ഫാറ്റി ലിവർ എന്നത് ഇപ്പോൾ പ്രായമായവരിൽ മാത്രം കാണുന്ന ഒരു രോഗമല്ല. അടുത്ത കാലത്തായി യുവാക്കളിലും ഈ പ്രശ്നം കൂടുതലായി കണ്ടുവരുന്നതായി ഡോക്ടർമാർ പറയുന്നു. കൃത്യമല്ലാത്ത ഭക്ഷണരീതി, വ്യായാമമില്ലായ്മ, മണിക്കൂറുകളോളം ഒരേ ഇരുപ്പ് ഇരിക്കുക, ഉറക്കക്കുറവ് തുടങ്ങിയ ആധുനിക ജീവിതശൈലികളാണ് ഇതിന് പ്രധാന കാരണം.
നോൺ-ആൽക്കഹോളിക് ഫാറ്റി ലിവർ ഡിസീസ് (NAFLD) എന്ന അവസ്ഥ വളരെ നിശബ്ദമായാണ് ശരീരത്തിൽ വികസിക്കുന്നത്. സാധാരണയായി നടത്തുന്ന രക്തപരിശോധനയിലോ സ്കാനിംഗിലോ ലിവർ എൻസൈമുകളുടെ അളവ് കൂടിയതായി കാണുമ്പോൾ മാത്രമാണ് പലരും ഈ രോഗത്തെക്കുറിച്ച് അറിയുന്നത്. എന്നാൽ നമ്മുടെ ദൈനംദിന ശീലങ്ങളിൽ ചില മാറ്റങ്ങൾ വരുത്തിയാൽ കരളിന്റെ ആരോഗ്യം വീണ്ടെടുക്കാൻ സാധിക്കുമെന്നാണ് വിദഗ്ദ്ധർ പറയുന്നത്.
പ്രശസ്ത ഡോക്ടറായ കുനാൽ സൂദ് തന്റെ ഇൻസ്റ്റാഗ്രാം വീഡിയോയിലൂടെ കരളിന്റെ കൊഴുപ്പ് കുറയ്ക്കാനും ലിവർ എൻസൈമുകൾ ആരോഗ്യകരമായി നിലനിർത്താനും സഹായിക്കുന്ന അഞ്ച് ലളിതമായ ശീലങ്ങൾ പങ്കുവെച്ചിട്ടുണ്ട്. കാപ്പി കുടിക്കുന്നത്, ഒമേഗ-3 കഴിക്കുന്നത്, ബെർബെറിൻ, ആവശ്യത്തിന് പ്രോട്ടീൻ അടങ്ങിയ ഭക്ഷണം, ഭക്ഷണശേഷമുള്ള നടത്തം എന്നിവയെല്ലാം കരളിന്റെ ആരോഗ്യത്തിന് നല്ലതാണെന്ന് അദ്ദേഹം പറയുന്നു. എങ്കിലും ഇൻസുലിൻ പ്രതിരോധം മെച്ചപ്പെടുത്തുക, സ്ഥിരമായി വ്യായാമം ചെയ്യുക, കാർബോഹൈഡ്രേറ്റ് അടങ്ങിയ ഭക്ഷണങ്ങളും മദ്യപാനവും കുറയ്ക്കുക, ശരീരഭാരം നിയന്ത്രിക്കുക എന്നിവയാണ് ഏറ്റവും പ്രധാനം.
ദിവസവും കാപ്പി കുടിക്കുന്നത് കരളിലെ എൻസൈമുകളുടെ അളവ് കുറയ്ക്കാനും കരളിന് കേടുപാടുകൾ വരാതിരിക്കാനും സഹായിക്കുമെന്ന് ഡോക്ടർ സൂദ് വ്യക്തമാക്കുന്നു. കാപ്പിയിലടങ്ങിയിരിക്കുന്ന പോളിഫെനോളുകൾ, ആന്റിഓക്സിഡന്റുകൾ, ക്ലോറോജെനിക് ആസിഡുകൾ എന്നിവ കരളിലെ കോശങ്ങളുടെ സമ്മർദ്ദം കുറയ്ക്കാനും ഇൻസുലിൻ പ്രവർത്തനം മെച്ചപ്പെടുത്താനും സഹായിക്കും. അതുപോലെ ഒമേഗ-3 ഫാറ്റി ആസിഡുകൾ കരളിൽ കൊഴുപ്പ് അടിഞ്ഞുകൂടുന്നത് തടയാൻ സഹായിക്കുന്നവയാണ്. മറ്റ് ജീവിതശൈലി മാറ്റങ്ങൾക്കൊപ്പം ഒമേഗ-3 കൂടി ഉൾപ്പെടുത്തുന്നത് ട്രൈഗ്ലിസറൈഡുകളുടെ അളവ് കുറയ്ക്കാനും കരളിലെ കൊഴുപ്പ് ഇല്ലാതാക്കാനും സഹായിക്കുമെന്ന് പഠനങ്ങൾ വ്യക്തമാക്കുന്നു.
സമീപകാലത്ത് ഏറെ ശ്രദ്ധിക്കപ്പെട്ട ഒന്നാണ് ‘ബെർബെറിൻ’ എന്ന സസ്യങ്ങളിൽ നിന്ന് വേർതിരിച്ചെടുക്കുന്ന ഘടകം. ഇത് ശരീരത്തിലെ ഇൻസുലിൻ പ്രതിരോധം, കൊഴുപ്പ് ഉപാപചയം, ഗ്ലൂക്കോസ് എന്നിവ നിയന്ത്രിക്കാൻ സഹായിക്കുന്നതിലൂടെ ഫാറ്റി ലിവർ കുറയ്ക്കാൻ ഫലപ്രദമാണെന്ന് കണ്ടെത്തിയിട്ടുണ്ട്. കൂടാതെ, ഓരോ നേരത്തെ ഭക്ഷണത്തിലും 30 മുതൽ 40 ഗ്രാം വരെ പ്രോട്ടീൻ ഉൾപ്പെടുത്താൻ ഡോക്ടർ നിർദ്ദേശിക്കുന്നു. ഇത് പേശികളുടെ ആരോഗ്യം നിലനിർത്താനും ഗ്ലൂക്കോസ് നിയന്ത്രണത്തിനും സഹായിക്കും. പേശീബലം കുറയുന്നത് ഫാറ്റി ലിവർ സാധ്യത കൂട്ടുമെന്നതിനാൽ പ്രോട്ടീൻ അടങ്ങിയ ഭക്ഷണം കഴിക്കുന്നത് കരളിന്റെ ആരോഗ്യത്തിന് പരോക്ഷമായി ഗുണം ചെയ്യും.
ഈ പട്ടികയിൽ ഏറ്റവും ലളിതമായ ശീലം ഭക്ഷണത്തിന് ശേഷമുള്ള നടത്തമാണ്. ഭക്ഷണത്തിന് ശേഷം അല്പസമയം നടക്കുന്നത് പേശികൾ ഗ്ലൂക്കോസ് വേഗത്തിൽ ഉപയോഗിക്കാൻ സഹായിക്കുകയും രക്തത്തിൽ പഞ്ചസാരയുടെ അളവ് പെട്ടെന്ന് കൂടുന്നത് തടയുകയും ചെയ്യും. ഇത് വഴി ഇൻസുലിന്റെ ആവശ്യകത കുറയുകയും കരളിൽ കൊഴുപ്പ് അടിഞ്ഞുകൂടുന്നത് തടയുകയും ചെയ്യും. അടിസ്ഥാനപരമായ ഈ ഭക്ഷണ സുരക്ഷാ രീതികളും ആരോഗ്യകരമായ ശീലങ്ങളും പിന്തുടരുന്നത് വഴി കരളിന്റെ ആരോഗ്യം പൂർണ്ണമായും സംരക്ഷിക്കാൻ സാധിക്കും.
