തിരക്കേറിയ റോഡിലെ വളവിൽ അശ്രദ്ധയോടെയെത്തിയ ലോറി സ്കൂട്ടറിലിടിച്ചതിനെത്തുടർന്ന് കഷ്ടിച്ച് രക്ഷപ്പെട്ട പെൺകുട്ടിയുടെ ഞെട്ടിക്കുന്ന വീഡിയോയാണ് മഹാരാഷ്ട്രയിലെ ശ്രീരാംപൂരിൽ നിന്ന് പുറത്തുവരുന്നത്. വലിയൊരു ദുരന്തത്തിൽ കലാശിക്കുമായിരുന്ന ഈ ഭയപ്പെടുത്തുന്ന നിമിഷത്തിൽ, പെൺകുട്ടി ലോറിയുടെ മുന്നിലെ ബമ്പറിൽ പിടിച്ച് തൂങ്ങിക്കിടക്കുകയായിരുന്നു.
ശ്രീരാംപൂരിലെ ബേലാപൂർ റോഡിലാണ് ഈ സംഭവം നടന്നത്. മണൽ കയറ്റിയ ലോറി റോഡ് വളവിലേക്ക് അമിതവേഗതയിൽ എത്തുകയും പെൺകുട്ടിയുടെ ഇരുചക്ര വാഹനത്തിൽ ഇടിക്കുകയുമായിരുന്നു. ഈടിയുടെ ആഘാതത്തിൽ സ്കൂട്ടർ മറിഞ്ഞുവീഴുകയും, പെൺകുട്ടി ലോറിക്ക് അടിയിലേക്ക് പെട്ടുപോകുമെന്ന അവസ്ഥയുണ്ടാവുകയും ചെയ്തു.
പ്രതികരിക്കാൻ വളരെ കുറഞ്ഞ സമയം മാത്രമേ ഉണ്ടായിരുന്നുള്ളൂ എങ്കിലും, താഴെ വീഴാതിരിക്കാൻ അവൾ ലോറിയുടെ മുന്നിലെ ബമ്പറിൽ പെട്ടെന്ന് പിടിക്കുകയായിരുന്നു. ലോറിയുടെ അടിയിൽ പെടാതെ രക്ഷപ്പെടാൻ അവൾ നടത്തിയ പരിശ്രമങ്ങൾ സിസിടിവി ദൃശ്യങ്ങളിൽ വ്യക്തമാണ്. പെട്ടെന്നുള്ള ഈ ഇടപെടലാണ് വലിയൊരു അപകടത്തിൽ നിന്ന് അവളെ രക്ഷിച്ചത്. ഭാരമേറിയ വാഹനങ്ങൾ റോഡ് വളവുകളിൽ മതിയായ ശ്രദ്ധയില്ലാതെ പായുമ്പോൾ ഇരുചക്ര വാഹനയാത്രക്കാർ നേരിടുന്ന വലിയ അപകടസാധ്യതയാണ് ഈ ദൃശ്യങ്ങൾ വ്യക്തമാക്കുന്നത്.
എന്നാൽ അപകടത്തിന് ശേഷം മറ്റൊരു സംഭവവികാസവും ഉണ്ടായി. പെട്ടെന്നുണ്ടായ അപകടത്തിൽ നിന്ന് രക്ഷപ്പെട്ടതിന് ശേഷം, പെൺകുട്ടി എഴുന്നേറ്റുനിന്ന് തന്റെ സ്കൂട്ടർ റോഡിൽ നിന്ന് മാറ്റാൻ ശ്രമിച്ചു. എന്നാൽ ലോറി ഡ്രൈവർ വാഹനത്തിൽ നിന്ന് പുറത്തിറങ്ങി അവരുമായി വാക്കേറ്റത്തിൽ ഏർപ്പെടുകയായിരുന്നു. സമീപത്തുണ്ടായിരുന്ന ആളുകൾ ബഹളം കേട്ട് എത്തിയതോടെയാണ് ഈ തർക്കം പുറത്തറിഞ്ഞത്. വിവരമറിഞ്ഞ് നാട്ടുകാരും യാത്രക്കാരും സംഭവസ്ഥലത്ത് തടിച്ചുകൂടിയതോടെ ലോറി ഡ്രൈവർ അവിടെനിന്ന് ഓരക്ഷപ്പെടുകയായിരുന്നു.
റോഡ് വളവുകളിൽ കാഴ്ചാ പരിമിതികളുള്ളപ്പോൾ ഭാരമേറിയ വാഹനങ്ങൾ അമിതവേഗതയിൽ പായുന്നത് വലിയ അപകടങ്ങൾക്ക് കാരണമാകുന്നുണ്ടെന്ന് ഈ സംഭവം ഓർമ്മിപ്പിക്കുന്നു. കൂടാതെ റോഡപകടങ്ങൾക്ക് ശേഷം ഡ്രൈവർമാർ കാണിക്കേണ്ട മര്യാദകളെക്കുറിച്ചും, അപകടത്തിൽ പെട്ടവരെ സഹായിക്കേണ്ടതിന്റെ പ്രാധാന്യത്തെക്കുറിച്ചും ഇത്തരം സംഭവങ്ങൾ ചോദ്യങ്ങൾ ഉയർത്തുന്നുണ്ട്. ഒരു നിമിഷത്തെ പെട്ടെന്നുള്ള പ്രതികരണം കൊണ്ടുമാത്രമാണ് ആ പെൺകുട്ടിക്ക് മരണമുഖത്തുനിന്ന് ജീവിതത്തിലേക്ക് തിരിച്ചെത്താൻ കഴിഞ്ഞത്.
