കൊളംബോ: ഇന്ത്യയുടെ 600-ാം ക്രിക്കറ്റ് ടെസ്റ്റിന് ഇന്ന് തുടക്കമാവുകയാണ്. ഗാൾ ഇന്റർനാഷണൽ സ്‌റ്റേഡിയത്തിൽ നടക്കുന്ന ഒന്നാം ടെസ്‌റ്റോടെയാണ് ഇന്ത്യ ഈ ചരിത്ര നേട്ടം കൈവരിക്കുന്നത്. 80-ാം സ്വാതന്ത്ര്യദിനത്തിൽ തന്നെ അറുനൂറാം ടെസ്റ്റ് തുടങ്ങുന്നുവെന്ന അപൂർവ്വതയുമുണ്ട്. 600 ടെസ്റ്റുകൾ തികയ്ക്കുന്ന ആദ്യ ഏഷ്യൻ രാജ്യമാണ് ഇന്ത്യ. ലോക ക്രിക്കറ്റിൽ ഇംഗ്ലണ്ടും ഓസ്‌ട്രേലിയയും മാത്രമാണ് മുൻപ് ഈ നേട്ടത്തിലെത്തിയത്. ഇതുവരെ കളിച്ച 599 ടെസ്റ്റുകളിൽ 189 ജയവും 188 തോൽവിയും ഇന്ത്യ സ്വന്തമാക്കി. 224 മത്സരങ്ങൾ സമനിലയിലായപ്പോൾ ഒരെണ്ണം ടൈയിൽ കലാശിച്ചു. ഈ അറുനൂറാം ടെസ്റ്റിൽ ഇന്ത്യയെ നയിക്കാനുള്ള അപൂർവ്വ ഭാഗ്യം ശുഭ്മൻ ഗില്ലിനാണ് ലഭിച്ചിരിക്കുന്നത്.
1932-ൽ ലോഡ്‌സിൽ ഇംഗ്ലണ്ടിനെതിരെയായിരുന്നു ഇന്ത്യയുടെ അരങ്ങേറ്റ ടെസ്റ്റ്. സി.കെ. നായിഡു നയിച്ച ഈ കന്നി മത്സരത്തിൽ ഇന്ത്യ തോൽക്കുകയാണുണ്ടായത്. തുടർന്ന് 1967-ൽ ബിർമിങ്ഹാമിൽ ഇംഗ്ലണ്ടിനെതിരെ തന്നെയാണ് ഇന്ത്യ നൂറാം ടെസ്റ്റ് കളിച്ചത്. മൻസൂർ അലി ഖാൻ പട്ടൗഡി നയിച്ച ആ മത്സരത്തിലും തോൽവിയായിരുന്നു ഫലം.
1982-ൽ ലാഹോറിൽ പാകിസ്താനെതിരെ സുനിൽ ഗാവസ്‌കറുടെ നേതൃത്വത്തിലാണ് ഇന്ത്യ 200-ാം ടെസ്റ്റ് കളിച്ചത്. ഈ മത്സരം സമനിലയിൽ അവസാനിച്ചു. 1996-ൽ അഹമ്മദാബാദിൽ ദക്ഷിണാഫ്രിക്കയ്‌ക്കെതിരെ കളിച്ചാണ് ഇന്ത്യ 300 ടെസ്റ്റുകൾ തികച്ചത്. സച്ചിൻ തെണ്ടുൽക്കർ നായകനായ ഈ മത്സരത്തിൽ ഇന്ത്യ വിജയം നേടി. 2006-ൽ കിങ്‌സ്റ്റണിൽ വെസ്റ്റ് ഇൻഡീസിനെതിരെ രാഹുൽ ദ്രാവിഡിന്റെ നേതൃത്വത്തിൽ 400-ാം ടെസ്റ്റിലും ഇന്ത്യ ജയം കണ്ടു. പിന്നീട് 2016-ൽ കാൺപൂരിൽ ന്യൂസിലൻഡിനെതിരെ വിരാട് കോഹ്‌ലിക്ക് കീഴിലാണ് 500-ാം ടെസ്റ്റ് ജയിച്ചു കയറിയത്.
ഇന്ത്യയുടെ ആദ്യ ടെസ്റ്റ് വിജയം കുറിക്കുന്നത് 1952 ഫെബ്രുവരിയിലാണ്. ചെന്നൈയിൽ നടന്ന മത്സരത്തിൽ ഇംഗ്ലണ്ടിനെ ഒരു ഇന്നിങ്‌സിനും എട്ട് റണ്ണിനുമാണ് ഇന്ത്യ പരാജയപ്പെടുത്തിയത്. വിനു മങ്കാദിന്റെ 12 വിക്കറ്റ് പ്രകടനമാണ് ആ ചരിത്ര ജയത്തിന് വഴിയൊരുക്കിയത്. അതേസമയം, 50 ടെസ്റ്റുകൾക്ക് വേദിയാകുന്ന ആദ്യ ഏഷ്യൻ ഗ്രൗണ്ട് എന്ന അപൂർവ്വ റെക്കോർഡ് ഗാൾ ഇന്റർനാഷണൽ സ്‌റ്റേഡിയവും സ്വന്തമാക്കുകയാണ്.
