുന്നത്.
പനിയുള്ളപ്പോൾ പ്രതിരോധസംവിധാനത്തിന്റെ ഭാഗമായി ശരീരതാപനില ഉയർന്ന അവസ്ഥയിലായിരിക്കും. ഈ സമയത്ത് കൂടുതൽ വസ്ത്രങ്ങൾ ധരിക്കുന്നതോ, കനത്ത കംബളികൾ പുതച്ചുമൂടുന്നതോ, ചൂടുള്ള അന്തരീക്ഷത്തിൽ ഇരിക്കുന്നതോ അണുബാധയെ നശിപ്പിക്കാനോ പനി പെട്ടെന്ന് കുറയ്ക്കാനോ സഹായിക്കില്ല.
ഇത്തരത്തിൽ വിയർക്കാൻ ശ്രമിക്കുന്നത് ശരീരത്തിന് കൂടുതൽ ദോഷം ചെയ്യും. പനി തന്നെ ശരീരത്തിൽ നിന്ന് ദ്രാവകങ്ങൾ നഷ്ടപ്പെടാൻ കാരണമാകുന്നുണ്ട്. ഇതിനുപുറമേ നിർബന്ധിതമായി വിയർപ്പിക്കാൻ ശ്രമിച്ചാൽ നിർജ്ജലീകരണത്തിനുള്ള (Dehydration) സാധ്യത വർദ്ധിക്കും. ഇത് ക്ഷീണം, തലകറക്കം, മറ്റ് അസ്വസ്ഥതകൾ എന്നിവയിലേക്ക് നയിക്കും. അതിരൂക്ഷമായ സാഹചര്യങ്ങളിൽ ശരീരതാപനില വീണ്ടും ഉയരാനും ഇത് കാരണമാകും. അതിനാൽ പനി വിട്ടുമാറാൻ വിയർക്കൽ ഒരു ചികിത്സയല്ല.
അതേസമയം, പനി കുറഞ്ഞുതുടങ്ങുമ്പോൾ ശരീരം സ്വാഭാവികമായി വിയർക്കുന്നത് കാണാം. ശരീരം താപനില സാധാരണ നിലയിലേക്ക് കൊണ്ടുവരുന്നതിന് താപം പുറത്തുവിടുന്ന സ്വാഭാവിക പ്രക്രിയയാണിത്. അല്ലാതെ അണുബാധ വിയർപ്പിലൂടെ പുറത്തുപോകുന്നതല്ല. അതിനാൽ വിയർപ്പ് പനി കുറയുന്നതിന്റെ ലക്ഷണമാകാം, എന്നാൽ സ്വയം വിയർക്കാൻ ശ്രമിച്ചാൽ പനി പെട്ടെന്ന് കുറയില്ല.
പനി വരുമ്പോൾ അനാവശ്യമായി താപനില കൂട്ടാൻ ശ്രമിക്കാതെ ലളിതമായ മാർഗ്ഗങ്ങൾ സ്വീകരിക്കുക. ആവശ്യത്തിന് വിശ്രമിക്കുക, ധാരാളം വെള്ളമോ ദ്രാവകങ്ങളോ കുടിക്കുക, അയഞ്ഞതും സുഖപ്രദവുമായ വസ്ത്രങ്ങൾ ധരിക്കുക. മുറിയിലെ താപനില സുഖകരമായി നിലനിർത്തുക. അസ്വസ്ഥത കൂടുതലാണെങ്കിൽ ഡോക്ടറുടെ നിർദ്ദേശപ്രകാരം കൃത്യമായ അളവിൽ പാരസെറ്റാമോൾ ഉപയോഗിക്കാം.
പനി എന്നത് ഒരു രോഗമല്ല, മറിച്ച് രോഗലക്ഷണം മാത്രമാണ്. അതിന്റെ യഥാർത്ഥ കാരണം കണ്ടെത്തി ചികിത്സിക്കുകയാണ് പ്രധാനം. പനി വളരെ കൂടുതലാണെങ്കിലോ, ദിവസങ്ങളോളം നീണ്ടുനിൽക്കുകയോ, കൂടുതൽ വഷളാവുകയോ ചെയ്താൽ വീട്ടുവൈദ്യങ്ങളെ മാത്രം ആശ്രയിക്കരുത്. ശ്വാസതടസ്സം, കടുത്ത ക്ഷീണം, അമിതമായ ഛർദ്ദി, ശക്തമായ തലവേദന എന്നിവയുണ്ടെങ്കിൽ ഉടൻ തന്നെ വൈദ്യസഹായം തേടേണ്ടതുണ്ട്.
അതുകൊണ്ട് ഇനിയൊരാൾ കംബളി പുതച്ച് വിയർക്കാൻ ഉപദേശിച്ചാൽ അത് ഒഴിവാക്കുക. അനാവശ്യമായി വിയർക്കാൻ ശ്രമിക്കാതെ ശരീരത്തിന് ആവശ്യമായ വിശ്രമവും വെള്ളവും നൽകി താപനില സ്വയം ക്രമീകരിക്കാൻ അനുവദിക്കുക.
