ഓസ്ട്രേലിയയിൽ വെച്ച് 18,000 അടി ഉയരത്തിൽ നിന്ന് സ്കൈഡൈവിംഗ് നടത്തുന്ന ഇന്ത്യൻ മുത്തശ്ശന്റെ വീഡിയോ സോഷ്യൽ മീഡിയയിൽ വൈറലായി. പ്രായത്തെ വെല്ലുന്ന ഈ വയോധികന്റെ ധൈര്യത്തെയും ആവേശത്തെയും നെറ്റിസൺസ് ഒന്നടങ്കം അഭിനന്ദിക്കുകയാണ്. അങ്കിത് എന്ന യുവാവാണ് തന്റെ മുത്തശ്ശന്റെ ഈ സാഹസിക വീഡിയോ പങ്കുവെച്ചത്. മുത്തശ്ശന്റെ ആദ്യത്തെ സ്കൈഡൈവിംഗ് അല്ല ഇതെന്നും മുൻപ് അദ്ദേഹം 15,000 അടി ഉയരത്തിൽ നിന്ന് ചാടിയിട്ടുണ്ടെന്നും അങ്കിത് വെളിപ്പെടുത്തി. എന്നാൽ ഇത്തവണ ഓസ്ട്രേലിയയിൽ വെച്ച് 18,000 അടി ഉയരത്തിൽ നിന്ന് ചാടി മുൻ റെക്കോർഡ് തിരുത്താനാണ് ഈ മുത്തശ്ശനും കൊച്ചുമകനും തീരുമാനിച്ചത്.
വീഡിയോയുടെ തുടക്കത്തിൽ, “അപ്പോൾ സുഹൃത്തുക്കളെ, ഞങ്ങൾ ഞങ്ങളുടെ മുത്തശ്ശനെ സ്കൈഡൈവിംഗ് ചെയ്യിക്കാനായി ഓസ്ട്രേലിയയിൽ എത്തിച്ചിരിക്കുകയാണ്. കഴിഞ്ഞ തവണ 15,000 അടി ഉയരത്തിൽ നിന്നായിരുന്നു, ഇത്തവണ അത് 18,000 അടിയാക്കി ഉയർത്തിയിട്ടുണ്ട്,” എന്ന് അങ്കിത് ആമുഖമായി പറയുന്നു. വിമാനത്തിൽ കയറുന്നതിന് തൊട്ടുമുമ്പ്, അങ്കിത് തമാശയോടെ “മുത്തശ്ശാ, പേടിയുണ്ടോ?” എന്ന് ചോദിക്കുമ്പോൾ, ഒട്ടും മടിക്കാതെ ചിരിച്ചുകൊണ്ട് “ആർക്കാണ് പേടി, എനിക്കോ?” എന്നാണ് അദ്ദേഹം മറുപടി നൽകുന്നത്. ആത്മവിശ്വാസം നിറഞ്ഞ ഈ മറുപടിയാണ് വീഡിയോയിലെ ഏറ്റവും ശ്രദ്ധേയമായ നിമിഷമായി മാറിയത്.
ആവേശം അവിടെയും തീർന്നില്ല; വിമാനത്തിൽ നിന്ന് താഴേക്ക് പതിക്കുന്നതിനിടയിൽ “ജയ് ഹിന്ദ്! ജയ് ഭാരത്! ജയ് ഹരിയാന!” എന്ന് അദ്ദേഹം ആവേശത്തോടെ വിളിച്ചുപറയുന്നുമുണ്ട്. ഇത് ആ സാഹസിക നിമിഷത്തിന്റെ സന്തോഷവും ഒപ്പം രാജ്യസ്നേഹവും ഇരട്ടിയാക്കി. അങ്കിത് ഈ വീഡിയോ പങ്കുവെച്ചതിന് പിന്നാലെ മുത്തശ്ശന്റെ ഭയമില്ലാത്ത മനോഭാവത്തെയും അസാമാന്യമായ ഊർജ്ജത്തെയും പ്രശംസിച്ച് നിരവധി കമന്റുകളാണ് വരുന്നത്. ചാട്ടത്തിനിടയിൽ അദ്ദേഹം ജയ് ഹിന്ദ് എന്ന് വിളിച്ച രീതി തങ്ങളിൽ രോമാഞ്ചമുണ്ടാക്കിയെന്നാണ് പലരും കമന്റ് ബോക്സിൽ കുറിച്ചത്.
