ഉപയോഗശൂന്യമായ ഒരു പ്ലാസ്റ്റിക് കുപ്പി നിങ്ങളുടെ അടുത്ത ലഘുഭക്ഷണത്തിന്റെ ഭാഗമായാൽ എങ്ങനെയിരിക്കും? സതേൺ ഇല്ലിനോയിസ് സർവകലാശാലയിലെ ശാസ്ത്രജ്ഞർ പ്ലാസ്റ്റിക്കും കാർഷിക അവശിഷ്ടങ്ങളും ഉപയോഗിച്ച് പ്രോട്ടീൻ സമ്പുഷ്ടമായ കുക്കികൾ നിർമ്മിക്കാനുള്ള സാങ്കേതികവിദ്യ വികസിപ്പിച്ചെടുത്തിരിക്കുകയാണ്.
‘മൈക്രോബൈറ്റ്‌സ്’ (µBites) എന്ന് പേരിട്ടിരിക്കുന്ന ഈ വിചിത്രമായ ഭക്ഷണം, ഭാവിയിലെ ബഹിരാകാശ ദൗത്യങ്ങളിൽ ബഹിരാകാശയാത്രികർക്ക് ഭക്ഷണം ലഭ്യമാക്കുന്നതിനായി നാസ നടപ്പിലാക്കുന്ന പദ്ധതിയുടെ ഭാഗമായാണ് തയ്യാറാക്കുന്നത്. പ്രകൃതിദുരന്തങ്ങൾ നടക്കുന്ന സ്ഥലങ്ങളിലും കടുത്ത ഭക്ഷ്യക്ഷാമമുള്ള പ്രദേശങ്ങളിലും ഈ സാങ്കേതികവിദ്യ പ്രയോജനപ്പെടുത്താമെന്ന് ഗവേഷകർ പറയുന്നു.
കുടിവെള്ള കുപ്പികൾ നിർമ്മിക്കാൻ ഉപയോഗിക്കുന്ന ‘പെറ്റ്’ (PET) ഇനത്തിൽപ്പെട്ട പ്ലാസ്റ്റിക്കാണ് ഇതിനായി ഉപയോഗിക്കുന്നത്. പ്ലാസ്റ്റിക് കുപ്പികളും ചോളത്തിന്റെ തണ്ടുകളും ഇലകളും ഉയർന്ന താപനിലയിലും സമ്മർദ്ദത്തിലും വെള്ളവും ഓക്സിജനും ഉപയോഗിച്ച് പ്രക്രിയ ചെയ്ത് ചെറിയ തന്മാത്രകളാക്കി മാറ്റുന്നു. തുടർന്ന് ഈ രാസഘടകങ്ങളെ പ്രത്യേകമായി പ്രോഗ്രാം ചെയ്ത ഈസ്റ്റ് (yeast) ഉപയോഗിച്ച് പ്രോട്ടീനുകൾ, കൊഴുപ്പുകൾ, വിറ്റാമിനുകൾ, സുഗന്ധ ഘടകങ്ങൾ എന്നിവയാക്കി മാറ്റുകയാണ് ചെയ്യുന്നത്. ഈ മിശ്രിതത്തിലേക്ക് ഫൈബറും മധുരവും ചേർത്ത് 3D പ്രിന്റർ ഉപയോഗിച്ചാണ് കുക്കികളുടെ രൂപത്തിലാക്കുന്നത്.
പ്ലാസ്റ്റിക് മലിനീകരണവും ഭക്ഷ്യക്ഷാമവും ഒരേസമയം പരിഹരിക്കുക എന്ന ലക്ഷ്യത്തോടെയാണ് ഈ ഗവേഷണം നടത്തിയത്. മനുഷ്യൻ സൃഷ്ടിച്ച പ്രശ്നങ്ങൾ പരിഹരിക്കാൻ സൂക്ഷ്മാണുക്കളുടെ കഴിവുകളെ പ്രയോജനപ്പെടുത്തുകയാണ് ഇവിടെ ശാസ്ത്രജ്ഞർ ചെയ്യുന്നത്.
ഈ കുക്കികൾ കഴിക്കുന്നത് സുരക്ഷിതമാണെന്ന് പ്രാഥമിക പഠനങ്ങൾ വ്യക്തമാക്കുന്നുണ്ടെങ്കിലും മനുഷ്യരിൽ പരീക്ഷിച്ചു നോക്കുന്നതിനുള്ള അനുമതിക്കായി ഗവേഷകർ കാത്തിരിക്കുകയാണ്. ഇവിടെ ആരും നേരിട്ട് പ്ലാസ്റ്റിക് കഴിക്കുന്നില്ല എന്നതാണ് പ്രധാനം. പ്ലാസ്റ്റിക് പൂർണ്ണമായി രാസമാറ്റത്തിന് വിധേയമാവുകയും, അതിലെ കാർബൺ ഉപയോഗിച്ച് സൂക്ഷ്മാണുക്കൾ പുതിയ ജീവൽഘടകങ്ങൾ ഉത്പാദിപ്പിക്കുകയുമാണ് ചെയ്യുന്നത്.
നീണ്ട ബഹിരാകാശ യാത്രകളിൽ ബഹിരാകാശയാത്രികർക്ക് ധാരാളം ഭക്ഷണം കൊണ്ടുപോകുന്നത് പ്രായോഗികമല്ല. അതുകൊണ്ട് തന്നെ അവിടെയുള്ള മാലിന്യങ്ങളെ ഭക്ഷണമാക്കി മാറ്റാൻ കഴിയുന്ന ഈ സാങ്കേതികവിദ്യ നാസയ്ക്ക് ഏറെ ഉപകാരപ്പെടും. ബഹിരാകാശത്ത് മാത്രമല്ല, മുങ്ങിപ്പൊങ്ങുന്ന അന്തർവാഹിനികളിലും ദുരന്ത നിവാരണ മേഖലകളിലും ഈ സാങ്കേതികവിദ്യ ഭാവിയിൽ ഏറെ പ്രയോജനം ചെയ്യും.
