വേനൽക്കാലത്ത് ഏറെ ആശ്വാസം നൽകുന്ന ഒന്നാണ് തണുപ്പിച്ച തണ്ണിമത്തൻ. എന്നാൽ, തണ്ണിമത്തൻ കഴിക്കുന്നതുമായി ബന്ധപ്പെട്ട ചില സമീപകാല സംഭവങ്ങൾ ജനങ്ങളിൽ ആശങ്കയുണ്ടാക്കിയിട്ടുണ്ട്. തണ്ണിമത്തൻ സുരക്ഷിതമായ പഴമാണെന്നും എന്നാൽ അത് മുറിച്ചുകഴിഞ്ഞാൽ കൈകാര്യം ചെയ്യുന്ന രീതിയിൽ അതീവ ശ്രദ്ധ വേണമെന്നും വിദഗ്ധർ പറയുന്നു. തണ്ണിമത്തൻ ഫ്രിഡ്ജിൽ സൂക്ഷിച്ചു കഴിക്കുന്നത് സുരക്ഷിതമാണോ എന്ന ചോദ്യത്തിന് പോഷകാഹാര വിദഗ്ധർ നൽകുന്ന മറുപടി ശ്രദ്ധിക്കാം.
തണ്ണിമത്തൻ മുറിച്ചുകഴിഞ്ഞാൽ അതിൽ ബാക്ടീരിയകൾ വളരാൻ സാധ്യത കൂടുതലാണെന്ന് വിദഗ്ധർ ചൂണ്ടിക്കാട്ടുന്നു. ഇതിലെ ഉയർന്ന അളവിലുള്ള വെള്ളവും പഞ്ചസാരയും ബാക്ടീരിയകളുടെ വളർച്ചയ്ക്ക് അനുകൂലമായ സാഹചര്യമൊരുക്കുന്നു. പോഷകാഹാര വിദഗ്ധയായ രൂപാലി ദത്തയുടെ അഭിപ്രായത്തിൽ, ചൂടുകൂടുമ്പോൾ ബാക്ടീരിയകൾ പെരുകാൻ സാധ്യതയുള്ളതിനാൽ ശരിയായ രീതിയിൽ സൂക്ഷിച്ചില്ലെങ്കിൽ ഇത് ആരോഗ്യപ്രശ്നങ്ങൾക്ക് കാരണമാകും.
തണ്ണിമത്തൻ മുറിക്കുന്നതിന് മുമ്പ് നന്നായി കഴുകണമെന്നും മുറിച്ചാലുടൻ ഫ്രിഡ്ജിൽ വെക്കണമെന്നും അവർ നിർദ്ദേശിക്കുന്നു. മുറിച്ച കഷണങ്ങൾ കൂടുതൽ സമയം പുറത്തുവെക്കുന്നത് രോഗബാധയ്ക്കുള്ള സാധ്യത വർദ്ധിപ്പിക്കും. കുട്ടികൾക്കും പ്രതിരോധശേഷി കുറഞ്ഞവർക്കും ഇത് വേഗത്തിൽ അസ്വസ്ഥതയുണ്ടാക്കാം. തണ്ണിമത്തൻ കഴിച്ചശേഷം ഛർദ്ദിയോ മറ്റ് അസ്വസ്ഥതകളോ തോന്നിയാൽ ഉടൻ ചികിത്സ തേടണം.
തണ്ണിമത്തൻ സുരക്ഷിതമായി കഴിക്കാൻ ചില കാര്യങ്ങൾ ശ്രദ്ധിക്കാം. പുറംഭാഗത്ത് വിള്ളലുകളോ കേടുപാടുകളോ ഇല്ലാത്ത നല്ല പഴം നോക്കി വാങ്ങുക. മുറിക്കുന്നതിന് മുമ്പ് പുറംഭാഗം നന്നായി കഴുകണം. മുറിക്കാൻ ഉപയോഗിക്കുന്ന കത്തിയും കൈകളും വൃത്തിയുള്ളതായിരിക്കണം. കടകളിൽ മുറിച്ചു തുറന്നുവെച്ചിരിക്കുന്ന പഴങ്ങൾ വാങ്ങാതിരിക്കാൻ ശ്രദ്ധിക്കുക. മുറിച്ച കഷണങ്ങൾ വായു കടക്കാത്ത പാത്രത്തിലാക്കി ഫ്രിഡ്ജിൽ സൂക്ഷിക്കുകയും കുറഞ്ഞ സമയത്തിനുള്ളിൽ തന്നെ കഴിച്ചുതീർക്കുകയും വേണം. ശരിയായ ശുചിത്വം പാലിച്ചാൽ തണ്ണിമത്തൻ ഭയമില്ലാതെ ആസ്വദിക്കാവുന്നതാണ്.
