പ്രണയബന്ധങ്ങൾ പലപ്പോഴും വിശ്വാസത്തിന്റെയും വികാരങ്ങളുടെയും വിശ്വസ്തതയുടെയും വാഗ്ദാനങ്ങളാൽ നിറഞ്ഞതാണ്. എന്നാൽ, ചില ഞെട്ടിക്കുന്ന സംഭവങ്ങൾ ഏറ്റവും അടുത്ത ബന്ധങ്ങളിൽ നിന്ന് പോലും വഞ്ചനയുണ്ടാകാമെന്ന് നമ്മെ ഓർമ്മിപ്പിക്കുന്നു.
17 വയസ്സുള്ള ഒരു പെൺകുട്ടി തന്റെ 19 വയസ്സുള്ള കാമുകനെ മ്യാൻമറിലെ ഒരു ഓൺലൈൻ തട്ടിപ്പ് സംഘത്തിന് 110,000 യുവാൻ (ഏകദേശം 11 ലക്ഷം രൂപ) ന് വിറ്റ സംഭവം ചൈനയിൽ നിന്ന് അന്താരാഷ്ട്ര ശ്രദ്ധ നേടിയിരിക്കുകയാണ്. ഡെയ്ലി സ്റ്റാറിൽ പ്രസിദ്ധീകരിച്ച റിപ്പോർട്ടുകൾ അനുസരിച്ച്, ചൈനയിലെ ഗ്വാങ്ഡോങ് പ്രവിശ്യയിലെ ഷാൻജിയാങ് എന്ന സ്ഥലത്താണ് സംഭവം നടന്നത്.
കൗമാരക്കാരായ ഈ യുവതീയുവാക്കള് പ്രണയത്തിലായിരുന്നു, എന്നാൽ സാധാരണമായ ഒരു കൗമാര പ്രണയം അപ്രതീക്ഷിതമായ വഴിത്തിരിവിലേക്ക് നീങ്ങി. ബന്ധത്തിന് വില കൽപിക്കുന്നതിന് പകരം, യുവതി കാമുകനെ പണത്തിനായി വിൽക്കാൻ പദ്ധതിയിട്ടതായി ആരോപിക്കപ്പെടുന്നു.”ഹണി ട്രാപ്പ്” പോലെയാണിതെന്ന് അധികാരികളും പ്രാദേശിക മാധ്യമങ്ങളും പറയുന്നു.
കുടുംബ ബിസിനസ്സിലെ അവസരങ്ങളെക്കുറിച്ച് പറഞ്ഞാണ് യുവതി 19-കാരനെ ആകർഷിച്ചത്. അവളുടെ വാക്കുകൾ വിശ്വസിച്ച്, യുവാവ് അവളോടൊപ്പം പോവുകയായിരുന്നു, എന്നാൽ അവനെ മ്യാൻമറിൽ പ്രവർത്തിക്കുന്ന ഒരു കുപ്രസിദ്ധ സൈബർ ക്രൈം സിൻഡിക്കേറ്റിന് കൈമാറി. മ്യാൻമറിൽ എത്തിച്ച ശേഷം യുവാവിന് ഭീകരമായ സാഹചര്യങ്ങളാണ് നേരിടേണ്ടി വന്നത്.
പട്ടിണിയിലാക്കി, ക്രൂരമായി മർദ്ദിച്ച് സൈബർ തട്ടിപ്പ് പ്രവർത്തനങ്ങളിൽ ഏർപ്പെടാൻ നിർബന്ധിച്ചതായി റിപ്പോർട്ടുകൾ പറയുന്നു. ദിവസവും 20 മണിക്കൂർ വരെ ജോലി ചെയ്യാൻ നിർബന്ധിച്ച് ഓൺലൈൻ തട്ടിപ്പുകളിലൂടെ ആളുകളെ പറ്റിക്കാൻ സംഘം അവനെ ഉപയോഗിച്ചു. ക്രൂരമായ പീഡനം അവന്റെ ശരീരത്തിലും മനസ്സിലും കടുത്ത മുറിപ്പാടുകൾ ഉണ്ടാക്കി. അവന്റെ ഭാരം ഗണ്യമായി കുറഞ്ഞെന്നും തുടർച്ചയായ പീഡനം കാരണം കേൾവിശക്തി ഏതാണ്ട് നശിച്ചെന്നും കുടുംബം വെളിപ്പെടുത്തി.
സംഭവം അറിഞ്ഞപ്പോൾ, യുവാവിന്റെ കുടുംബം മകനെ രക്ഷിക്കാൻ വേണ്ടി തട്ടിപ്പുകാരുമായി നേരിട്ട് ബന്ധപ്പെട്ടു. മകനെ മോചിപ്പിക്കാനായി വലിയ തുക മോചനദ്രവ്യമായി ആവശ്യപ്പെട്ടതായി യുവാവിന്റെ സഹോദരി പറഞ്ഞു. ഒടുവിൽ, മോചനദ്രവ്യമായി 350,000 യുവാൻ (ഏകദേശം 42 ലക്ഷം രൂപ) നൽകിയതിന് ശേഷമാണ് യുവാവിന് ചൈനയിലേക്ക് മടങ്ങാൻ കഴിഞ്ഞത്. ഇരുമ്പ് ദണ്ഡ് ഉപയോഗിച്ച് അവന്റെ ചെവിക്കും ഇടുപ്പിലും മർദ്ദിച്ചിരുന്നതായി സഹോദരി മാധ്യമങ്ങളോട് പറഞ്ഞു.
പീഡനം കാരണം അവന്റെ ആരോഗ്യവും ആത്മവിശ്വാസവും പൂർണ്ണമായും തകർന്നെന്നും അവർ കൂട്ടിച്ചേർത്തു. കൂടുതൽ ഞെട്ടിക്കുന്ന കാര്യം, ഈ കുറ്റകൃത്യത്തിൽ യുവാവിന്റെ കാമുകിക്ക് പങ്കുണ്ടെന്നതാണ്. യുവാവിനെ രക്ഷപ്പെടുത്തി ദിവസങ്ങൾക്കകം, കുറ്റകൃത്യത്തിലെ പങ്കിന് 17 വയസ്സുള്ള പെൺകുട്ടിയെ പോലീസ് അറസ്റ്റ് ചെയ്തു.
ആളുകളെ തട്ടിയെടുക്കുകയും വഞ്ചനാപരമായ ഓൺലൈൻ പ്രവർത്തനങ്ങളിൽ ഏർപ്പെടാൻ നിർബന്ധിക്കുകയും ചെയ്യുന്ന ക്രിമിനൽ സംഘങ്ങളുടെ കേന്ദ്രമായി മ്യാൻമർ മാറിയിരിക്കുന്നു.
അന്വേഷണം തുടരവെ, രക്ഷപ്പെടുത്തിയ യുവാവ് ഇപ്പോൾ കുടുംബത്തോടൊപ്പം സുഖം പ്രാപിച്ചുവരികയാണ്. എന്നാൽ, വഞ്ചനയുടെയും ദുരുപയോഗത്തിന്റെയും മുറിവുകൾ ഉണങ്ങാൻ ഇനിയും ഏറെ സമയമെടുക്കും.
