മെഡിക്കൽ ഇന്റേൺ ഡോക്ടർ തന്റെ ഇൻസ്റ്റാഗ്രാം വീഡിയോയിലൂടെ പങ്കുവെച്ച ഹൃദയഭേദകമായ അനുഭവങ്ങൾ സോഷ്യൽ മീഡിയയിൽ ചർച്ചയാകുന്നു. തന്നിൽ കടുത്ത മാനസികവിഷമം ഉണ്ടാക്കുന്ന മൂന്ന് പ്രധാന ആശുപത്രി അനുഭവങ്ങളെക്കുറിച്ചാണ് ഡോ. തനയ് മിശ്ര എന്ന യുവാവ് തുറന്നുപറഞ്ഞത്. കഠിനമായ രോഗാവസ്ഥയിലുള്ള തങ്ങളുടെ ഭാര്യമാരെ ആശുപത്രിയിൽ എത്തിക്കുന്ന ചില പുരുഷന്മാരുടെ സ്ത്രീവിരുദ്ധമായ പെരുമാറ്റമാണ് ഇതിൽ ആദ്യത്തേത്.
ഭാര്യമാരെ ആശുപത്രിയിൽ കൊണ്ടുവരുന്നത് അവരോട് ചെയ്യുന്ന എന്തോ വലിയ ഉപകാരമാണെന്ന രീതിയിലാണ് ഇത്തരക്കാർ പെരുമാറുന്നത്. തങ്ങൾ ജോലിക്ക് പോകാൻ പറ്റാത്തതിനെക്കുറിച്ചും വീട്ടിൽ ആർക്കും ഭക്ഷണം കിട്ടാത്തതിനെക്കുറിച്ചും ഇവർ രോഗിയായ ഭാര്യയോട് നിരന്തരം പരാതി പറഞ്ഞുകൊണ്ടിരിക്കും. മരിക്കാൻ കിടക്കുന്ന ഒരു സ്ത്രീക്ക് സഹായം ആവശ്യമായിരിക്കുന്ന സമയത്ത് ഇത്തരത്തിൽ പെരുമാറുന്നവരുമായി താൻ പലപ്പോഴും തർക്കിച്ചിട്ടുണ്ടെന്നും അദ്ദേഹം പറയുന്നു.
തന്റെ ഇന്റേൺഷിപ്പ് കാലത്ത് ആത്മഹത്യാശ്രമത്തിന്റെ ഭാഗമായി ശരീരത്തിൽ സ്വയം മുറിവുകൾ ഉണ്ടാക്കിയ (hesitation marks) ഒട്ടനവധി സ്ത്രീകളെ കാണേണ്ടി വന്നതാണ് രണ്ടാമത്തെ അനുഭവം. ഇതിൽ പലരും മാനസിക വെല്ലുവിളികൾ നേരിടുന്നവരാണെങ്കിലും അല്ലാത്തവരും ഉണ്ടായിരുന്നു. ഇത്രയധികം സ്ത്രീകൾ തങ്ങളുടെ ജീവനൊടുക്കാൻ ശ്രമിക്കുന്നു എന്നത് അങ്ങേയറ്റം സങ്കടകരമായ കാര്യമാണ്.
മാതാപിതാക്കളുടെയോ മക്കളുടെയോ പങ്കാളിയുടെയോ ഒക്കെ മുന്നിൽ വെച്ച് ഒരാൾ ജീവനുവേണ്ടി പിടയുന്നതും ഒടുവിൽ മരിച്ചുപോകുന്നതുമാണ് മൂന്നാമത്തെ അനുഭവം. ഈ സമയത്ത് ബന്ധുക്കൾ അലറിക്കരയുന്നത് കാണുമ്പോൾ തനിക്കും പലപ്പോഴും കരച്ചിൽ അടക്കാനാകാറില്ലെന്നും, മരണം നമ്മുടെ ആരുടെയും കൈകളിൽ അല്ലാത്തതിനാൽ ഇതൊക്കെ ഈ ജോലിയുടെ ഭാഗമായി കണ്ടേ മതിയാകൂ എന്നും അദ്ദേഹം വ്യക്തമാക്കുന്നു.
ജീവിതം പ്രവചനാതീതമാണെന്നും അതിനാൽ പ്രിയപ്പെട്ടവരോടുള്ള സ്നേഹം പ്രകടിപ്പിക്കാൻ ലഭിക്കുന്ന ഒരു അവസരവും നഷ്ടപ്പെടുത്തരുതെന്നും ഓർമ്മിപ്പിച്ചുകൊണ്ടാണ് അദ്ദേഹം വീഡിയോ അവസാനിപ്പിക്കുന്നത്. ലക്ഷക്കണക്കിന് ആളുകൾ കണ്ട ഈ വീഡിയോയ്ക്ക് താഴെ ഡോക്ടറെ അഭിനന്ദിച്ചുകൊണ്ട് നിരവധി പേർ രംഗത്തെത്തി.
പ്രസവസമയത്ത് രക്തം വാർന്ന് മരിക്കാൻ കിടക്കുന്ന ഭാര്യമാർക്ക് രക്തം നൽകാൻ പോലും വിസമ്മതിക്കുന്ന ഭർത്താക്കന്മാരും കുടുംബങ്ങളും ഉണ്ടെന്ന യാഥാർത്ഥ്യം മറ്റൊരു ഉപയോക്താവ് കമന്റിലൂടെ പങ്കുവെച്ചു. ഇത്തരം സങ്കീർണ്ണമായ സാമൂഹിക യാഥാർത്ഥ്യങ്ങൾ ധൈര്യപൂർവ്വം തുറന്നുപറഞ്ഞ ഡോക്ടർക്ക് വലിയ പിന്തുണയാണ് ഓൺലൈനിൽ ലഭിച്ചുകൊണ്ടിരിക്കുന്നത്.
