ഒരു സാധാരണ ഗർഭകാല പരിശോധനയാണ് ഒരു കനേഡിയൻ ദമ്പതികൾക്ക് മറക്കാനാവാത്ത മനോഹരമായ അനുഭവമായി മാറിയത്. അൾട്രാസൗണ്ട് സ്കാനിംഗിനിടെ തങ്ങളുടെ ജനിക്കാനിരിക്കുന്ന കുഞ്ഞ് പുഞ്ചിരിക്കുന്നത് കണ്ട് ദമ്പതികൾ അത്ഭുതപ്പെട്ടു. ക്യാമറയിൽ പകർത്തിയ ഈ ഹൃദയസ്പർശിയായ നിമിഷം ഇപ്പോൾ സോഷ്യൽ മീഡിയയിൽ വൈറലാവുകയും ആയിരക്കണക്കിന് ആളുകളുടെ മനം കവരുകയും ചെയ്യുകയാണ്.
സാധാരണ ഗർഭകാല പരിശോധനയ്ക്കായി എത്തിയതായിരുന്നു ഈ ദമ്പതികൾ. സ്കാനിംഗ് നടക്കുമ്പോൾ, പിതാവ് തന്റെ പങ്കാളിയായ ലിയ ഒലിവേരയുടെ വയറിനോട് ചേർന്നുനിന്ന് കുഞ്ഞിനോട് സ്നേഹത്തോടെ സംസാരിച്ചു. “ഗുഡ് മോർണിംഗ്, ഹാപ്പി സാറ്റർഡേ… നിനക്ക് വിശക്കുന്നുണ്ടോ?” എന്ന് ചോദിച്ച് അദ്ദേഹം ലിയയുടെ വയറ്റിൽ ഉമ്മവെച്ചു. അദ്ദേഹം പുറകോട്ടുമാറി മുറിയിലുള്ളവരെ നോക്കിയ നിമിഷത്തിൽ, അൾട്രാസൗണ്ട് മോണിറ്ററിൽ എല്ലാവരെയും അത്ഭുതപ്പെടുത്തിയ ആ കാഴ്ച തെളിഞ്ഞു. അച്ഛന്റെ ശബ്ദം കേട്ടതിന് മറുപടിയെന്നോണം ആ കുഞ്ഞുവാവയുടെ മുഖത്ത് ഒരു ചെറിയ പുഞ്ചിരി വിടർന്നിരുന്നു.
പ്രതീക്ഷിക്കാത്ത ഈ കാഴ്ച കണ്ടതോടെ മുറിയിലുണ്ടായിരുന്നവർ വലിയ സന്തോഷത്തിലായി. കുടുംബാംഗങ്ങളും മെഡിക്കൽ സ്റ്റാഫും സന്തോഷം കൊണ്ട് ആർത്തുവിളിക്കുകയും, കുഞ്ഞിനോട് വീണ്ടും സംസാരിക്കാൻ അച്ഛനെ പ്രോത്സാഹിപ്പിക്കുകയും ചെയ്തു. ലിയയുടെ സഹോദരിയാണ് സ്ക്രീനിലെ ഈ അപൂർവ്വ നിമിഷം മൊബൈലിൽ പകർത്തിയത്. ഇൻറർനെറ്റിൽ തരംഗമായ ഈ വീഡിയോ, തങ്ങൾ കണ്ടതിൽ വെച്ച് ഏറ്റവും മനോഹരമായ ഗർഭകാല നിമിഷമാണെന്നാണ് സോഷ്യൽ മീഡിയ ഉപയോക്താക്കൾ കുറിക്കുന്നത്.
ആ വൈകാരിക നിമിഷം ഓർത്തെടുത്ത ലിയ, സന്തോഷം കൊണ്ട് തന്റെ കണ്ണുകൾ നിറഞ്ഞൊഴുകിയതായി പറഞ്ഞു. “സന്തോഷം കൊണ്ട് എന്റെ മനസ്സു നിറഞ്ഞു, ആ നിമിഷം തന്നെ ഞാൻ ആനന്ദക്കണ്ണീർ പൊഴിക്കാൻ തുടങ്ങി.”
വയറ്റിൽ കിടക്കുമ്പോൾ കുഞ്ഞുങ്ങൾ പുഞ്ചിരിക്കുകയും ചിണുങ്ങുകയും കൊട്ടുവായിടുകയുമൊക്കെ ചെയ്യാറുണ്ടെങ്കിലും, അൾട്രാസൗണ്ട് സ്കാനിംഗിലൂടെ ഇത്തരമൊരു കാഴ്ച കാണാൻ മാതാപിതാക്കൾക്ക് അപൂർവ്വമായേ അവസരം ലഭിക്കാറുള്ളൂ. ഇത് വെറുമൊരു യാദൃശ്ചികതയാണോ അതോ അച്ഛന്റെ പരിചയമുള്ള ശബ്ദത്തോടുള്ള കുഞ്ഞിന്റെ പ്രതികരണമാണോ എന്ന് ഉറപ്പില്ലെങ്കിലും, ഈ സുന്ദര നിമിഷം ആ കുടുംബത്തിന് എന്നും ഓർത്തു വെക്കാവുന്ന ഒരു മനോഹര ഓർമ്മയായി മാറി.
