ചൈനയിലെ പ്രശസ്തമായ ഒരു വിനോദസഞ്ചാര കേന്ദ്രത്തിൽ, ചെറിയ കുട്ടിയെയും കൈയ്യിലെടുത്ത് ഒരു സ്ത്രീ ജീവനുള്ള കൂറ്റൻ ആമയുടെ പുറത്തു കയറി നിൽക്കുന്നതിന്റെ ദൃശ്യങ്ങൾ പുറത്തുവന്നതോടെ വലിയ ജനരോഷമാണ് ഉയരുന്നത്.
ഗ്വാങ്‌ഡോംഗ് പ്രവിശ്യയിലെ ഫോഷാനിലുള്ള ചാങ്‌ലു ടൂറിസം ആൻഡ് ലെഷർ പാർക്കിലെ ആമകളുടെ അനുഭവ മേഖലയിലാണ് ഈ സംഭവം നടന്നത്. വീഡിയോയിൽ ഒരു സ്ത്രീ തന്റെ കൊച്ചുമകളെയും എടുത്തുകൊണ്ട് ആഫ്രിക്കൻ സ്പർഡ് ഇനത്തിൽപ്പെട്ട ആമയുടെ പുറത്തു കയറി നിൽക്കുന്നത് കാണാം. ഭാരം താങ്ങാനാവാതെ ആമ മുന്നോട്ട് നീങ്ങാൻ പ്രയാസപ്പെടുന്നതും ദൃശ്യങ്ങളിലുണ്ട്. ഇത് കണ്ട് സന്തോഷിച്ച സ്ത്രീ, അടുത്തുള്ള മറ്റൊരു ആൺകുട്ടിയോട് കൂടി ആമയുടെ പുറത്തേക്ക് കയറാൻ ആംഗ്യം കാണിക്കുകയും ചെയ്തു. മറ്റ് ചില കുട്ടികളും ആമയുടെ മുകളിൽ ചവിട്ടിയെങ്കിലും, ഈ സ്ത്രീയുടെ പ്രവൃത്തി വളരെ മോശമായിരുന്നുവെന്ന് ഇത് വീഡിയോയിൽ പകർത്തിയ ആൾ പറഞ്ഞു.
ആമകളുടെ പുറത്തു കയറുകയോ ചവിട്ടുകയോ ചെയ്യരുതെന്ന് വ്യക്തമായി എഴുതിയ മുന്നറിയിപ്പ് ബോർഡ് അവിടെയുണ്ടായിരുന്നു. എന്നാൽ ഇത്രയും സംഭവിച്ചിട്ടും അത് തടയാൻ പാർക്കിലെ ജീവനക്കാർ ആരും മുന്നോട്ടുവന്നില്ല എന്നത് സോഷ്യൽ മീഡിയയിൽ വലിയ വിമർശനത്തിന് വഴിവെച്ചു.
സംഭവം വിവാദമായതോടെ പാർക്ക് അധികൃതർ മൃഗഡോക്ടറെ വരുത്തി ആമയെ പരിശോധനയ്ക്ക് വിധേയമാക്കി. ഭാഗ്യവശാൽ ആമയുടെ ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു. സംഭവത്തിൽ സുരക്ഷാ വീഴ്ച പറ്റിയിട്ടുണ്ടോ എന്ന് അന്വേഷിക്കുമെന്നും പാർക്ക് വ്യക്തമാക്കി.
ആമയുടെ പുറത്തു കയറുന്നത് അത് ഉണ്ടാക്കുന്ന അസ്വസ്ഥതകൾക്ക് അപ്പുറം അതീവ അപകടകരമാണെന്ന് അധികൃതർ വ്യക്തമാക്കുന്നു. ആമയുടെ തോട് എന്നത് കേവലം ഒരു പുറംചട്ട മാത്രമല്ല, മറിച്ച് അത് അതിന്റെ നട്ടെല്ലും വാരിയെല്ലുകളുമായി ബന്ധപ്പെട്ടിരിക്കുന്ന ശരീരഭാഗമാണ്. ഇതിൽ രക്തക്കുഴലുകളും നാഡികളും അടങ്ങിയിരിക്കുന്നു. അതുകൊണ്ട് തന്നെ മനുഷ്യരുടെ ഭാരം അതിലേക്ക് വരുമ്പോൾ തോടിൽ വിള്ളലുണ്ടാകാനും, നട്ടെല്ലിന് തകരാറ് സംഭവിക്കാനും ആന്തരികാവയവങ്ങൾക്ക് ഗുരുതരമായ പരിക്കേൽക്കാനും സാധ്യതയുണ്ട്.
