കൈമാറ്റിവെക്കൽ ശസ്ത്രക്രിയയിലൂടെ ലഭിച്ച കൈ കൊണ്ട്, അവയവദാതാവായ പെൺകുട്ടിയുടെ സഹോദരന്റെ കൈയിൽ രാഖി കെട്ടി ഒരു സോഷ്യൽ മീഡിയ ഇൻഫ്ലുവൻസർ. രക്ഷാബന്ധൻ ദിനത്തിൽ നടന്ന ഈ ആർദ്രമായ നിമിഷം ഓൺലൈനിൽ ആയിരക്കണക്കിന് ആളുകളുടെ ഹൃദയം കവരുകയാണ്.
പതിമൂന്നാം വയസ്സിലുണ്ടായ ദാരുണമായ ഒരു വൈദ്യുതാഘാത അപകടത്തിലാണ് അനംത എന്ന പെൺകുട്ടിക്ക് തന്റെ വലതുകൈ നഷ്ടപ്പെടുന്നത്. വർഷങ്ങൾക്ക് ശേഷം നടന്ന കൈമാറ്റിവെക്കൽ ശസ്ത്രക്രിയ അവൾക്ക് പുതിയൊരു ജീവിതം നൽകുക മാത്രമല്ല, സ്വന്തം കുടുംബത്തെപ്പോലെ കരുതുന്ന മറ്റൊരു ബന്ധം കൂടി സമ്മാനിക്കുകയായിരുന്നു.
ഈ രക്ഷാബന്ധൻ ദിനത്തിൽ, തന്റെ അവയവദാതാവായ റിയ എന്ന ഒൻപത് വയസ്സുകാരിയുടെ വീട്ടിലെത്തിയ അനംത, റിയയുടെ ജ്യേഷ്ഠന്റെ കൈയിൽ രാഖി അണിയിച്ചു. അനംതയുടെ മാറ്റിവെച്ച കൈ ചേർത്തുപിടിച്ച് റിയയുടെ അമ്മ കണ്ണീരണിഞ്ഞതോടെ ഈ നിമിഷം ഏവരെയും ഈറനണിയിക്കുന്നതായി മാറി. “എന്റെ മകൾ തിരികെ വന്നു” എന്ന് വിങ്ങിപ്പൊട്ടിക്കൊണ്ട് ആ അമ്മ പറയുകയായിരുന്നു.
2022-ൽ ഉത്തർപ്രദേശിലെ ബന്ധുവീട്ടിൽ വെച്ചാണ് അനംതയ്ക്ക് അപകടം സംഭവിക്കുന്നത്. ടെറസിൽ കളിച്ചുകൊണ്ടിരിക്കെ 11,000 വോൾട്ട് ലൈൻ കമ്പിയിൽ തൊടുകയും, അണുബാധ പടരാതിരിക്കാൻ ഡോക്ടർമാർക്ക് കൈ മുറിച്ചു മാറ്റേണ്ടി വരികയും ചെയ്തു. 50 ദിവസത്തോളം ആശുപത്രിയിൽ കഴിഞ്ഞ അനംത, പിന്നീട് ഇടതുകൈ കൊണ്ട് എഴുതാൻ പഠിക്കുകയും പത്താം ക്ലാസ് പരീക്ഷയിൽ 92% മാർക്ക് നേടുകയും ചെയ്തു. ഈ അതിജീവനമാണ് ഒടുവിൽ കൈമാറ്റിവെക്കൽ ശസ്ത്രക്രിയയിലേക്ക് എത്തിച്ചത്.
ദാരുണമായി ജീവൻ പൊലിഞ്ഞ റിയ എന്ന ഒൻപതുകാരിയുടെ മാതാപിതാക്കൾ, ദുഃഖത്തിനിടയിലും മകളുടെ കൈകൾ ദാനം ചെയ്യാൻ തയ്യാറാവുകയായിരുന്നു. അങ്ങനെ ലോകത്തിലെ തന്നെ ഏറ്റവും പ്രായം കുറഞ്ഞ കൈമാറ്റിവെക്കൽ ശസ്ത്രക്രിയാ ഗ്രഹീതാവായി അനംത മാറി. തനിക്ക് എപ്പോഴും ആഗ്രഹമുണ്ടായിരുന്ന ഒരു സഹോദരനെക്കൂടിയാണ് ഈ കുടുംബത്തിലൂടെ അനംതയ്ക്ക് ലഭിച്ചത്.
“ചില ബന്ധങ്ങൾ രക്തബന്ധങ്ങൾക്കും മതങ്ങൾക്കും വാക്കുകൾക്കും അപ്പുറമാണ്. ഒരു രണ്ടാം ജീവിതം, ഒരു രണ്ടാം കുടുംബം. ഇതാണ് എനിക്ക് രക്ഷാബന്ധൻ” എന്ന് അനംത സോഷ്യൽ മീഡിയയിൽ കുറിച്ചു.
