കൊൽക്കത്തക്കാർക്ക് ബിരിയാണി എന്നത് കേവലം ഒരു ഭക്ഷണപ്രിയമല്ല, മറിച്ച് ആ നഗരത്തിന്റെ സംസ്കാരവുമായി ആഴത്തിൽ പാകം ചെയ്തെടുത്ത ഒരു വികാരമാണ്. തെരുവോരങ്ങളിലെ തിരക്കേറിയ ഭക്ഷണശാലകൾ മുതൽ ഉരുളക്കിഴങ്ങ് ചേർത്ത ബിരിയാണിക്ക് പേരു കേട്ട പ്രശസ്തമായ റസ്റ്റോറന്റുകൾ വരെ തലമുറകളെ ഒന്നായി കോർത്തിണക്കാൻ ഈ വിഭവത്തിന് സാധിക്കുന്നു.
ബിരിയാണിയോടുള്ള ഈ ഇഷ്ടത്തെ ഏറ്റവും സ്വാദിഷ്ടമായ രീതിയിൽ ആഘോഷിച്ചുകൊണ്ട് അടുത്തിടെ ഒരു ബിരിയാണി തിന്നൽ മത്സരം സംഘടിപ്പിച്ചു. ഇതിൽ പങ്കെടുത്തവരെല്ലാം തങ്ങളുടെ പരമാവധി ശ്രമിച്ചെങ്കിലും ‘ദി ബിരിയാണി മാൻ 2026’ എന്ന കിരീടം കൊൽക്കത്തക്കാരനായ ഒരു യുവാവ് സ്വന്തമാക്കി. വെറും 45 മിനിറ്റിനുള്ളിൽ അഞ്ച് പ്ലേറ്റ് മട്ടൺ ബിരിയാണിയാണ് അദ്ദേഹം കഴിച്ചുതീർത്തത്. ഈ പ്രകടനം കാണികളെയും മറ്റ് മത്സരാർത്ഥികളെയും ഒരുപോലെ അത്ഭുതപ്പെടുത്തി.
‘ദി ടെലിഗ്രാഫ്’ റിപ്പോർട്ട് അനുസരിച്ച്, കൊൽക്കത്തയിലെ പ്രശസ്തമായ ഷിറാസ് ഗോൾഡൻ റസ്റ്റോറന്റിന്റെ 85-ാം വാർഷികാഘോഷങ്ങളുടെ ഭാഗമായാണ് മത്സരത്തിന്റെ ഗ്രാൻഡ് ഫിനാലെ സംഘടിപ്പിച്ചത്. ജൂലൈ 1 മുതൽ ജൂലൈ 21 വരെ ഷിറാസിന്റെ ഔട്ട്ലെറ്റുകളിലൂടെയും ഡിജിറ്റൽ പ്ലാറ്റ്ഫോമുകളിലൂടെയും നടത്തിയ രജിസ്ട്രേഷനിലൂടെയാണ് 25 ഫൈനലിസ്റ്റുകളെ തിരഞ്ഞെടുത്തത്. ലക്കി ഡ്രോയിലൂടെയാണ് ഇവരെ കണ്ടെത്തിയതെങ്കിലും, മത്സരത്തിൽ പോയിന്റ് നേടാൻ കുറഞ്ഞത് രണ്ട് പ്ലേറ്റ് ബിരിയാണിയെങ്കിലും മുഴുവനായി കഴിക്കണമായിരുന്നു.
ഫൈനലിൽ മത്സരിച്ചവരിൽ പ്രമിത് കുമാർ ദാസ് എന്ന വ്യക്തിയാണ് 45 മിനിറ്റിൽ അഞ്ച് പൂർണ്ണ പ്ലേറ്റ് മട്ടൺ ബിരിയാണി കഴിച്ച് വിജയിയായത്. വിജയിക്കുള്ള സമ്മാനമായി അദ്ദേഹത്തിന് ആയുഷ്കാല സൗജന്യ ബിരിയാണി കാർഡ് ലഭിച്ചു. ഷിറാസിന്റെ ഏത് ഔട്ട്ലെറ്റിൽ നിന്നും ആഴ്ചയിലൊരിക്കൽ സൗജന്യമായി സ്പെഷ്യൽ മട്ടൺ ബിരിയാണി കഴിക്കാൻ ഈ കാർ വഴി അദ്ദേഹത്തിന് സാധിക്കും. ബാക്കിയുള്ള 24 ഫൈനലിസ്റ്റുകൾക്ക് റസ്റ്റോറന്റിൽ ഭക്ഷണം കഴിക്കുമ്പോൾ ഇളവുകൾ ലഭിക്കുന്ന മൂന്ന് വർഷത്തെ ഷിറാസ് ലോയൽറ്റി കാർഡുകളും നൽകി.
വളരെ വേഗത്തിൽ ഭക്ഷണം കഴിക്കുന്ന തങ്ങളുടെ കഴിവ് പ്രകടിപ്പിക്കാൻ പല ഭക്ഷണപ്രിയരും ആഗ്രഹിക്കാറുണ്ട്. ഇതിന് ഉദാഹരണമായി, യുകെയിൽ നിന്നുള്ള നഥാൻ ഡേവീസ് എന്ന വ്യക്തി ഒരു മിനിറ്റിൽ ഏറ്റവും കൂടുതൽ ഫിഷ് ഫിംഗറുകൾ കഴിച്ച് റെക്കോർഡ് ഇട്ടിരുന്നു. ഗിന്നസ് വേൾഡ് റെക്കോർഡ്സ് തങ്ങളുടെ ഇൻസ്റ്റാഗ്രാം പേജിൽ പങ്കുവെച്ച വീഡിയോയിൽ അദ്ദേഹം വേഗത്തിൽ ഫിഷ് ഫിംഗറുകൾ കഴിക്കുന്നത് കാണാമായിരുന്നു. 60 സെക്കൻഡിൽ ആകെ 15 ഫിഷ് ഫിംഗറുകൾ കഴിച്ചാണ് അദ്ദേഹം ഈ ലോകറെക്കോർഡ് സ്വന്തമാക്കിയത്.
