മൃഗങ്ങളുടെ തുകലിനു പകരമാകാന് ബയോലെതറിന് കഴിയുമോ? ഷൂസും ബെല്റ്റും ചെരിപ്പുകളുമൊക്കെയായുള്ള പരമ്പരാഗത തുകല് വ്യവസായത്തില് മൃഗങ്ങളുടെ തോലിന്റെ സ്ഥാനം ഇനി തക്കാളി മാലിന്യം കയ്യേറുകയാണ്. തക്കാളി മാലിന്യം പരിസ്ഥിതി സൗഹൃദ ബയോലെതര് ആക്കി മാറ്റിക്കൊണ്ട് പ്രതേഷ് മിസ്ത്രിയുടെ ബയോ കമ്പനി ഈ ചോദ്യത്തിന് ഉത്തരം നല്കുന്നു.
തക്കാളിയില് നിന്ന് നിര്മ്മിച്ച ഷൂസും ബാഗുകളും നിര്മ്മിച്ച കമ്പനി 2021ലെ പെറ്റ വീഗന് ഫാഷന് അവാര്ഡില് ടെക്സ്റ്റൈല് രംഗത്തെ മികച്ച ഇന്നൊവേഷനായി തെരഞ്ഞെടുക്കപ്പെട്ടു. കമ്പനിയുടെ സ്ഥാപകനായ 26 കാരനായ പ്രതേഷ് മിസ്ത്രി തക്കാളി മാലിന്യങ്ങളെ ഫാഷനബിള് ഉല്പ്പന്നങ്ങളാക്കി മാറ്റുമ്പോള്, സസ്യ വസ്തുക്കളില് നിന്ന് നിര്മ്മിച്ച ബയോലെതര് ജനപ്രീതി നേടുകയാണ്.
പ്രതിവര്ഷം 44 ദശലക്ഷം ടണ് തക്കാളി ഉല്പ്പാദിപ്പിക്കുന്ന രണ്ടാമത്തെ വലിയ ഉല്പ്പാദക രാജ്യമായ ഇന്ത്യ, അതിന്റെ 30-35% പാഴാകുമെന്ന വെല്ലുവിളി നേരിടുന്നു. ഈ സാഹചര്യത്തിലാണ് താന് പാഴാക്കി കളയുന്ന തക്കാളിപ്പഴം തിരഞ്ഞെടുത്തതെന്ന് മിസ്ത്രി വിശദീകരിക്കുന്നു. തക്കാളിയുടെ തൊലിയും വിത്തുകളുമാണ്, ബയോലെതറിന്റെ അസംസ്കൃത വസ്തുക്കള് . കൂടാതെ, തക്കാളിയില് പ്രകൃതിദത്ത പോളിമറായ പെക്റ്റിന് അടങ്ങിയിട്ടുണ്ടെന്നും ഇത് വഴക്കവും ശക്തിയും വര്ദ്ധിപ്പിക്കുമെന്നും മിസ്ത്രി പറയുന്നു. അവയുടെ നാരുകളുള്ള ഘടനയും പ്രകൃതിദത്ത എണ്ണകളും ബയോഡീഗ്രേഡബിലിറ്റിയും തുകല് പോലെയുള്ള ഘടനയും മികവ് ഉറപ്പാക്കുന്നു.
മുംബൈ ആസ്ഥാനമായുള്ള തഡോമല് ഷഹാനി എഞ്ചിനീയറിംഗ് കോളേജില് നിന്ന് ബയോടെക്നോളജിയില് ബിരുദം നേടിയ മിസ്ത്രിയുടെ അവസാന വര്ഷ പ്രോജക്ടായിരുന്നു തക്കാളിയില് നിന്നുള്ള ബയോലെതര്. കാണ്പൂരിലെ തുകല് വ്യവസായത്തിന്റെ പരിസ്ഥിതി മലിനീകരണമാണ് അദ്ദേഹത്തെ ഇതിലേക്ക് നയിച്ചത്. ഫാമുകള് സന്ദര്ശിച്ചപ്പോള് അവിടെ ഉല്പ്പാദിപ്പിക്കപ്പെടുന്ന ഭക്ഷ്യ മാലിന്യത്തിന്റെ അമ്പരപ്പിക്കുന്ന അളവ് കാണുകയും ചെയ്തു. ഇതാണ് പരമ്പരാഗത തുകലിന് പകരമുള്ള പരിസ്ഥിതി സൗഹൃദ ബദലിലേക്ക് മിസ്ത്രിയെ എത്തിച്ചത്.
2019-ല് അതിന്റെ ആദ്യ ഉല്പ്പന്നമായ ‘ഒറിജിനല് ബയോലെതര്’ ആരംഭിച്ചു. മഹാരാഷ്ട്ര, ഗുജറാത്ത്, മധ്യപ്രദേശ് തുടങ്ങി തക്കാളി സമൃദ്ധമായി വളരുന്ന പ്രദേശങ്ങളിലെ പ്രാദേശിക ഭക്ഷ്യ സംസ്കരണ യൂണിറ്റുകളില് നിന്നുമാണ് ടിബിസി തക്കാളി മാലിന്യങ്ങള് ശേഖരിച്ചത്. സൂറത്തിലെ പ്ലാന്റില്, തക്കാളി ഉപോല്പ്പന്നങ്ങള്, ബയോപോളിമറുകള്, സസ്യ അധിഷ്ഠിത ബൈന്ഡറുകള്, പ്രകൃതിദത്ത നാരുകള് എന്നിവ സംയോജിപ്പിച്ച് ബയോലെതര് നിര്മ്മിക്കുന്നു. ഈ ഘടകങ്ങള് മിശ്രണം ചെയ്ത ശേഷം, ഈടുനില്ക്കുന്ന, തുകല് പോലുള്ള ഘടന നേടുന്നതിന് വിഷരഹിതമായ ക്യൂറിംഗ് നടത്തും. സസ്യാധിഷ്ഠിതമായ ഒരു അന്തിമ കോട്ടിംഗ് ജല പ്രതിരോധവും ഈടും വര്ദ്ധിപ്പിക്കുന്നു.
ഫാഷന്, ആക്സസറികള്, ഓട്ടോമോട്ടീവ് മേഖല തുടങ്ങിയവയാണ് ബയോലെതറിന്റെ ആദ്യകാല സ്വീകര്ത്താക്കള്. നിരവധി സുസ്ഥിര ബ്രാന്ഡുകള് ഉല്പ്പന്നത്തെ ജാക്കറ്റുകള്, ബാഗുകള്, പാദരക്ഷകള് എന്നിവയാക്കി മാറ്റുന്നു. ഓട്ടോമോട്ടീവ് വ്യവസായത്തില്, ചില ബ്രാന്ഡുകള് അപ്ഹോള്സ്റ്ററി, ഇന്റീരിയര് ഡിസൈന് എന്നിവയ്ക്കായി ബയോലെതര് ഉപയോഗിക്കുന്നുണ്ടെന്നും പരമ്പരാഗത ലെതറിന് പകരം ഒരു ബദലാണിതെന്നും മിസ്ട്രി പറയുന്നു. നിലവില്, ടിബിസി സൂറത്ത് ആസ്ഥാനമായുള്ള പ്ലാന്റില് പ്രതിമാസം 5,000 മീറ്റര് ബയോലെതര് നിര്മ്മിക്കുന്നു.
