പഠിച്ച വിഷയവുമായി ബന്ധമില്ലാത്ത ഒരു മേഖലയിൽ തുടക്കത്തിൽ നിന്ന് ജോലി ആരംഭിക്കുക എന്നത്, പ്രത്യേകിച്ച് കരിയർ മാറ്റുന്നത് വളരെ ബുദ്ധിമുട്ടേറിയ കാര്യമാണ്. ജോലി ഉപേക്ഷിക്കാൻ സാമ്പത്തികമായി കഴിയാത്തവർക്ക് ജോലിയും പഠനവും സാമ്പത്തിക കാര്യങ്ങളും ഒരുമിച്ച് കൊണ്ടുപോകുക എന്നത് അതിലും പ്രയാസകരമാണ്. മെക്കാനിക്കൽ എൻജിനീയറിങ് രംഗത്തുനിന്ന് സോഫ്റ്റ്‌വെയർ എൻജിനീയറിങ് മേഖലയിലേക്ക് മാറി ഒടുവിൽ 670 ശതമാനം ശമ്പള വർദ്ധനവ് നേടിയ അജയ് തനാജി പാട്ടീൽ അത്തരത്തിലുള്ള വെല്ലുവിളികളാണ് തരണം ചെയ്തത്.
സെപ്റ്റിബായ് ഫുലെ പൂനെ യൂണിവേഴ്സിറ്റിയിൽ നിന്ന് 2023 ഓഗസ്റ്റിലാണ് പാട്ടീൽ മെക്കാനിക്കൽ എൻജിനീയറിങ് ബിരുദം പൂർത്തിയാക്കിയത്. കോഡിങ്ങിന്റെ പശ്ചാത്തലം ഒന്നും ഇല്ലായിരുന്നെങ്കിലും സോഫ്റ്റ്‌വെയർ എൻജിനീയറിങ് മേഖലയിൽ കരിയർ കെട്ടിപ്പടുക്കാൻ അദ്ദേഹം ആഗ്രഹിച്ചു. തുടർന്ന് മുഴുവൻ സമയ ജോലിയോടൊപ്പം 2023-ൽ അദ്ദേഹം സ്കേലർ (Scaler) എന്ന എഐ-നേറ്റീവ് സ്കില്ലിംഗ് കമ്പനിയിൽ ചേർന്നു. പഠനത്തിനായി അദ്ദേഹം വിദ്യാഭ്യാസ വായ്പയും എടുത്തിരുന്നു. അതിനാൽ പുതിയ കഴിവുകൾ നേടുന്നതിനൊപ്പം വരുമാനം കണ്ടെത്തേണ്ടതും അദ്ദേഹത്തിന് അത്യാവശ്യമായിരുന്നു.
അഞ്ചാം വയസ്സിൽ അച്ഛൻ നഷ്ടപ്പെട്ട പാട്ടീലിനെ ഒറ്റയ്ക്കാണ് അമ്മ മംഗൽഭായ് തനാജി പാട്ടീൽ വളർത്തിയത്. 15 വർഷത്തിലേറെയായി സ്കൂൾ അധ്യാപകയായി ജോലി ചെയ്യുകയും കുടുംബത്തെ സഹായിക്കാനും തന്റെ വിദ്യാഭ്യാസം തുടരാനുമായി തയ്യൽ ജോലി ചെയ്യുകയും ചെയ്തു. സാമ്പത്തിക ബുദ്ധിമുട്ടുകൾക്കിടയിലും പൂനെയിൽ നിന്ന് ഡിപ്ലോമ പൂർത്തിയാക്കിയ അദ്ദേഹം മെക്കാനിക്കൽ എൻജിനീയറിങ് പഠനത്തിന് ചേരുകയും ചെയ്തു. ബിരുദപഠനത്തിനിടയിൽ 18-ാം വയസ്സിൽ ടാറ്റ കൺസൾട്ടൻസി എൻജിനീയേഴ്സിൽ ഡിസൈൻ എൻജിനീയറായി ജോലി ആരംഭിച്ചു. ബിരുദ പഠനത്തിന് ശേഷം മറ്റൊരു കമ്പനിയിലേക്ക് മാറിയെങ്കിലും സോഫ്റ്റ്‌വെയർ എൻജിനീയറിങ് രംഗത്തേക്ക് മാറണമെന്ന ദൃഢനിശ്ചയം അദ്ദേഹം ഉപേക്ഷിച്ചില്ല.
മുഴുവൻ സമയ പഠനത്തിനായി ജോലി ഉപേക്ഷിക്കുന്നത് സാമ്പത്തികമായി സാധ്യമല്ലാത്തതിനാൽ, ജോലിയുടെ ഷിഫ്റ്റുകൾക്കനുസരിച്ച് പഠനം ക്രമീകരിക്കേണ്ടി വന്നു. ഒഴിവുസമയങ്ങളിൽ ക്ലാസുകളിൽ പങ്കെടുക്കുകയും ജോലിക്കൊപ്പം തന്നെ അസൈൻമെന്റുകൾ പൂർത്തിയാക്കുകയും ചെയ്തു. സോഫ്റ്റ്‌വെയർ എൻജിനീയറിങ് രംഗത്തേക്ക് മാറാൻ താൻ ആഗ്രഹിച്ചിരുന്നുവെന്നും എന്നാൽ ഷിഫ്റ്റ് ജോലികൾ കാരണം പഠിക്കാൻ സമയം കണ്ടെത്തുന്നത് എളുപ്പമായിരുന്നില്ലെന്നും പാട്ടീൽ പറഞ്ഞു. ലൈവ് ക്ലാസുകളിൽ പങ്കെടുക്കാനും സാധിക്കാത്ത സമയങ്ങളിൽ റെക്കോർഡ് ചെയ്ത സെഷനുകളെ ആശ്രയിക്കാനും സ്കേലർ തനിക്ക് അവസരം നൽകിയെന്നും അദ്ദേഹം കൂട്ടിച്ചേർത്തു.
ജോലിക്കൊപ്പം പഠനവും മുന്നോട്ട് കൊണ്ടുപോയ അദ്ദേഹം വിദ്യാഭ്യാസ വായ്പയുടെ തിരിച്ചടവും തുടർന്നുവന്നു. സാങ്കേതിക വിദ്യാരംഗത്തെ തൊഴിൽ വിപണിയിലുണ്ടായ മാന്ദ്യം കാരണം പ്ലേസ്‌മെന്റ് ലഭിക്കുന്നത് വൈകിയതിനാൽ കരിയർ മാറ്റം പ്രതീക്ഷിച്ചതിലും കൂടുതൽ സമയം എടുത്തു. എങ്കിലും അദ്ദേഹം തന്റെ സാങ്കേതിക കഴിവുകൾ മെച്ചപ്പെടുത്തുന്നത് തുടർന്നു. ഒടുവിൽ ഇപിഎഎം സിസ്റ്റംസിൽ (EPAM Systems) തനിക്ക് ആദ്യമായി സോഫ്റ്റ്‌വെയർ എൻജിനീയറിങ് ജോലി ലഭിച്ചു.
ഈ ജോലി അദ്ദേഹത്തിന്റെ കരിയർ മാറ്റത്തിലെ സുപ്രധാന ചുവടുവെപ്പായിരുന്നു. തുടർന്നും പഠനം തുടർന്ന അദ്ദേഹം ഒരു വർഷത്തിന് ശേഷം ടെക്നിക്കൽ സപ്പോർട്ട് എൻജിനീയറായി സെയിൽസ്‌ഫോഴ്സിൽ (Salesforce) ചേർന്നു. സോഫ്റ്റ്‌വെയർ എൻജിനീയറിങ് മേഖലയിലെ ആദ്യ ശമ്പളവുമായി താരതമ്യം ചെയ്യുമ്പോൾ സെയിൽസ്‌ഫോഴ്സിലേക്കുള്ള മാറ്റത്തിലൂടെ തനിക്ക് 670 ശതമാനം ശമ്പള വർദ്ധനവാണ് ലഭിച്ചതെന്ന് പാട്ടീൽ വ്യക്തമാക്കി. 1.3 വർഷത്തിനുള്ളിലാണ് ഈ വർദ്ധനവുണ്ടായത്.
കരിയർ മാറ്റത്തെക്കുറിച്ച് സംസാരിക്കുമ്പോൾ, വരുമാനം ഉപേക്ഷിക്കാൻ കഴിയാത്തതിനാലാണ് പഠനത്തോടൊപ്പം ജോലി തുടരേണ്ടി വന്നതെന്ന് പാട്ടീൽ പറഞ്ഞു. മെക്കാനിക്കൽ എൻജിനീയറിങ് പഠനത്തോടൊപ്പം ടാറ്റ കൺസൾട്ടൻസി എൻജിനീയേഴ്സിൽ ഡിസൈൻ എൻജിനീയറായാണ് കരിയർ ആരംഭിച്ചത്. എന്നാൽ സോഫ്റ്റ്‌വെയർ എൻജിനീയറിങ് മേഖലയിലേക്ക് മാറാൻ താൻ ആഗ്രഹിച്ചിരുന്നു. ജോലി ഉപേക്ഷിക്കാൻ സാധിക്കാത്തതിനാൽ 2023-ൽ സ്കേലർ വഴി ജോലിക്കൊപ്പം പഠനം തുടർന്നു. വിദ്യാഭ്യാസ വായ്പ തിരിച്ചടയ്ക്കേണ്ടി വന്നത് ജോലിയും പഠനവും സാമ്പത്തിക ഉത്തരവാദിത്തങ്ങളും ഒരുമിച്ച് കൊണ്ടുപോകുന്നത് കൂടുതൽ പ്രയാസകരമാക്കി മാറ്റി. കാലക്രമേണ സാങ്കേതിക കഴിവുകൾ വികസിപ്പിക്കാനും ഇപിഎഎം സിസ്റ്റംസിൽ ആദ്യ ജോലി നേടാനും സാധിച്ചു. തുടർന്ന് സെയിൽസ്‌ഫോഴ്സിലേക്ക് മാറിയപ്പോൾ 1.3 വർഷത്തിനുള്ളിൽ 670 ശതമാനം ശമ്പള വർദ്ധനവാണ് ലഭിച്ചതെന്നും അദ്ദേഹം കൂട്ടിച്ചേർത്തു.
ബന്ധപ്പെട്ട വിദ്യാഭ്യാസ പശ്ചാത്തലം ഇല്ലാത്തവർക്കും സ്ഥിരമായ ശ്രമത്തിലൂടെയും ക്ഷമയിലൂടെയും പുതിയ കരിയർ അവസരങ്ങൾ തുറക്കാനാകുമെന്ന് തന്റെ അനുഭവം തെളിയിക്കുന്നതായി പാട്ടീൽ പറഞ്ഞു. ജോലിക്കൊപ്പം തന്നെ അനുയോജ്യമായ പഠന പിന്തുണ ലഭിച്ചത് കരിയർ മാറ്റത്തിന് വളരെയധികം സഹായിച്ചുവെന്നും അദ്ദേഹം വ്യക്തമാക്കി.
