കുടുംബത്തിന്റെ സാമ്പത്തിക സഹായമില്ലാതെ, സ്വന്തം സമ്പാദ്യത്തിലൂടെ ഏകദേശം 10 ലക്ഷം സിംഗപ്പൂർ ഡോളർ (ഏകദേശം 7 കോടി രൂപ) വിലമതിക്കുന്ന ലക്ഷ്വറി അപ്പാർട്ട്മെന്റ് സ്വന്തമാക്കിയ 26-കാരിയുടെ വിശേഷം സോഷ്യൽ മീഡിയയിൽ വൈറലാകുന്നു.
ഫുൾ ടൈം പ്രൊഡ്യൂസറും കണ്ടന്റ് ക്രിയേറ്ററുമായ ക്രിസ് (Chris), ഡിസംബർ 20-ന് തന്റെ ടിക്ടോക് വീഡിയോയിലൂടെയാണ് ഈ നേട്ടം പങ്കുവെച്ചത്. ഇത് തന്റെ “സ്വപ്ന സാക്ഷാത്കാരം” ആണെന്ന് ക്രിസ് വിശേഷിപ്പിച്ചു. വീടിന്റെ താക്കോൽ കൈപ്പറ്റുന്ന ദിവസം വരെ തന്റെ കുടുംബാംഗങ്ങൾ പോലും ഈ വിവരമറിഞ്ഞിരുന്നില്ലെന്ന് അവർ പറഞ്ഞു.
“27 വയസ്സാകുമ്പോഴേക്കും സ്വന്തമായി ഒരു വീട് വാങ്ങണമെന്ന് ഞാൻ എപ്പോഴും ആഗ്രഹിച്ചിരുന്നു. 2025 അവസാനത്തോടെ ഞാനത് പൂർത്തിയാക്കി,” ക്രിസ് പറഞ്ഞു. ഏകദേശം 2,40,000 സിംഗപ്പൂർ ഡോളർ (ഏകദേശം 1.5 കോടി രൂപ) വരുന്ന ഡൗൺ പേയ്മെന്റ് പൂർണ്ണമായും പണമായാണ് (Cash) അവർ അടച്ചു തീർത്തത്.
‘മദർഷിപ്പിന്’ (Mothership) നൽകിയ അഭിമുഖത്തിൽ തന്റെ കഠിനാധ്വാനത്തെക്കുറിച്ച് ക്രിസ് മനസ്സ് തുറന്നു. ആഴ്ചയിൽ ഏഴ് ദിവസവും 12 മുതൽ 18 മണിക്കൂർ വരെ താൻ ജോലി ചെയ്യാറുണ്ടെന്ന് അവർ വെളിപ്പെടുത്തി. സ്ഥിരം ജോലിക്ക് പുറമെ ഫോട്ടോ-വീഡിയോ പ്രൊഡക്ഷൻ മേഖലയിൽ ഫ്രീലാൻസ് പ്രോജക്റ്റുകളും അവർ ഏറ്റെടുക്കാറുണ്ട്. ജിമ്മിൽ വർക്കൗട്ട് ചെയ്യുന്ന സമയത്ത് പോലും താൻ ജോലി ചെയ്യാറുണ്ടെന്ന് അവർ തമാശരൂപേണ പറഞ്ഞു.
14-ാം വയസ്സിൽ ജോലി ചെയ്ത് തുടങ്ങിയ ക്രിസ്, 19-ാം വയസ്സിൽ നിക്ഷേപങ്ങൾ ആരംഭിച്ചിരുന്നു. നേരത്തെയുള്ള തുടക്കം, കണിശമായ അച്ചടക്കം, സാമ്പത്തിക ഭദ്രതയ്ക്കായുള്ള തീവ്രമായ ആഗ്രഹം എന്നിവയാണ് തന്റെ വിജയത്തിന് പിന്നിലെന്ന് അവർ വിശ്വസിക്കുന്നു. ചിലവുകൾ കൃത്യമായി രേഖപ്പെടുത്തിയും, പണം ലാഭിക്കാനായി 3 ഡോളറിന്റെ ലഘുഭക്ഷണം കഴിച്ച് ജീവിച്ചും വളരെ മിതവ്യയത്തോടെയാണ് അവർ മുന്നോട്ട് പോയത്.
അമ്മ പകർന്നുനൽകിയ ‘സ്വയംപര്യാപ്തത’ എന്ന പാഠമാണ് തന്റെ കരുത്തെന്നും സിംഗപ്പൂരിൽ സ്വന്തമായി ഒരു വീടുള്ളത് തനിക്ക് സുരക്ഷിതബോധം നൽകുന്നുവെന്നും ക്രിസ് കൂട്ടിച്ചേർത്തു.
