കര്‍ണാടകയിലെ ബാഗല്‍കോട്ട് ജില്ലയില്‍ കൈകളില്‍ 13 വിരലുകളും കാലില്‍ 12 വിരലുകളുമുള്ള കുഞ്ഞു ജനിച്ചു. മെഡിക്കല്‍ സയന്‍സിനെ അത്ഭുതപ്പെടുത്തി അസാധാരണമായൊരു കുഞ്ഞു ജന്മം. കൈകാലുകളിലായി 25 വിരലുകളുള്ള ആണ്‍കുട്ടിയാണ് ജനിച്ചത്. ഇതൊരു ദൈവാനുഗ്രഹമാണെന്ന് കുട്ടിയുടെ കുടുംബം വിശ്വസിക്കുന്നു.
കുഞ്ഞിന് വലതു കൈയില്‍ ആറ് വിരലുകളും ഇടതു കൈയില്‍ ഏഴ് വിരലുകളും ഓരോ കാലിലും ആറ് വിരലുകളും ഉണ്ട്. അതേസമയം കുഞ്ഞിന്റെയും അമ്മയായ 35 കാരിയായ ഭാരതിയുടെയും ആരോഗ്യനില തൃപ്തികരമാണെന്നാണ് റിപ്പോര്‍ട്ട്.
ആരോഗ്യമുള്ള ആണ്‍കുഞ്ഞിനെ ലഭിച്ചതില്‍ മാതാവ് ഭാരതി സന്തോഷം പ്രകടിപ്പിച്ചു. പുതിയ കുഞ്ഞിന്റെ വരവില്‍ കുടുംബത്തിന്റെ സന്തോഷം പറഞ്ഞുകൊണ്ട് പിതാവ് ഗുരപ്പ കോണൂര്‍ ഭാരതിയ്‌ക്കൊപ്പം തന്റെ വികാരം പങ്കുവച്ചു.
ശിശുക്കളില്‍ അധിക വിരലുകളും കാല്‍വിരലുകളും ഉണ്ടാകുന്ന അപൂര്‍വത ഭാഗ്യമായിട്ടാണ് പലരും എടുക്കുന്നതെങ്കിലും ഇതൊരു ജനിതക വൈകല്യമായിട്ടാണ് ശാസ്ത്രം എടുക്കുന്നത്. പോളിഡാക്റ്റിലി എന്നാണ് ഈ അവസ്ഥ അറിയപ്പെടുന്നത്.
