വോട്ട് രേഖപ്പെടുത്തുക എന്നാൽ സാധാരണയായി പോളിംഗ് ബൂത്തിൽ പോവുക എന്നാണ് അർത്ഥമാക്കുന്നത്. എന്നാൽ നാസയിലെ ബഹിരാകാശയാത്രികരെ സംബന്ധിച്ചിടത്തോളം ഭൂമിക്ക് 400 കിലോമീറ്റർ മുകളിലെ ഗുരുത്വാകർഷണമില്ലാത്ത അന്തരീക്ഷത്തിൽ നിന്നാണ് വോട്ട് ചെയ്യുന്നത്.
ഇന്ത്യൻ വംശജനായ ബഹിരാകാശയാത്രികൻ അനിൽ മേനോനും മറ്റ് രണ്ട് അമേരിക്കൻ ക്രൂ അംഗങ്ങളും അന്താരാഷ്ട്ര ബഹിരാകാശ നിലയത്തിൽ (ISS) നിന്ന് നിലവിലുള്ള യുഎസ് ഇടക്കാല തിരഞ്ഞെടുപ്പിൽ വിജയകരമായി വോട്ട് രേഖപ്പെടുത്തി.
പൂർണ്ണമായും ഡിജിറ്റൽ പ്രക്രിയയിലൂടെയാണ് ഈ വോട്ടിംഗ് നടക്കുന്നത്. ബഹിരാകാശ നിലയത്തിലുള്ള ക്രൂ അംഗങ്ങൾക്ക് ഒരു സുരക്ഷിത ഇലക്ട്രോണിക് ബാലറ്റ് ലഭിക്കുന്നു. അവർ അത് സ്റ്റേഷനിലെ ലാപ്ടോപ്പിൽ പൂരിപ്പിച്ച്, നാസയുടെ സുരക്ഷിതമായ കമ്മ്യൂണിക്കേഷൻ സിസ്റ്റം വഴി ഭൂമിയിലുള്ള തിരഞ്ഞെടുപ്പ് ഉദ്യോഗസ്ഥർക്ക് അയച്ചു നൽകുന്നു.
ചൊവ്വാഴ്ച എക്സിൽ (X) പങ്കുവെച്ച വീഡിയോയിലൂടെ അനിൽ മേനോൻ ഈ വേറിട്ട വോട്ടിംഗ് അനുഭവം പങ്കുവെച്ചു. തന്റെ മുറിയെ ഒരു താത്കാലിക വോട്ടിംഗ് ബൂത്താക്കി മാറ്റിയാണ് ടെക്സസിലെ ഇടക്കാല തിരഞ്ഞെടുപ്പിൽ വോട്ട് ചെയ്തതെന്ന് അദ്ദേഹം പറഞ്ഞു. ബഹിരാകാശത്ത് നിന്നും വോട്ട് ചെയ്യാൻ സാധിക്കുമെന്നും മൂന്ന് യുഎസ് അംഗങ്ങളും ഈ അവസരം വിനിയോഗിച്ചെന്നും അദ്ദേഹം വ്യക്തമാക്കി.
സോഷ്യൽ മീഡിയയിൽ തരംഗമായ ഈ വീഡിയോയ്ക്ക് നിരവധി രസകരമായ പ്രതികരണങ്ങളാണ് ലഭിക്കുന്നത്. “മൂന്ന് പേർ ബഹിരാകാശത്ത് നിന്ന് വോട്ട് ചെയ്തു, എന്നാൽ ഇന്നലെ ഞാൻ തൊട്ടടുത്തിരിക്കുന്ന ലാപ്ടോപ്പുമായി പ്രിന്റർ ബന്ധിപ്പിക്കാൻ 40 മിനിറ്റാണ് പാടുപെട്ടത്” എന്നായിരുന്നു ഒരു ഉപയോക്താവിന്റെ തമാശ നിറഞ്ഞ കമന്റ്.
ബഹിരാകാശത്ത് നിന്നുള്ള വോട്ടിംഗ് ഇതൊരു പുതിയ സംഭവമല്ല. 1997-ൽ ടെക്സസ് നിയമസഭ ഇതിനായുള്ള ബില്ല് പാസാക്കിയതുമുതൽ നാസ ഈ സൗകര്യം ഒരുക്കുന്നുണ്ട്. 1997-ൽ മിർ ബഹിരാകാശ നിലയത്തിലായിരുന്ന ഡേവിഡ് വോൾഫ് ആണ് ആദ്യമായി ബഹിരാകാശത്ത് നിന്ന് വോട്ട് ചെയ്ത അമേരിക്കക്കാരൻ. ദീർഘകാല ബഹിരാകാശ ദൗത്യങ്ങളിൽ ഏർപ്പെടുന്നവർക്ക് വോട്ടവകാശം നിഷേധിക്കപ്പെടാതിരിക്കാനാണ് ഈ സംവിധാനം.
