കാലിഫോർണിയയിലെ ഓക്സ്നാർഡ് എയർപോർട്ടിൽ നിന്നുള്ള ഒരു കൊച്ചു പൈലറ്റിന്റെ പരിശീലന വീഡിയോ ഇപ്പോൾ സമൂഹമാധ്യമങ്ങളിൽ തരംഗമാവുകയാണ്. ഋഷി ശർമ്മ എന്ന പതിനൊന്നുകാരനാണ് വിദഗ്ധനായ പൈലറ്റിനെപ്പോലെ വിമാനം നിയന്ത്രിച്ച് എല്ലാവരെയും അമ്പരപ്പിച്ചത്. വിമാനം റൺവേയിൽ ഇറക്കിയ ഉടൻ തന്നെ നിർത്താതെ വീണ്ടും പറന്നുയരുന്ന ‘ടച്ച് ആൻഡ് ഗോ’ എന്ന സങ്കീർണ്ണമായ രീതി വളരെ അനായാസമായാണ് ഈ മിടുക്കൻ കൈകാര്യം ചെയ്തത്. ഋഷിയുടെ കൃത്യതയെയും ആത്മവിശ്വാസത്തെയും പ്രശംസിച്ച ഇൻസ്ട്രക്ടർ, ഇതൊരു മികച്ച ലാൻഡിംഗ് ആണെന്ന് വീഡിയോയിൽ പറയുന്നത് കേൾക്കാം.
ഏഴാം വയസ്സു മുതൽ വിമാനം പറത്താൻ പരിശീലനം നടത്തുന്ന ഋഷിയുടെ അച്ചടക്കത്തെയും ഏകാഗ്രതയെയും സോഷ്യൽ മീഡിയ ഒന്നടങ്കം പുകഴ്ത്തുകയാണ്. ‘പല മുതിർന്നവർ വണ്ടി ഓടിക്കുന്നതിനേക്കാൾ മികച്ച രീതിയിലാണ് ഈ കുട്ടി വിമാനം പറത്തുന്നത്’ എന്നാണ് വീഡിയോ കണ്ടവർ കുറിക്കുന്നത്. കുട്ടികൾക്ക് ഇത്തരം യഥാർത്ഥ കഴിവുകളാണ് പകർന്നു നൽകേണ്ടതെന്ന് പലരും അഭിപ്രായപ്പെട്ടു.
നിലവിലെ നിയമങ്ങൾ അനുസരിച്ച് കൊമേഴ്സ്യൽ പൈലറ്റ് ലൈസൻസ് ലഭിക്കാൻ 18 വയസ്സ് തികയണമെങ്കിലും, പല ഫ്ലൈറ്റ് സ്കൂളുകളും കുട്ടികൾക്ക് വിദഗ്ധ മേൽനോട്ടത്തിൽ പ്രാഥമിക പരിശീലനം നൽകാറുണ്ട്. ശ്രദ്ധയും പെട്ടെന്ന് തീരുമാനമെടുക്കാനുള്ള കഴിവും വളർത്തിയെടുക്കാൻ ഇത്തരം പരിശീലനങ്ങൾ സഹായിക്കുമെന്ന് വിദഗ്ധർ പറയുന്നു. എന്തായാലും ആകാശത്തെ ഈ കുട്ടിത്താരത്തിന്റെ വീഡിയോ ഇപ്പോൾ ഇന്റർനെറ്റിൽ വലിയ ചർച്ചയായിരിക്കുകയാണ്.
