ഇന്ത്യയിൽ ഗിഗ് തൊഴിലാളികളുടെ (താത്കാലിക തൊഴിൽ ചെയ്യുന്നവർ) എണ്ണം 2021 സാമ്പത്തിക വർഷത്തിലെ 77 ലക്ഷത്തിൽ നിന്ന് 2025 സാമ്പത്തിക വർഷത്തിൽ 1.20 കോടിയായി ഉയർന്നു. 55 ശതമാനത്തിന്റെ ഈ വർദ്ധനവ് സാമ്പത്തികമായി ബുദ്ധിമുട്ടിയിരുന്ന നിരവധി ആളുകൾക്ക് പുതിയ വരുമാന മാർഗ്ഗങ്ങൾ തുറന്നുനൽകിയതായി 2025-26 സാമ്പത്തിക സർവേ വ്യക്തമാക്കുന്നു.
ഇതിന് ഉദാഹരണമായി മുംബൈയിൽ ജോലി ചെയ്യുന്ന ഹർഷ് ഗുപ്ത മധുസൂദൻ എന്നയാൾ പങ്കുവെച്ച ഒരു സോഷ്യൽ മീഡിയ കുറിപ്പ് വൈറലായിരിക്കുകയാണ്. അർബൻ കമ്പനി ആപ്പ് വഴി തനിക്ക് മുടിവെട്ടാൻ എത്തിയ ഉത്തർപ്രദേശ് സ്വദേശിയായ ബാർബർ മാസം തോറും ഒരു ലക്ഷം രൂപയോളം സമ്പാദിക്കുന്നുണ്ടെന്ന് അദ്ദേഹം പങ്കുവെച്ചു.
അസംഗഡ് സ്വദേശിയായ ഈ ബാർബർ ആഴ്ചയിൽ ആറ് ദിവസവും രാവിലെ മുതൽ രാത്രി വരെ ജോലി ചെയ്യുന്നുണ്ടെന്നും യാത്രാചെലവുകൾ കഴിച്ച് പ്രതിമാസം ഒരു ലക്ഷത്തോളം രൂപ സമ്പാദിക്കുന്നുണ്ടെന്നും ഹർഷ് പറഞ്ഞു. കുറഞ്ഞ ശമ്പളത്തിലുള്ള ഏതെങ്കിലും സർക്കാർ ജോലി ലഭിച്ചാൽ ഈ പണി ഉപേക്ഷിക്കുമോ എന്ന് ചോദിച്ചപ്പോൾ, ഈ രംഗത്ത് ലഭിക്കുന്ന സ്വാതന്ത്ര്യവും സ്വയം തൊഴിൽ ചെയ്യാനുള്ള അവസരവുമാണ് തനിക്ക് ഇഷ്ടമെന്നും അതിനാൽ സർക്കാർ ജോലി വേണ്ടെന്നും അദ്ദേഹം തുറന്നുപറഞ്ഞു. അധ്വാനിക്കാൻ തയ്യാറാണെങ്കിൽ അവസരങ്ങൾക്ക് ഒരു കുറവുമില്ലെന്നാണ് അദ്ദേഹത്തിന്റെ പക്ഷം.
തന്റെ ഗ്രാമത്തിൽ നിന്ന് ലഖ്‌നൗവിലേക്ക് യാത്ര ചെയ്യാൻ പണ്ട് ഏഴ് മുതൽ എട്ട് മണിക്കൂർ വരെ സമയം എടുത്തിരുന്നുവെങ്കിൽ, റോഡ് വികസനം കാരണം ഇപ്പോൾ അതേ സമയം കൊണ്ട് പോയി വരാൻ സാധിക്കുന്നുണ്ടെന്ന് അദ്ദേഹം പറഞ്ഞു. സർക്കാരിന്റെ വികസന പ്രവർത്തനങ്ങളിൽ അദ്ദേഹം സന്തോഷവാനാണ്. കൃത്യമായി നികുതി (TDS) പിടിക്കുന്നതിനാൽ അഭിമാനത്തോടെ ഇൻകം ടാക്സ് റിട്ടേൺ ഫയൽ ചെയ്യാറുണ്ടെന്നും പണം തിരികെ ലഭിക്കാറുണ്ടെന്നും അദ്ദേഹം കൂട്ടിച്ചേർത്തു. ഇദ്ദേഹത്തിന്റെ മകൻ ഒരു സ്വകാര്യ പ്രീ-സ്‌കൂളിലാണ് പഠിക്കുന്നത്.
ഈ പോസ്റ്റ് വൈറലായതോടെ, ഇന്ത്യൻ സമ്പദ്‌വ്യവസ്ഥയിൽ ഗിഗ് ജോലികൾ വഹിക്കുന്ന നിർണായക പങ്കിനെക്കുറിച്ച് നിരവധി ആളുകൾ സോഷ്യൽ മീഡിയയിൽ പ്രതികരിച്ചു. ഡിജിറ്റൽ സാങ്കേതികവിദ്യയുടെ വളർച്ച കാരണം സാധാരണക്കാർക്ക് അനുഗ്രഹമായി മാറിയ ഇത്തരം തൊഴിൽ അവസരങ്ങൾക്ക് അർഹിച്ച അംഗീകാരം ലഭിക്കുന്നില്ലെന്ന് പലരും അഭിപ്രായപ്പെട്ടു. അധ്വാനിക്കാൻ മനസ്സുള്ളവർക്ക് വരുമാനം കണ്ടെത്താൻ ഇന്ന് ധാരാളം വഴികളുണ്ടെന്നാണ് സോഷ്യൽ മീഡിയ ഉപയോക്താക്കൾ പറയുന്നത്.
