1993-ൽ വെറും 15 ദിവസത്തെ വിസയിൽ ജപ്പാനിലെത്തിയ 72-കാരനായ ദക്ഷിണ കൊറിയൻ പൗരൻ, കഴിഞ്ഞ 33 വർഷമായി അവിടെ അനധികൃതമായി താമസിച്ചതിന് അറസ്റ്റിലായി.
ഓഗസ്റ്റ് 26-ന് ഷിസുവോക്ക പ്രവിശ്യയിലെ യൈസുവിലാണ് മുൻ ജോങ്-ഗി എന്ന് തിരിച്ചറിഞ്ഞ ഇയാളെ ജാപ്പനീസ് അധികൃതർ അറസ്റ്റ് ചെയ്തത്. 1993 സെപ്റ്റംബറിൽ സ്വന്തം അനിയന്റെ പാസ്‌പോർട്ട് ഉപയോഗിച്ച് ജപ്പാനിലെത്തിയ ഇയാൾ വിസ കാലാവധി കഴിഞ്ഞിട്ടും ദക്ഷിണ കൊറിയയിലേക്ക് മടങ്ങിയില്ലെന്ന് പോലീസ് പറയുന്നു.
മെച്ചപ്പെട്ട വേതനമുള്ള ജോലി തിരഞ്ഞാണ് ഇയാൾ ജപ്പാനിലേക്ക് പോയത്. തുടർന്നുള്ള പതിറ്റാണ്ടുകളിൽ ദിവസവേതന ജോലികളും മറ്റ് താൽക്കാലിക ജോലികളും ചെയ്താണ് ഇയാൾ ജീവിച്ചിരുന്നത്.
ഈ വർഷമാണ് ഈ സംഭവം പുറത്തറിയുന്നത്. 2026 ജൂണിൽ അനധികൃത താമസക്കാരനെക്കുറിച്ച് പോലീസിന് വിവരം ലഭിക്കുകയും അന്വേഷണം ആരംഭിക്കുകയുമായിരുന്നു. തുടർന്നുള്ള അന്വേഷണത്തിലാണ് ഇയാൾ പിടിയിലാകുന്നത്. ചോദ്യം ചെയ്യലിൽ ഇയാൾ കുറ്റം സമ്മതിച്ചതായി പോലീസ് പറഞ്ഞു. എന്നാൽ നിയമപരമായ രേഖകളൊന്നുമില്ലാതെ ഇത്രയും കാലം ഇയാൾ എങ്ങനെ ജപ്പാനിൽ കഴിഞ്ഞു എന്നതിനെക്കുറിച്ച് പോലീസ് അന്വേഷിച്ചുവരികയാണ്.
ജപ്പാനിൽ വിസ കാലാവധി കഴിഞ്ഞ് താമസിക്കുന്നവരുടെ എണ്ണം വളരെ കൂടുതലായിരുന്ന സമയത്താണ് മുൻ ജോങ്-ഗി അവിടെയെത്തുന്നത്. ജസ്റ്റിസ് മന്ത്രാലയത്തിന്റെ കണക്കനുസരിച്ച് 1993-ൽ 2,98,646-ഓളം പേർ ഇത്തരത്തിൽ ജപ്പാനിൽ അനധികൃതമായി താമസിച്ചിരുന്നു.
എന്നാൽ ഇയാൾക്ക് 15 ദിവസത്തെ വിസ മാത്രമാണ് ഉണ്ടായിരുന്നത്. കാലാവധി കഴിഞ്ഞിട്ടും ഇയാൾ ജപ്പാനിൽ തുടരുകയായിരുന്നു. ഈ വർഷങ്ങളിൽ താൽക്കാലിക ജോലികൾ ചെയ്താണ് ഇയാൾ ജീവിച്ചിരുന്നത്. എന്നാൽ ഇയാൾ എവിടെയൊക്കെ ജോലി ചെയ്തു, എവിടെയൊക്കെ താമസിച്ചു എന്ന വിവരങ്ങൾ പോലീസ് പുറത്തുവിട്ടിട്ടില്ല.
ഈ സംഭവത്തിന് പിന്നിൽ പ്രധാനപ്പെട്ട ഒരു നിയമവശം കൂടിയുണ്ട്. ഇയാൾ ഏകദേശം 33 വർഷത്തോളം ജപ്പാനിൽ താമസിച്ചെങ്കിലും, 26 വർഷത്തെ അനധികൃത താമസത്തിനാണ് പോലീസ് നിലവിൽ കേസ് എടുത്തിരിക്കുന്നത്. 2000 ഫെബ്രുവരിയിൽ ജപ്പാനിലെ ഇമിഗ്രേഷൻ നിയമത്തിൽ വരുത്തിയ മാറ്റങ്ങൾക്ക് ശേഷമാണ് അനധികൃത താമസത്തിന് ക്രിമിനൽ ശിക്ഷ നടപ്പിലാക്കിയത്. അതിനാൽ 1993 മുതലുള്ള കാലയളവിന് പകരമായി നിയമം പ്രാബല്യത്തിൽ വന്ന സമയം മുതലുള്ള കുറ്റമാണ് ഇയാൾക്കെതിരെ ചുമത്തിയിരിക്കുന്നത്.
ഇയാൾ ജപ്പാനിൽ എത്തിയ സമയത്തെ അപേക്ഷിച്ച് അനധികൃതമായി താമസിക്കുന്നവരുടെ എണ്ണത്തിൽ ഇപ്പോൾ വലിയ കുറവ് വന്നിട്ടുണ്ട്. 2026 ജനുവരിയിലെ കണക്കനുസരിച്ച് ഈ സംഖ്യ 68,488 ആയി കുറഞ്ഞിട്ടുണ്ട്.
