ഹരിയാനയിലെ സോനിപത്തിൽ നിന്ന് മനസ്സിനെ നോവിക്കുന്ന ഒരു സംഭവം പുറത്തുവന്നിരിക്കുന്നു. 74 വയസ്സുകാരനായ മുംബൈ വ്യവസായിയുടെ അന്ത്യകർമ്മങ്ങൾ മക്കൾ വീഡിയോകോൾ വഴി കണ്ടുതൊഴുതു.
മുംബൈയിൽ അറിയപ്പെടുന്ന വസ്ത്രവ്യാപാരിയായിരുന്ന ശിവചരൺ രാംരതൻ ഗുപ്തയാണ് അന്തരിച്ചത്. അവസാന മൂന്ന് വർഷമായി ഹരിയാന സോനിപത്തിലെ ഒരു വൃദ്ധസദനത്തിലായിരുന്നു അദ്ദേഹം താമസിച്ചിരുന്നത്. ഇതേ വൃദ്ധസദനത്തിൽ ഒപ്പമുണ്ടായിരുന്ന അദ്ദേഹത്തിന്റെ ഭാര്യ രണ്ട് വർഷം മുമ്പാണ് മരിച്ചത്.
ഗുപ്തയുടെ മരണശേഷം വൃദ്ധസദനം അധികൃതർ മുംബൈയിലുള്ള മക്കളെ വിവരമറിയിച്ചു. തുടർന്ന് മക്കൾ 5,100 രൂപ ഓൺലൈനായി അയച്ചുകൊടുക്കുകയും മൃതദേഹം മുംബൈയിലേക്ക് കൊണ്ടുവരുന്നതിന് പകരം സോനിപത്തിൽ തന്നെ സംസ്‌കരിക്കാൻ ആവശ്യപ്പെടുകയുമായിരുന്നു.
അന്ത്യകർമ്മങ്ങൾ ആര് ചെയ്യുമെന്ന ചോദ്യം ഉയർന്നപ്പോൾ, ചടങ്ങുകൾ മുഴുവൻ വീഡിയോകോൾ വഴി കാണിച്ചുതരണമെന്ന് മക്കൾ അഭ്യർത്ഥിച്ചു. വൃദ്ധസദനം ഡയറക്ടർ ആനന്ദ് കുമാർ നേരിട്ടാണ് ഇതിനുള്ള ക്രമീകരണങ്ങൾ ചെയ്തത്. വീഡിയോകോളിൽ അച്ഛന്റെ മുഖം അവസാനമായി കണ്ടപ്പോൾ ഒരു മകൾ വിതുമ്പലോടെ “പപ്പ” എന്ന് വിളിച്ചതായി അദ്ദേഹം ഓർക്കുന്നു.
സംസ്കാരച്ചടങ്ങിലുടനീളം വീഡിയോകോളിൽ ഉണ്ടായിരുന്ന ഒരു മകൾ ചടങ്ങുകൾ പൂർത്തിയാകാൻ എത്ര സമയമെടുക്കുമെന്ന് ചോദിച്ചറിഞ്ഞു. സംസ്കാരം തുടങ്ങി 10-15 മിനിറ്റിനുള്ളിൽ കഴിയുമെന്ന് അറിയിച്ചപ്പോൾ, ചടങ്ങുകളുടെ മുഴുവൻ വീഡിയോയും അയച്ചുതരാൻ ആവശ്യപ്പെടുകയായിരുന്നു. ഇതിനുപുറമെ ഈ മാസം 20-ന് മുമ്പ് അസ്ഥി തറവാട്ടുസ്ഥലത്തേക്ക് കൊണ്ടുപോകാൻ കുടുംബത്തോട് ആവശ്യപ്പെട്ടിട്ടുണ്ടെങ്കിലും, വരാൻ സാധിക്കുമോ എന്ന് ഉറപ്പില്ലെന്നാണ് ഇളയ മകൾ മറുപടി നൽകിയത്.
