ലഖ്നൗ: വരന് കഷണ്ടിയുണ്ടെന്ന വിവരം വൈകി അറിഞ്ഞതിനെ തുടർന്ന് വധു വിവാഹത്തിൽ നിന്ന് പിന്മാറി. ഉത്തർപ്രദേശിലെ പ്രയാഗ്രാജിലുള്ള ഹാൻഡിയയിലാണ് ഈ കൗതുകകരമായ സംഭവം നടന്നത്. വിവാഹ ചടങ്ങുകൾ അവസാന ഘട്ടത്തിലേക്ക് കടക്കവെയാണ് വരന്റെ കഷണ്ടി വധുവിന്റെ ശ്രദ്ധയിൽപ്പെട്ടതും അവർ വിവാഹം വേണ്ടെന്ന് വെച്ചതും.
ശനിയാഴ്ച രാത്രി വലിയ ആഘോഷങ്ങളോടും ബാന്റ് മേളത്തോടും കൂടിയാണ് ജൗൺപുർ സ്വദേശിയായ വരനും കൂട്ടരും വധുഗൃഹത്തിൽ എത്തിയത്. വധൂവരന്മാർ പരസ്പരം മാല ചാർത്തുന്ന ‘ജയമാല’ ചടങ്ങിന് തൊട്ടുമുമ്പ് വരെ കാര്യങ്ങളെല്ലാം സാധാരണ നിലയിലായിരുന്നു. എന്നാൽ ഈ സമയത്താണ് വരന് കഷണ്ടിയുണ്ടെന്ന സത്യം വധു തിരിച്ചറിയുന്നത്. ഇതോടെ യുവതി കല്യാണത്തിന് വിസമ്മതിക്കുകയും ഇത് ഇരു കുടുംബങ്ങളും തമ്മിൽ വലിയ വാക്കുതർക്കത്തിന് കാരണമാവുകയും ചെയ്തു.
തർക്കം കൈവിട്ടുപോയതോടെ പെൺകുട്ടിയുടെ വീട്ടുകാർ പോലീസിനെ വിവരമറിയിച്ചു. സ്ഥലത്തെത്തിയ പോലീസ് ഇരുപക്ഷത്തെയും സ്റ്റേഷനിലേക്ക് വിളിച്ചുവരുത്തി ചർച്ച നടത്തി. മണിക്കൂറുകളോളം ബന്ധുക്കളും നാട്ടിലെ മുതിർന്നവരും പോലീസും ചേർന്ന് പെൺകുട്ടിയെ അനുനയിപ്പിക്കാൻ ശ്രമിച്ചെങ്കിലും വരനെ വിവാഹം കഴിക്കില്ലെന്ന തീരുമാനത്തിൽ വധു ഉറച്ചുനിന്നു. ഇതോടെ ചർച്ചകൾ പരാജയപ്പെടുകയും വിവാഹം പൂർണ്ണമായും ഉപേക്ഷിക്കാൻ ഇരു വീട്ടുകാരും തീരുമാനിക്കുകയുമായിരുന്നു.
തുടർന്ന് വരനും സംഘവും കല്യാണം കഴിക്കാതെ നിരാശയോടെ മടങ്ങി. വരന് കഷണ്ടിയുള്ളതിനാലാണ് പെൺകുട്ടി വിവാഹത്തിൽ നിന്ന് പിന്മാറിയതെന്ന് ഹാൻഡിയ പോലീസ് സ്ഥിരീകരിച്ചിട്ടുണ്ട്. സമാനമായ സംഭവങ്ങൾ അടുത്ത കാലത്തായി ഈ പ്രദേശത്തെ മൗഎയ്മ, ബഹ്രിയ എന്നിവിടങ്ങളിലും നടന്നിട്ടുണ്ട്. 2019-ൽ ആയുഷ്മാൻ ഖുറാന നായകനായി പുറത്തിറങ്ങിയ ‘ബാല’ എന്ന ബോളിവുഡ് സിനിമയുടെ കഥയും ഇതേ പ്രമേയത്തിലുള്ളതായിരുന്നു. വിവാഹം കഴിക്കാൻ പോകുന്ന പെൺകുട്ടിയിൽ നിന്ന് തന്റെ കഷണ്ടി മറച്ചുവെക്കാൻ നായകൻ നടത്തുന്ന ശ്രമങ്ങളായിരുന്നു ആ സിനിമയിൽ ദൃശ്യാവിഷ്കരിച്ചത്.
