75-കാരിയായ തന്റെ മുത്തശ്ശി തികച്ചും സ്വതന്ത്രവും സജീവവുമായ ജീവിതം നയിക്കുന്നതിന്റെ ഹൃദ്യമായ ഒരു വീഡിയോ ഡോ. സിമ്രാൻ മുനോത് അടുത്തിടെ പങ്കുവെക്കുകയുണ്ടായി. വീഡിയോയിൽ, റിവോൾവ്ഡ് ഹെഡ്-ടു-നീ പോസ്, എലിവേറ്റഡ് ലോട്ടസ് പോസ്, ബൈസെപ് കേൾസ്, സീറ്റഡ് ഫോർവേഡ് ബെൻഡ് തുടങ്ങിയ പ്രയാസമേറിയ യോഗാസനങ്ങൾ ഈ മുത്തശ്ശി വളരെ എളുപ്പത്തിൽ ചെയ്യുന്നത് കാണാം.
തന്റെ ഈ ജീവിതരീതിയിലേക്ക് നയിച്ച കാരണങ്ങളെക്കുറിച്ചും ദിനചര്യകളെക്കുറിച്ചും വീഡിയോയോടൊപ്പമുള്ള കുറിപ്പിൽ അവർ വ്യക്തമാക്കുന്നുണ്ട്. “എനിക്ക് ഇപ്പോൾ 75 വയസ്സുണ്ട്, ഞാൻ ഒറ്റയ്ക്കാണ് താമസിക്കുന്നത്. വീട്ടുജോലികളെല്ലാം സ്വന്തമായാണ് ചെയ്യുന്നത്. വർഷങ്ങളായി എന്റെ ഭാരം 50 കിലോയിൽ തന്നെ മാറ്റമില്ലാതെ തുടരുന്നു. ഇതെങ്ങനെ സാധിക്കുന്നു എന്ന് ആളുകൾ എന്നോട് ചോദിക്കാറുണ്ട്. സത്യത്തിൽ, ഫിറ്റ്നസിനെക്കുറിച്ച് ചിന്തിക്കാൻ എനിക്ക് എപ്പോഴും സമയം ലഭിച്ചിരുന്നില്ല. 15-ാം വയസ്സിലായിരുന്നു എന്റെ വിവാഹം. 15 പേരുള്ള ഒരു കൂട്ടു കുടുംബത്തിലേക്കാണ് ഞാൻ കടന്നുചെന്നത്. പുലർച്ചെ 5 മണിക്ക് പ്രാർത്ഥനയോടെ ആരംഭിക്കുന്ന ദിവസം 6 മണിയാകുമ്പോഴേക്കും തിരക്കുകളിലേക്ക് വഴിമാറും,” അവർ കുറിച്ചു.
ഭക്ഷണം പാകം ചെയ്യുക, തുണികൾ കൈകൊണ്ട് കഴുകുക, കുട്ടികളെ വളർത്തുക, ദിവസവും വീട്ടിലെത്തുന്ന അതിഥികളെ പരിചരിക്കുക എന്നിവയൊക്കെയായിരുന്നു അന്നത്തെ ജോലികൾ. മറ്റുള്ളവരെ നോക്കുന്നതിനിടയിൽ സ്വന്തം കാര്യം ശ്രദ്ധിക്കാൻ താൻ മറന്നുപോയെന്നും അവർ പറയുന്നു.
ജീവിതത്തിലെ പ്രയാസകരമായ ഒരു ഘട്ടത്തെക്കുറിച്ച് ഓർത്തെടുത്തുകൊണ്ട് അവർ തുടർന്നു: “10 വർഷം മുമ്പ് ഭർത്താവ് മരിച്ചതോടെയാണ് കാര്യങ്ങൾ മാറിമറിഞ്ഞത്. ജീവിതത്തിൽ ആദ്യമായി എന്റെ വീട് ശാന്തമായി. എനിക്ക് വേണമെങ്കിൽ ഒറ്റപ്പെടലിന് വഴിപ്പെടാമായിരുന്നു, എന്നാൽ അതിനുപകരം ഞാൻ മട്ടുപ്പാവിലേക്ക് കയറി സ്ട്രെച്ചിംഗ് വ്യായാമങ്ങൾ ചെയ്യാൻ തുടങ്ങി. ടിവിയിൽ കാണുന്ന യോഗാസനങ്ങളും മറ്റുള്ളവർ ചെയ്യുന്നത് കാണുന്നതുമൊക്കെ വീട്ടിലെത്തി സ്വയം പരിശീലിച്ചു. അങ്ങനെ ഒന്നിൽ തുടങ്ങി രണ്ടും പത്തുമായി വളർന്ന് യോഗ എന്റെ ജീവിതത്തിന്റെ ഭാഗമായി മാറി.”
തന്റെ ഇന്നത്തെ ദിനചര്യയെക്കുറിച്ച് അവർ പറയുന്നതിങ്ങനെ: “ഇന്ന് ഞാൻ പുലർച്ചെ 4 മണിക്ക് ഉണരും. നടക്കാൻ പോകും, ദിവസത്തിൽ രണ്ടുനേരം യോഗ ചെയ്യും, പുസ്തകങ്ങൾ വായിക്കും, പഠിക്കും, ഇന്നും എന്റെ വീട് മുഴുവൻ സ്വന്തം കൈകൾ കൊണ്ടാണ് വൃത്തിയാക്കുന്നത്. എന്റെ മക്കൾ പല സ്ഥലങ്ങളിലാണ് താമസിക്കുന്നത്, ചിലർ വിദേശത്തുമാണ്. എന്നാൽ അവർ എന്നെക്കുറിച്ച് ഓർത്ത് വിഷമിക്കാൻ ഞാൻ ആഗ്രഹിക്കുന്നില്ല. എവിടെയെങ്കിലും പോകണമെങ്കിൽ ഞാൻ നടന്നുപോകും. അയൽക്കാർക്ക് സഹായം വേണമെങ്കിൽ സന്തോഷത്തോടെ ഒപ്പം നിൽക്കും. കൈകൾ എപ്പോഴും എന്തെങ്കിലും ജോലിയിൽ വ്യാപൃതമാക്കുമ്പോൾ മനസ്സിന് സമാധാനം ലഭിക്കുമെന്ന് ഞാൻ പഠിച്ചു. അതുകൊണ്ടാകാം, 75-ാം വയസ്സിലും എന്റെ ജീവിതം മന്ദഗതിയിലായതായി എനിക്ക് തോന്നാത്തത്. പുതിയ എന്തെങ്കിലും പഠിക്കാമെന്ന പ്രതീക്ഷയോടെയാണ് ഞാൻ ഇപ്പോഴും ഓരോ പ്രഭാതത്തിലും ഉണരുന്നത്.”
“അവർക്ക് 75 വയസ്സുണ്ട്, എല്ലാ ദിവസവും രാവിലെ അവർ ഇത് ചെയ്യുന്നു. ജിമ്മോ മറ്റ് സപ്ലിമെന്റുകളോ ഒന്നുമില്ലാതെ. ഞാൻ ജനിക്കുന്നതിനും മുൻപേ തുടങ്ങിയ അച്ചടക്കം മാത്രമാണിത്,” എന്ന് മുത്തശ്ശിയുടെ മറ്റൊരു വീഡിയോ പങ്കുവെച്ചുകൊണ്ട് സിമ്രാൻ കുറിച്ചിരുന്നു.
