കൊൽക്കത്തയിലെ തിരക്കേറിയ തെരുവുകളിൽ വാഹനം നിയന്ത്രിക്കുന്ന തിരക്കിനിടയിലും, സ്വന്തം കടമയ്ക്കപ്പുറം മാതൃകാപരമായ പ്രവർത്തനം നടത്തുകയാണ് കൊൽക്കത്ത പോലീസ് സർജന്റ് പ്രകാശ് ഘോഷ്. തനിക്കൊപ്പം റോഡരികിൽ വളരുന്ന ഒരു കുട്ടിയെ പഠിപ്പിക്കാനാണ് അദ്ദേഹം തന്റെ ഡ്യൂട്ടി സമയം മാറ്റിവെക്കുന്നത്.
കഴിഞ്ഞ ഒമ്പത് വർഷമായി പോലീസ് സേനയിൽ സേവനമനുഷ്ഠിക്കുന്ന പ്രകാശ് ഘോഷ്, അഞ്ച് വർഷമായി ഗാരിയഹാട്ട്-ബാലിഗഞ്ച് ഭാഗത്താണ് ജോലി ചെയ്യുന്നത്. ഇവിടെ ജോലി ചെയ്യുന്നതിനിടയിലാണ്, വിദ്യാലയത്തിൽ പോകേണ്ട പ്രായത്തിൽ തെരുവിൽ സമയം ചെലവഴിക്കുന്ന ഒരു ചെറിയ കുട്ടിയെ അദ്ദേഹം ശ്രദ്ധിക്കുന്നത്. ആ കുട്ടിയുടെ അവസ്ഥ മനസ്സിലാക്കിയ അദ്ദേഹം, അവനെ വീണ്ടും അക്ഷരലോകത്തേക്ക് കൈപിടിച്ചുയർത്താൻ തീരുമാനിക്കുകയായിരുന്നു.
പോലീസിൽ ചേരുന്നതിന് മുൻപ് മുർഷിദാബാദിലെ ജംഗിപൂരിൽ അധ്യാപകനായി ജോലി ചെയ്യുകയായിരുന്നു പ്രകാശ് ഘോഷ്. അദ്ധ്യാപന വിഷയത്തില്‍ ബിരുദാനന്തര ബിരുദവും (M.Ed) അദ്ദേഹത്തിനുണ്ട്. ജോലി മാറിയെങ്കിലും അധ്യാപനത്തോടുള്ള അദ്ദേഹത്തിന്റെ താല്പര്യം മാറിയിരുന്നില്ല. റോഡരികിൽ ഭക്ഷണം വിറ്റ് ദിവസം 150 മുതൽ 200 രൂപ വരെ മാത്രം വരുമാനം ഉണ്ടാക്കുന്ന സുനിത എന്ന സ്ത്രീയുടെ മകനാണ് ആകാശ് റാവുത്ത്. ഒന്നര വർഷം മുൻപ് ഐ.ടി.ഐയിൽ ജോലി ചെയ്തിരുന്ന പിതാവ് മരിച്ചതോടെയാണ് ഈ കുടുംബം തെരുവിലേക്ക് ഇറങ്ങേണ്ടി വന്നത്. സാമ്പത്തിക പ്രയാസങ്ങൾ കാരണം മകന് നല്ല വിദ്യാഭ്യാസം നൽകാൻ ആ അമ്മയ്ക്ക് സാധിച്ചിരുന്നില്ല.
കോവിഡ് കാലത്തെ സ്കൂൾ അടച്ചുപൂട്ടലോടെ ആകാശിന്റെ പഠനം പൂർണ്ണമായും നിലച്ചിരുന്നു. അടിസ്ഥാന അക്ഷരങ്ങൾ പോലും അവൻ മറന്നുപോയിരുന്നു. സഹതാപം കാണിക്കുന്നതിന് പകരം, റോഡരികിൽ വെച്ച് തന്നെ അവനെ സ്വയം പഠിപ്പിക്കാൻ പ്രകാശ് ഘോഷ് തീരുമാനിച്ചു. തന്റെ ഔദ്യോഗിക തിരക്കുകൾക്കിടയിൽ കിട്ടുന്ന സമയം ഉപയോഗിച്ച് തിരക്കേറിയ ആ പാതയോരത്തെ അദ്ദേഹം ഒരു ക്ലാസ് മുറിയാക്കി മാറ്റി.
ആദ്യമൊക്കെ പഠനത്തിൽ ശ്രദ്ധ കേന്ദ്രീകരിക്കാൻ ആകാശ് ബുദ്ധിമുട്ടിയെങ്കിലും, പ്രകാശ് ഘോഷിന്റെ ക്ഷമയോടും സ്നേഹത്തോടുമുള്ള ഇടപെടൽ അവനിൽ മാറ്റങ്ങളുണ്ടാക്കി. പതുക്കെ അവൻ പഠനത്തിൽ താല്പര്യം കാണിച്ചു തുടങ്ങി. മകൻ പുസ്തകങ്ങൾ എടുത്ത് വായിക്കാൻ തുടങ്ങിയത് അവന്റെ അമ്മയ്ക്കും വലിയ പ്രതീക്ഷ നൽകുന്നുണ്ട്. മകൻ നന്നായി പഠിച്ച്, നല്ലൊരു മനുഷ്യനായി തങ്ങളുടെ ദാരിദ്ര്യം മാറ്റണമെന്നാണ് ആ അമ്മയുടെ ആഗ്രഹം. കൊൽക്കത്തയിലെ തിരക്കേറിയ ഒരു നടപ്പാത അങ്ങനെ ഒരു കുട്ടിക്ക് തന്റെ പഠനം വീണ്ടെടുക്കാനുള്ള വേദിയായി മാറുകയായിരുന്നു.
