ചൂടുള്ള വേനൽക്കാലത്ത് തണ്ണിമത്തനും മത്തങ്ങയും കഴിക്കുന്നത് ശരീരത്തിന് ഏറെ ഉന്മേഷവും ജലാംശവും നൽകുന്ന ഒന്നാണ്. എന്നാൽ ഇവ കഴിച്ചയുടൻ വെള്ളം കുടിക്കുന്നത് ദഹനപ്രശ്നങ്ങൾക്ക് കാരണമാകുമെന്ന് പലരും വിശ്വസിക്കുന്നു. ഇതിൽ എത്രത്തോളം സത്യമുണ്ടെന്ന് നമുക്ക് നോക്കാം.
തണ്ണിമത്തൻ, മത്തങ്ങ എന്നിവ കഴിച്ചയുടൻ വെള്ളം കുടിക്കുന്നത് ദഹനത്തെ തടസ്സപ്പെടുത്തുമെന്നും വയറിൽ അസ്വസ്ഥതയുണ്ടാക്കുമെന്നും പൊതുവായ ഒരു ധാരണയുണ്ട്. ശാസ്ത്രീയമായി ഇത് വലിയ അപകടമുണ്ടാക്കുമെന്ന് തെളിവുകളൊന്നുമില്ലെങ്കിലും, ദഹനപ്രശ്നങ്ങളുള്ളവർക്കും സെൻസിറ്റീവ് ആയ വയറുള്ളവർക്കും ഇത് അസ്വസ്ഥതയുണ്ടാക്കാൻ സാധ്യതയുണ്ട്.
തണ്ണിമത്തനിൽ ഏകദേശം 92 ശതമാനവും മത്തങ്ങയിൽ 90 ശതമാനവും വെള്ളമാണ് അടങ്ങിയിരിക്കുന്നത്. ഇതിന് പുറമെ വീണ്ടും ധാരാളമായി വെള്ളം കുടിക്കുമ്പോൾ അത് വയറിലെ ദഹനരസങ്ങളെ ലയിപ്പിക്കുകയും ദഹനം സാവധാനത്തിലാക്കുകയും ചെയ്യുന്നു. ഇത് വയർ വീർക്കുന്നതിനും ഗ്യാസിനും അസിഡിറ്റിക്കും കാരണമായേക്കാം എന്ന് ഗ്യാസ്ട്രോ എൻട്രോളജി വിദഗ്ധർ ചൂണ്ടിക്കാട്ടുന്നു.
തണ്ണിമത്തനും മത്തങ്ങയും കഴിക്കുമ്പോൾ ചില കാര്യങ്ങൾ ശ്രദ്ധിക്കുന്നത് നല്ലതാണ്. എപ്പോഴും ഫ്രഷ് ആയ പഴങ്ങൾ മാത്രം കഴിക്കുക. മുറിച്ചുവെച്ച പഴങ്ങൾ ദീർഘനേരം പുറത്തുവെക്കരുത്, കാരണം ചൂടുള്ള കാലാവസ്ഥയിൽ ബാക്ടീരിയകൾ പെട്ടെന്ന് വളരാൻ സാധ്യതയുണ്ട്. പ്രമേഹമുള്ളവരും ദഹനപ്രശ്നങ്ങളുള്ളവരും മിതമായ അളവിൽ മാത്രം ഈ പഴങ്ങൾ കഴിക്കുക.
ഇവ കഴിക്കുന്നതിനൊപ്പം പാൽ, എണ്ണമയമുള്ള ഭക്ഷണങ്ങൾ എന്നിവ ഒഴിവാക്കുന്നതാണ് ഉചിതം. പഴങ്ങൾ കഴിച്ച ശേഷം വെള്ളം കുടിക്കാൻ ആഗ്രഹമുണ്ടെങ്കിൽ കുറഞ്ഞത് 30 മിനിറ്റ് എങ്കിലും ഇടവേള നൽകുന്നത് ദഹനം സുഗമമാക്കാൻ സഹായിക്കും. ഓരോ വ്യക്തിയുടെയും ദഹനശേഷി വ്യത്യസ്തമായതിനാൽ സ്വന്തം ശരീരത്തിന് അനുയോജ്യമായ രീതിയിൽ ഇത്തരം ഭക്ഷണശീലങ്ങൾ ക്രമീകരിക്കുന്നതാണ് ഏറ്റവും നല്ലത്.
