ബെംഗളൂരുവിൽ വച്ചുണ്ടായ വാഹനാപകടത്തിൽ നിന്ന് അത്ഭുതകരമായി രക്ഷപ്പെട്ട ഐ.ടി ജീവനക്കാരന് സർവീസ് സെന്ററിൽ നിന്ന് ലഭിച്ചത് ഞെട്ടിക്കുന്ന തുക. ആമസോണിലെ സോഫ്റ്റ്‌വെയർ എൻജിനീയറായ ആദം റിസ്ക്, തകർന്ന തന്റെ മെഴ്‌സിഡസ് ബെൻസ് കാറിന്റെ റിപ്പയർ ചെലവായി സർവീസ് സെന്റർ ആവശ്യപ്പെട്ടത് 61 ലക്ഷം രൂപയാണെന്ന് സോഷ്യൽ മീഡിയ പോസ്റ്റിലൂടെ വെളിപ്പെടുത്തി. താൻ കാർ വാങ്ങാൻ നൽകിയ തുകയ്ക്ക് തുല്യമാണ് ഈ റിപ്പയർ ചെലവ്.
കനത്ത മഴയത്ത് ബെംഗളൂരുവിൽ വച്ച് ഡ്രൈവ് ചെയ്യുന്നതിനിടയിൽ കാർ നിയന്ത്രണം വിട്ട് റോഡിലെ ഡിവൈഡർ തകർത്ത് എതിർവശത്തെ ട്രാക്കിലേക്ക് മറിഞ്ഞാണ് അപകടമുണ്ടായത്. “ഞാൻ എന്റെ ബെൻസ് കാർ ഇടിച്ചു തകർത്തു. വലിയ പരിക്കുകളൊന്നുമില്ലാതെ രക്ഷപ്പെട്ടതിൽ സന്തോഷമുണ്ട്,” എന്ന് പറഞ്ഞ റിസ്ക്, ഡിവൈഡർ തകർത്ത് ഹൈവേയുടെ തെറ്റായ വശത്തേക്ക് ചെന്നത് കൊണ്ട് വലിയൊരു ദുരന്തമാണ് ഒഴിവായതെന്നും കൂട്ടിച്ചേർത്തു.
വലിയ പരിക്കുകളില്ലാതെ രക്ഷപ്പെട്ടെങ്കിലും, കാർ അംഗീകൃത സർവീസ് സെന്ററിൽ എത്തിച്ചപ്പോൾ ലഭിച്ച റിപ്പയർ എസ്റ്റിമേറ്റ് തന്നെ അത്ഭുതപ്പെടുത്തിയെന്ന് റിസ്ക് പറഞ്ഞു. വാഹനം ശരിയാക്കാൻ നല്ല രീതിയിൽ പണം ചെലവാകുമെന്ന് അറിയാമായിരുന്നുവെങ്കിലും, ഇത്രയധികം തുക വരുമെന്ന് കരുതിയിരുന്നില്ല. “എന്റെ കാർ മെഴ്‌സിഡസ് സർവീസ് സെന്ററിൽ എത്തിച്ചപ്പോൾ അവർ നൽകിയ റിപ്പയർ എസ്റ്റിമേറ്റ് 61 ലക്ഷം രൂപയാണ്. അറുപത്തിയൊന്ന് ലക്ഷം രൂപ,” എന്ന് പറഞ്ഞ അദ്ദേഹം, റിപ്പയർ ചെലവ് ഇത്രയധികം വരുമെന്ന് കരുതിയിരുന്നില്ലെന്നും വ്യക്തമാക്കി.
ഇൻഷുറൻസ് ഈ തുക നൽകുമോ എന്ന ചോദ്യത്തിന്, ഇൻഷുറൻസ് തുക നൽകാൻ സാധ്യതയില്ലെന്നായിരുന്നു റിസ്കിന്റെ മറുപടി. കാറിന് പൂർണ്ണമായ തകർച്ച സംഭവിച്ചതായി കണക്കാക്കി (ടോട്ടൽ ലോസ്) ഇൻഷുറൻസ് കമ്പനി തുക നൽകുമെന്നും അദ്ദേഹം പറഞ്ഞു.
ഈ പോസ്റ്റ് വൈറലായതോടെ, എയർബാഗുകൾ തുറന്നുകഴിഞ്ഞാൽ പിന്നെ പഴയതുപോലെ കാർ സുരക്ഷിതമായി പ്രവർത്തിക്കില്ലെന്നും പുതിയൊരു കാർ വാങ്ങുന്നതാണ് നല്ലതെന്നും സോഷ്യൽ മീഡിയ ഉപയോക്താക്കൾ അഭിപ്രായപ്പെട്ടു. “സുഹൃത്തേ, ഈ സാഹചര്യത്തിൽ പുതിയൊരു കാർ വാങ്ങുന്നതാണ് നല്ലത്,” എന്ന് ഒരാൾ കമന്റ് ചെയ്തു. “റിപ്പയറിനു ശേഷവും ഇത്തരം കാറുകൾ ഓടിക്കുന്നത് സുരക്ഷിതമല്ല. എല്ലാ ഭാഗങ്ങളും മാറ്റിയാലും കാർ ഒരിക്കലും പഴയ പോലെയാകില്ല,” എന്ന് മറ്റൊരാൾ പറഞ്ഞു.
“ഏകദേശം 70 ലക്ഷം രൂപ കൊടുത്ത് ഒരു പുതിയ മെഴ്‌സിഡസ് സി-ക്ലാസ് കാർ വാങ്ങുന്നുവെന്ന് സങ്കൽപ്പിക്കുക. എന്നാൽ നിങ്ങളുടെ പക്കലുള്ള കാർ ശരിയാക്കാൻ 61 ലക്ഷം രൂപയാകുമെന്ന് പറഞ്ഞാൽ എങ്ങനെയുണ്ടാകും?” എന്ന് മറ്റൊരു ഉപയോക്താവ് കുറിച്ചു. എയർബാഗുകൾ വിന്യസിക്കപ്പെട്ടാൽ കാർ പൂർണ്ണമായി തകർന്നതായി കണക്കാക്കുമെന്നും, ഇൻഷുറൻസ് കമ്പനി കാർ റൈറ്റ്-ഓഫ് ചെയ്യുമെന്നും ചിലർ ചൂണ്ടിക്കാണിച്ചു. വാഹനം ഒരിക്കലും പഴയതുപോലെയാകില്ലെന്നും അതിനാൽ പുതിയൊരു കാർ വാങ്ങാൻ മറ്റൊരു ഉപയോക്താവ് ഉപദേശിച്ചു.
