ജീവിതത്തിരക്കുകൾക്കും ഉത്തരവാദിത്തങ്ങൾക്കും ഇടയിൽ പ്രിയപ്പെട്ടവർക്കായി സ്വന്തം ആഗ്രഹങ്ങൾ മാറ്റിവെക്കുന്നവരാണ് പലരും. ചിലപ്പോൾ കടൽ കാണുക എന്ന വളരെ ലളിതമായ ഒരു ആഗ്രഹം പോലും പതിറ്റാണ്ടുകളോളം നടക്കാത്ത ഒരു സ്വപ്നമായി അവശേഷിച്ചേക്കാം. എന്നാൽ അത്തരമൊരു സ്വപ്നം പൂവണിഞ്ഞതിന്റെ ഹൃദ്യമായ വീഡിയോ ആണ് ഇൻസ്റ്റാഗ്രാമിൽ ‘ഭുക്കഡ് മുസാഫിർ’ (@bhukkad_musafir) എന്ന അക്കൗണ്ടിലൂടെ ശ്രീകാന്ത് എന്ന കണ്ടെന്റ് ക്രിയേറ്റർ പങ്കുവെച്ചിരിക്കുന്നത്. തന്റെ 80 വയസ്സുള്ള പിതാവിനെ ആദ്യമായി കടൽ കാണിക്കാൻ കൊണ്ടുപോയ വൈകാരികമായ മുഹൂർത്തമാണ് ഈ വീഡിയോയിലുള്ളത്.
തന്റെ പിതാവ് ഇതുവരെ കടൽത്തീരം കണ്ടിട്ടില്ലെന്നും, ജീവിതത്തിൽ ആദ്യമായി താൻ അദ്ദേഹത്തെ ഇവിടേക്ക് കൊണ്ടുവന്നിരിക്കുകയാണെന്നും പറഞ്ഞുകൊണ്ടാണ് ശ്രീകാന്ത് വീഡിയോ ആരംഭിക്കുന്നത്. അലയടിച്ചെത്തുന്ന തിരമാലകൾ പതുക്കെ വന്ന് പാദങ്ങളെ തൊടുമെന്ന് മകൻ പിതാവിനോട് സൌമ്യമായി പറയുന്നത് കാണാം. ഒരു കുട്ടിയുടെ കൗതുകത്തോടെയും അത്ഭുതത്തോടെയുമാണ് ആ വയോധികൻ ആകാശത്തോളം വിശാലമായ കടലിലേക്ക് നോക്കിനിൽക്കുന്നത്. “80-ാം വയസ്സിൽ ആദ്യമായി കടൽ കണ്ടപ്പോൾ അദ്ദേഹത്തിന്റെ മുഖത്ത് ചിരിയും കണ്ണുകളിൽ കുട്ടിക്കളിയുമായിരുന്നു. ചില സന്തോഷങ്ങൾക്ക് പ്രായം ഒരു തടസ്സമല്ല, അത് ശരിയായ നിമിഷത്തിന് വേണ്ടി കാത്തിരിക്കുക മാത്രമാണ് ചെയ്യുന്നത്. അച്ഛന്റെ ഈ പുഞ്ചിരിയാണ് ഞങ്ങളുടെ ഏറ്റവും വലിയ സമ്പത്ത്,” എന്ന് ശ്രീകാന്ത് വീഡിയോയോടൊപ്പം കുറിച്ചു.
തിരമാലകൾ അടുത്തേക്ക് എത്തുന്നതിന് മുൻപ് തന്നെ താഴേക്ക് കുനിഞ്ഞ് കടൽവെള്ളം തൊട്ടുതൊഴുന്ന അദ്ദേഹത്തിന്റെ ദൃശ്യം ഏറെ സ്പർശിക്കുന്ന ഒന്നായിരുന്നു. പ്രകൃതിയോട് മുതിർന്ന തലമുറ പുലർത്തുന്ന ആഴത്തിലുള്ള ആദരവാണ് ആ പ്രവൃത്തിയിൽ കണ്ടതെന്ന് കാഴ്ചക്കാർ കുറിച്ചു. അതിനുശേഷം അച്ഛനും മകനും പരസ്പരം കൈകോർത്ത് പിടിച്ച് കടൽത്തീരത്തൂടെ നടക്കുന്നത് കാണാം. “ജീവിതത്തിൽ ഇത്രയും വലിയ, അത്ഭുതകരമായ ഒരു കാഴ്ച സ്വപ്നത്തിൽ പോലും ഞാൻ കണ്ടിട്ടില്ല,” എന്ന് ചന്ദ്രഭാഗ കടൽത്തീരത്തുനിന്ന് ആ പിതാവ് തന്റെ അനുഭവം പങ്കുവെച്ചു.
ആയിരക്കണക്കിന് ആളുകളുടെ മനസ്സിലാണ് ഈ വീഡിയോ തൊട്ടത്. പ്രകൃതിയോട് അദ്ദേഹം കാണിച്ച ആദരവിനെയും ഭക്തിയേയും പുകഴ്ത്തി നിരവധി പേർ കമന്റ് ചെയ്തു. യാതൊരുവിധ ആർഭാടങ്ങളുമില്ലാതെ പ്രകൃതിയെ ആത്മാർത്ഥമായി പ്രണമിക്കുന്ന പഴയ തലമുറയുടെ സവിശേഷതയെ പലരും ഓർത്തെടുത്തു. ആദ്യമായി ഒരു കാര്യം അനുഭവിക്കാൻ പ്രായം ഒരിക്കലും ഒരു തടസ്സമല്ലെന്ന ഓർമ്മപ്പെടുത്തലാണ് ഈ മനോഹരമായ വീഡിയോ. 80-ാം വയസ്സിൽ മനസ്സിൽ മാത്രം കണ്ട കടൽ നേരിൽ കണ്ടപ്പോൾ ആ പിതാവിനുണ്ടായ സന്തോഷവും, ആ സ്വപ്നം പൂർത്തിയാക്കിക്കൊടുത്തപ്പോൾ മകനുണ്ടായ ആത്മനിർവൃതിയുമാണ് ഇതിലൂടെ കാണാൻ സാധിക്കുന്നത്.
