വാർദ്ധക്യത്തിൽ ആരോഗ്യം നിലനിര്ത്തണമെങ്കില് പോഷകാഹാരങ്ങള്ക്കൊപ്പം വ്യായാമവും ആവശ്യമാണ്. എന്നാൽ മാതാപിതാക്കളെയും മുത്തശ്ശീമുത്തശ്ശന്മാരെയും പതിവായി വ്യായാമം ചെയ്യാൻ പ്രേരിപ്പിക്കുന്നത് പലപ്പോഴും ബുദ്ധിമുട്ടേറിയ കാര്യമാണ്. ഫിറ്റ്നസ് കോച്ചായ ജോഷ്വ ടാൻ തന്റെ 63 വയസ്സുള്ള അമ്മയെ എങ്ങനെ ആരോഗ്യത്തോടെയിരിക്കാനും കൃത്യമായി വ്യായാമം ചെയ്യാനും പ്രേരിപ്പിച്ചു എന്ന് അടുത്തിടെ ഒരു ഇൻസ്റ്റാഗ്രാം വീഡിയോയിലൂടെ പങ്കുവെക്കുകയുണ്ടായി. പ്രായമാകുന്ന മാതാപിതാക്കൾക്ക് അവരുടെ ശാരീരിക ആരോഗ്യം നിലനിർത്താൻ സഹായിക്കുന്ന മൂന്ന് പ്രധാന വ്യായാമങ്ങളും അദ്ദേഹം ഇതിലൂടെ പരിചയപ്പെടുത്തി.
ഈ മൂന്ന് വ്യായാമങ്ങൾ പ്രായമായവർക്ക് യാതൊരു ബുദ്ധിമുട്ടും കൂടാതെ എഴുന്നേറ്റ് നിൽക്കാനും സാധനങ്ങൾ കൈകാര്യം ചെയ്യാനും സഹായിക്കുമെന്ന് കോച്ച് പറയുന്നു. കൂടാതെ ഇവ ചലനശേഷിയ്ക്ക് സഹായകരമാകുകയും ഗുരുതരമായ ആരോഗ്യപ്രശ്നങ്ങളുടെ സാധ്യത കുറയ്ക്കുകയും ചെയ്യും. മാതാപിതാക്കൾ 60-കളിൽ ഉള്ളവരാണെങ്കിൽ, 70-കളിലും അവർക്ക് സ്വന്തം കാര്യങ്ങൾ ആരുടെയും സഹായമില്ലാതെ ചെയ്യാൻ ഈ വ്യായാമങ്ങൾ ശീലമാക്കേണ്ടതുണ്ട്.
അദ്ദേഹം നിർദ്ദേശിക്കുന്ന ഒന്നാമത്തെ വ്യായാമം ‘സ്ക്വാറ്റ്സ്’ (Squats) ആണ്. പ്രായമാകുമ്പോൾ രാവിലെ കിടക്കയിൽ നിന്ന് നടുവേദനയോ മറ്റ് ബുദ്ധിമുട്ടുകളോ ഇല്ലാതെ എഴുന്നേൽക്കാൻ സ്ക്വാറ്റ്സ് ഏറെ അത്യാവശ്യമാണ്. രണ്ടാമത്തേത് ‘ഡെഡ്ലിഫ്റ്റ്’ (Deadlifts) ആണ്. നിലത്തുനിന്ന് സാധനങ്ങൾ കുനിഞ്ഞ് എടുക്കാൻ ശ്രമിക്കുമ്പോൾ നടുവേദന ഉണ്ടാകാതിരിക്കാൻ ഡെഡ്ലിഫ്റ്റുകൾ സഹായിക്കുമെന്ന് അദ്ദേഹം വിശദീകരിച്ചു. മൂന്നാമതായി നിർദ്ദേശിക്കുന്നത് ‘കാഫ് റെയ്സസ്’ (Calf Raises) ആണ്. ഇത് പ്രായമായവരിൽ ശരീരത്തിന്റെ സന്തുലിതാവസ്ഥ മെച്ചപ്പെടുത്താനും, അവർ പെട്ടെന്ന് വീണുപോകാനുള്ള സാധ്യത കുറയ്ക്കാനും സഹായിക്കുന്നു.
ഈ വ്യായാമങ്ങൾ ശരീരഭംഗിക്ക് വേണ്ടിയുള്ളതല്ല, മറിച്ച് മാതാപിതാക്കൾക്ക് പ്രായമാകുമ്പോഴും മറ്റുള്ളവരെ ആശ്രയിക്കാതെ ജീവിക്കാൻ വേണ്ടിയുള്ളതാണെന്ന് ഫിറ്റ്നസ് കോച്ച് വ്യക്തമാക്കുന്നു. ആരോഗ്യം വീണ്ടെടുക്കാൻ തുടങ്ങാൻ ഒരിക്കലും വൈകിക്കൂടാ. നമ്മൾ 50-കളിലോ 60-കളിലോ വ്യായാമം ചെയ്യാൻ തുടങ്ങിയാൽ, 70-കളിലും 80-കളിലും ആരുടെയും സഹായമില്ലാതെ ജീവിക്കാനുള്ള കരുത്ത് ഇപ്പോൾ തന്നെ കെട്ടിപ്പടുക്കാൻ സാധിക്കും. ശക്തമായ കാലുകൾ വ്യായാമത്തിന് മാത്രമല്ല, ദൈനംദിന ജീവിതത്തിനും അത്യാവശ്യമാണ്. ആത്മവിശ്വാസത്തോടെ നടക്കുക, പടികൾ കയറുക, സാധനങ്ങൾ ചുമക്കുക, വീഴാനുള്ള സാധ്യത കുറയ്ക്കുക എന്നിവയെല്ലാം കാലുകളുടെ ശക്തി നിലനിർത്തുന്നതിലൂടെയാണ് സാധ്യമാകുന്നത്.
