ഇന്ത്യയും ഓസ്‌ട്രേലിയയും തമ്മിലുള്ള ഹൈവോള്‍ട്ടേജ് മത്സരത്തില്‍ സന്ദര്‍ശകരായി ഇന്ത്യയ്ക്ക് തുടക്കത്തിലേ തിരിച്ചടി. ആദ്യ രണ്ടു ടെസ്റ്റുകള്‍ ഇന്ത്യയുടെ സൂപ്പര്‍താരത്തിന് നഷ്ടമാകും. ഇക്കാര്യം ഇന്ത്യന്‍ ക്രിക്കറ്റ്‌ബോര്‍ഡിനെ താരം അറിയിക്കുകയും ചെയ്തിട്ടുണ്ട്. അതേസമയം ഇക്കാര്യം ബിസിസിഐ ഇതുവരെ ഉറപ്പാക്കിയിട്ടില്ല. എന്നാല്‍ സാഹചര്യം ഇന്ത്യന്‍താരം ബോര്‍ഡിന് മുന്നില്‍ വ്യക്തമാക്കിയിട്ടുണ്ട്.
ഓസ്ട്രേലിയയില് ഇന്ത്യ അഞ്ചു ടെസ്റ്റ്മത്സരങ്ങളാണ് കളിക്കുക. ലോക ടെസ്റ്റ് ചാംപ്യന്‍ഷിപ്പില്‍ പോയിന്റ്‌നിലയുമായി ബന്ധപ്പെട്ടിരിക്കുന്നതിനാല്‍ ഇന്ത്യയ്ക്ക് ഈ ടെസ്റ്റ് പരമ്പര അതീവ ഗൗരവമുള്ളതാണ്. ഇതില്‍ ആദ്യ മത്സരം പെര്‍ത്തില്‍ നവംബര്‍ 22 നാണ്. രണ്ടാം മത്സരം അഡ്‌ലെഡില്‍ ഡിസംബര്‍ 6-10 വരെ നടക്കും. അടുത്തിടെ ബംഗ്‌ളാദേശിനെതിരേയുള്ള പരമ്പരയിലെ രണ്ടു മത്സരങ്ങളില്‍ ഇന്ത്യന്‍ നായകന്‍ കളിച്ചിരുന്നു. ഇതിന് പിന്നാലെ അടുത്തയാഴ്ച ന്യൂസിലന്റിനെതിരേയും ഇന്ത്യയ്ക്ക് മൂന്ന് മത്സരങ്ങളുടെ ടെസ്റ്റ് പരമ്പരയുണ്ട്.
ഓസ്ട്രേലിയയില് ഒരു ടെസ്റ്റ് മത്സരം രോഹിത് നഷ്ടപ്പെടുകയാണെങ്കില്‍, ഫോമിലുള്ള അഭിമന്യു ഈശ്വരന്‍ അദ്ദേഹത്തിന്റെ കവര്‍ ആകാന്‍ സാധ്യതയുണ്ട്, എന്നിരുന്നാലും ഓപ്പണിംഗ് സ്ലോട്ടില്‍ വേണ്ടത്ര പരിചയസമ്പന്നരായ കളിക്കാരാണ് ശുഭ്മാന്‍ ഗില്ലും കെഎല്‍ രാഹുലും. താന്‍ നയിക്കേണ്ട ഇന്ത്യ എ ടീമിനൊപ്പം ഈശ്വരനും ഓസ്ട്രേലിയയിലുണ്ടാകും. എന്നിരുന്നാലും, അടുത്തിടെ ബംഗ്ലാദേശിനെതിരായ ഹോം പരമ്പരയില്‍ രോഹിത്തിന് ഔദ്യോഗിക ഡെപ്യൂട്ടി ഇല്ലാതിരുന്നതിനാല്‍ ടെസ്റ്റ് ടീമിന്റെ വൈസ് ക്യാപ്റ്റന്‍ ആരായിരിക്കുമെന്ന് ഒരു വിവരവുമില്ല.
