നോയിഡയിലെ സെക്ടർ 69-ൽ കാർ ഡ്രൈവറുടെ സമയോചിതമായ ഇടപെടൽ കാരണം ഒരു പിഞ്ചുകുഞ്ഞ് വൻ ദുരന്തത്തിൽ നിന്ന് തലനാരിഴയ്ക്ക് രക്ഷപ്പെട്ടു. ജൂലൈ 31-ന് നടന്ന ഈ സംഭവത്തിന്റെ ഞെട്ടിക്കുന്ന ഡാഷ്‌ക്യാം ദൃശ്യങ്ങൾ ഇപ്പോൾ സോഷ്യൽ മീഡിയയിൽ വൈറലാണ്. തെരുവ് വിളക്കുകൾ വെളിച്ചം വീശാത്ത റോഡിന് നടുവിലൂടെ ഇഴഞ്ഞുനീങ്ങുകയായിരുന്ന കുഞ്ഞിനെ കണ്ട് ഡ്രൈവർ തൊട്ടടുത്ത് വെച്ച് പെട്ടെന്ന് ബ്രേക്ക് ചവിട്ടുകയായിരുന്നു.
ഒരു വളവ് തിരിഞ്ഞുവന്ന കാറിന് മുന്നിലേക്ക് പെട്ടെന്ന് ഒരു ബൈക്ക് തെറ്റായ രീതിയിൽ കയറിവന്നതിനെ തുടർന്ന് അപകടം ഒഴിവാക്കി മുന്നോട്ട് പോകുമ്പോഴാണ് ഡ്രൈവർ വഴിയിൽ കുഞ്ഞിനെ ശ്രദ്ധിച്ചത്. കാറിന്റെ ഹോൺ ശബ്ദം കേട്ട് ഒരു സ്ത്രീ സാവധാനം നടന്നെത്തി കുഞ്ഞിനെ കോരിയെടുക്കുന്നത് ദൃശ്യങ്ങളിൽ കാണാം. എന്നാൽ കുട്ടിയുടെ ജീവൻ അപകടത്തിലായിട്ടും ആ സ്ത്രീ കാണിച്ച അസാധാരണമായ ശാന്തതയും യാതൊരു ഭയവുമില്ലാത്ത പെരുമാറ്റവും ഡ്രൈവറെ അമ്പരപ്പിച്ചു. കുഞ്ഞിന്റെ കാര്യത്തിൽ കൂടുതൽ ശ്രദ്ധ വേണമെന്ന് ഡ്രൈവർ അവരെ ഉപദേശിക്കുകയും ചെയ്തു.
(Disclaimer: The video contains mild profanity. Viewer’s discretion is advised)
ഇന്ത്യൻ റോഡുകളിൽ ജാഗ്രതയോടെ വാഹനമോടിക്കേണ്ടതിന്റെയും, ഡാഷ്‌ക്യാമുകൾ ഘടിപ്പിക്കേണ്ടതിന്റെയും പ്രാധാന്യമാണ് ഈ സംഭവം ഓർമ്മിപ്പിക്കുന്നത്. രണ്ട് ദശലക്ഷത്തിലധികം ആളുകൾ കണ്ട ഈ വീഡിയോ ഡ്രൈവറുടെ ശ്രദ്ധയെ പ്രശംസിക്കുമ്പോഴും വലിയ രീതിയിലുള്ള അമർഷത്തിനും കാരണമായിട്ടുണ്ട്. കുഞ്ഞിനോടുള്ള അമ്മയുടെ അശ്രദ്ധയായ പെരുമാറ്റം മനഃപൂർവ്വമാണെന്നും, വല്ല അപകടമോ തട്ടിക്കൊണ്ടുപോകൽ ആരോപണമോ ഉന്നയിച്ച് പണം തട്ടിയെടുക്കാനുള്ള ശ്രമമായിരുന്നോ ഇതെന്ന് സംശയിക്കുന്നതായും നിരവധി ആളുകൾ സോഷ്യൽ മീഡിയയിൽ അഭിപ്രായപ്പെട്ടു.
