നിങ്ങൾ ഒരു സിനിമ കാണുകയോ, പരീക്ഷയ്ക്ക് പഠിക്കുകയോ, റോഡിലെ ഗതാഗതക്കുരുക്കിൽ കിടക്കുകയോ, അല്ലെങ്കിൽ ഏതെങ്കിലും പ്രധാനപ്പെട്ട ഇമെയിലിനായി കാത്തിരിക്കുകയോ ചെയ്യുകയാണെന്ന് കരുതുക. നിങ്ങൾ പോലുമറിയാതെ നിങ്ങളുടെ വിരലുകൾ വായിലേക്ക് പോവുകയും നഖം കടിക്കാൻ തുടങ്ങുകയും ചെയ്യും. പലരിലും ഈ നഖം കടി തികച്ചും സ്വാഭാവികമായി (ഓട്ടോമാറ്റിക്കായി) സംഭവിക്കുന്ന ഒന്നാണ്. ഇതൊരു മോശം ശീലമായി പലരും തള്ളിക്കളയാറുണ്ടെങ്കിലും, നിങ്ങളുടെ മാനസികവും ശാരീരികവുമായ ആരോഗ്യത്തെക്കുറിച്ച് നിങ്ങൾ വിചാരിക്കുന്നതിലും കൂടുതൽ കാര്യങ്ങൾ വെളിപ്പെടുത്താൻ ഈ ശീലത്തിന് കഴിയുമെന്നാണ് വിദഗ്ദ്ധർ പറയുന്നത്. വൈദ്യശാസ്ത്രപരമായി ‘ഒനൈക്കോഫേജിയ’ (onychophagia) എന്നറിയപ്പെടുന്ന നഖം കടി ശീലം കുട്ടികളിലും മുതിർന്നവരിലും ഒരുപോലെ കാണപ്പെടുന്നു. മിക്കപ്പോഴും ഇത് ദോഷകരമല്ലെങ്കിലും, ഈ ശീലം അടിക്കടി ഉണ്ടാവുകയോ നിയന്ത്രിക്കാൻ ബുദ്ധിമുട്ടാവുകയോ ചെയ്യുമ്പോൾ നമ്മൾ ഇതിനെ അല്പം ഗൗരവത്തോടെ കാണേണ്ടതുണ്ട്. നിങ്ങളുടെ നഖം കടി ശീലം നിങ്ങളോട് പറയുന്ന അഞ്ച് കാര്യങ്ങൾ ഇവയാണ്.
നഖം കടിയുടെ ഏറ്റവും പ്രധാനപ്പെട്ട ഒരു കാരണം മാനസിക സമ്മർദ്ദമാണ് (Stress). ജോലിയിലെ സമ്മർദ്ദം, പരീക്ഷ, കുടുംബപ്രശ്നങ്ങൾ അല്ലെങ്കിൽ ദൈനംദിന ആശങ്കകൾ എന്നിവ ഉണ്ടാകുമ്പോൾ നഖം കടി ഒരു സ്വയമേയുള്ള പ്രതികരണമായി മാറാറുണ്ട്. മറ്റാരെങ്കിലും പറഞ്ഞു തരുമ്പോഴായിരിക്കും പലരും തങ്ങൾ നഖം കടിക്കുകയാണെന്ന് പോലും തിരിച്ചറിയുന്നത്. ഈ ആവർത്തിച്ചുള്ള പ്രവൃത്തി താൽക്കാലികമായി സമ്മർദ്ദമുണ്ടാക്കുന്ന ചിന്തകളിൽ നിന്ന് തലച്ചോറിനെ വഴിതിരിച്ചുവിടുകയും ആ നിമിഷത്തിൽ ഒരു ആശ്വാസം നൽകുകയും ചെയ്യുന്നു. നഖം കടി എന്നത് പലപ്പോഴും സമ്മർദ്ദം, ഉത്കണ്ഠ, വിരസത അല്ലെങ്കിൽ അസ്വസ്ഥത എന്നിവയുമായി ബന്ധപ്പെട്ടിരിക്കുന്ന ഒന്നാണെന്ന് ക്ലിനിക്കൽ സൈക്കോളജിസ്റ്റും സൈക്കോതെറാപ്പിസ്റ്റുമായ ഏക്ത ധാരിയ പറയുന്നു. പലരും അറിവില്ലാതെയാണ് ഇത് ചെയ്യുന്നത്, പ്രത്യേകിച്ച് വലിഞ്ഞുമുറുകിയ സാഹചര്യങ്ങളിൽ. ഇത് എപ്പോഴും ഒരു മാനസികാരോഗ്യ പ്രശ്നമാകണമെന്നില്ലെങ്കിലും, അടിക്കടിയുള്ളതും നിയന്ത്രിക്കാനാകാത്തതുമായ നഖം കടി ഒളിച്ചിരിക്കുന്ന ഉത്കണ്ഠയെയോ വികാരങ്ങളെ നിയന്ത്രിക്കാനുള്ള ബുദ്ധിമുട്ടുകളെയോ കാണിക്കുന്നു. ഈ ശീലം വെറുതെ നിർത്താൻ ശ്രമിക്കുന്നതിനേക്കാൾ അത് എപ്പോഴാണ് ഉണ്ടാകുന്നത് എന്ന് തിരിച്ചറിയുന്നതാണ് പ്രധാനം.
നഖം കടി എപ്പോഴും ഉത്കണ്ഠ കൊണ്ട് മാത്രം ഉണ്ടാകുന്നതല്ല. ചിലപ്പോൾ ഒരു ആശ്വാസത്തിന് വേണ്ടിയും ആളുകൾ ഇത് ചെയ്യാറുണ്ട്. ചിലർ കാൽ ആട്ടുന്നതും മുടി ചുറ്റിക്കൊണ്ടിരിക്കുന്നതും പേന ക്ലിക്ക് ചെയ്യുന്നതും പോലെ, നഖം കടിയും വികാരങ്ങളെ ക്രമീകരിക്കാനും വിരസത മാറ്റാനും സഹായിക്കുന്ന ഒന്നായി മാറാറുണ്ട്. കാലക്രമേണ തലച്ചോർ ഈ ശീലത്തെ വിശ്രമവുമായോ ആശ്വാസവുമായോ ബന്ധിപ്പിക്കാൻ തുടങ്ങുന്നതോടെ ഇത് നിർത്താൻ ബുദ്ധിമുട്ടായി മാറുന്നു. താൻ വർഷങ്ങളായി നഖം കടിക്കാറുണ്ടെന്നും പരീക്ഷാ സമയത്തും അമിതമായി ചിന്തിക്കുമ്പോഴും ഇത് കൂടാറുണ്ടെന്നും എസ്.പി ജെയിൻ സ്കൂൾ ഓഫ് ഗ്ലോബൽ മാനേജ്മെന്റിലെ വിദ്യാർത്ഥിനിയായ ജാൻവി ഗോയങ്ക പങ്കുവെക്കുന്നു. മറ്റുള്ളവർ പറയുമ്പോഴാണ് താൻ ഇത് ശ്രദ്ധിക്കാറെന്നും തിരിഞ്ഞുനോക്കുമ്പോൾ അറിവില്ലാതെ തന്നെ സമ്മർദ്ദത്തെ നേരിടാനുള്ള തന്റെ വഴിയായിരുന്നു ഇതെന്നും അവർ പറയുന്നു.
ഇടയ്ക്കൊക്കെ നഖം കടിക്കുന്നത് വലിയ പ്രശ്നങ്ങൾ ഉണ്ടാക്കില്ലെങ്കിലും, സ്ഥിരമായി കടിക്കുന്നത് നഖങ്ങളെയും അതിന് ചുറ്റുമുള്ള ചർമ്മത്തെയും നശിപ്പിക്കും. ഇത് അണുബാധയ്ക്കുള്ള സാധ്യത വർദ്ധിപ്പിക്കുകയും നഖങ്ങൾ ഒരുപോലെയല്ലാതെ വളരാൻ കാരണമാവുകയും ചെയ്യും. ഈ ശീലം ദന്താരോഗ്യത്തെയും ബാധിക്കാം. സ്ഥിരമായി നഖം കടിക്കുന്നത് പല്ലുകൾ പൊട്ടുന്നതിനും ഇനാമൽ നശിക്കുന്നതിനും താടിയെല്ലിന് വേദനയുണ്ടാക്കുന്നതിനും കാരണമാകും. വിരലുകളിൽ ദിവസവും ഒരുപാട് അണുക്കൾ പറ്റിപ്പിടിക്കുന്നതിനാൽ നഖം കടിക്കുന്നതിലൂടെ ബാക്ടീരിയകൾ ശരീരത്തിനുള്ളിലേക്ക് കടക്കാനുള്ള സാധ്യതയും വളരെ കൂടുതലാണ്.
ചിലർക്ക് നഖം കടി വെറുമൊരു സാധാരണ ശീലത്തിനപ്പുറമാണ്. ഇത് നിയന്ത്രിക്കാൻ കഴിയാതെ വരികയും ദൈനംദിന ജീവിതത്തെ ബാധിക്കുകയും ചെയ്താൽ, അത് വിട്ടുമാറാത്ത മാനസിക സമ്മർദ്ദം, ഉത്കണ്ഠാ രോഗങ്ങൾ (Anxiety disorders), അല്ലെങ്കിൽ ഒ.സി.ഡി (Obsessive-Compulsive Disorder) എന്നിവയുമായി ബന്ധപ്പെട്ടിരിക്കാം. ഇതിനർത്ഥം നഖം കടിക്കുന്ന എല്ലാവർക്കും മാനസികാരോഗ്യ പ്രശ്നമുണ്ടെന്നല്ല. എന്നാൽ ഈ ശീലം കാരണം വേദനയോ ചോരയോ നാണക്കേടോ ഉണ്ടാകുന്നുണ്ടെങ്കിൽ, എത്ര ശ്രമിച്ചിട്ടും നിർത്താൻ കഴിയുന്നില്ലെങ്കിൽ ഒരു മാനസികാരോഗ്യ വിദഗ്ദ്ധന്റെ സഹായം തേടുന്നത് നല്ലതാണ്.
പലരും ടിവി കാണുമ്പോഴോ കമ്പ്യൂട്ടറിൽ ജോലി ചെയ്യുമ്പോഴോ വായിക്കുമ്പോഴോ ആഴത്തിൽ ചിന്തിക്കുമ്പോഴോ ആണ് അറിയാതെ നഖം കടിക്കുന്നത്. ഇതൊരു സ്വയമേയുള്ള ശീലമായി മാറുന്നതുകൊണ്ട് “ഇനി ചെയ്യില്ല” എന്ന് സ്വയം പറയുന്നത് കൊണ്ട് മാത്രം ഇത് നിർത്താൻ കഴിയില്ല. ഈ ശീലത്തിലേക്ക് നയിക്കുന്ന സാഹചര്യങ്ങൾ തിരിച്ചറിയുക, നഖങ്ങൾ എപ്പോഴും മുറിച്ചു സൂക്ഷിക്കുക, കയ്പ്പുള്ള നെയിൽ പോളിഷ് ഉപയോഗിക്കുക, അല്ലെങ്കിൽ ഇതിന് പകരമായി സ്ട്രെസ് ബോൾ (Stress ball) ഉപയോഗിക്കുക തുടങ്ങിയ കാര്യങ്ങളാണ് വിദഗ്ദ്ധർ നിർദ്ദേശിക്കുന്നത്. താൻ ഉത്കണ്ഠാകുലനായിരിക്കുമ്പോഴോ ജോലിയിൽ മുഴുകിയിരിക്കുമ്പോഴോ ആണ് നഖം കടിക്കാറെന്നും, ഇത് തന്റെ മനസ്സ് സമ്മർദ്ദത്തോട് എങ്ങനെ പ്രതികരിക്കുന്നു എന്നതിന്റെ ലക്ഷണമാണെന്ന് തിരിച്ചറിഞ്ഞതായും കൊമേഴ്സ് ബിരുദധാരിയായ അഭയ് നേഗി പറയുന്നു.
നഖം കടി പലരും വിചാരിക്കുന്നതിലും വളരെ സാധാരണമായ ഒന്നാണ്, മിക്കപ്പോഴും ഇതിൽ പരിഭ്രാന്തരാകേണ്ട കാര്യമില്ല. എങ്കിലും നമ്മുടെ മാനസികാവസ്ഥയെക്കുറിച്ച് മനസ്സിലാക്കാൻ ഇത് സഹായിക്കും. ചിലർക്ക് ഇത് സമ്മർദ്ദത്തോടുള്ള പ്രതികരണമാണ്, ചിലർക്ക് ഇതൊരു ആശ്വാസമാണ്, എന്നാൽ കുറച്ചുപേരിലെങ്കിലും ഇത് ആഴത്തിലുള്ള മാനസിക വിഷമങ്ങളുടെ ലക്ഷണമാകാം. നഖം കടി കാരണം വേദനയോ പല്ലുകൾക്കും നഖങ്ങൾക്കും കേടുപാടുകളോ ഉണ്ടാകുന്നുണ്ടെങ്കിൽ ഒരു ആരോഗ്യവിദഗ്ദ്ധന്റെ ഉപദേശം തേടുന്നത് നല്ലതാണ്. എന്തുകൊണ്ടാണ് നിങ്ങൾ നഖം കടിക്കുന്നത് എന്ന് മനസ്സിലാക്കുകയാണ് ഈ ശീലം മാറ്റുന്നതിനുള്ള ആദ്യ പടി.
