ഫോം താല്‍ക്കാലികമാണ്, ക്ലാസ് ശാശ്വതമാണ്. മുംബൈ ഇന്ത്യന്‍സിനെതിരെ മൂന്ന് വിക്കറ്റ് വീഴ്ത്തി രാജസ്ഥാന്‍ റോയല്‍സിന്റെ വിജയത്തില്‍ നിര്‍ണ്ണായകമായ പ്രകടനം നടത്തിയ സ്പിന്നര്‍ യുസ്വേന്ദ്ര ചാഹല്‍ എല്ലാവരേയും ഓര്‍മ്മിപ്പിച്ചത് അതാണ്.
എന്നാല്‍ 4 ഓവറില്‍ മൂന്ന് വിക്കറ്റ് വീഴ്ത്തി 3/11 എന്ന മാന്ത്രിക സ്‌പെല്ലിലൂടെ, ചാഹല്‍ ഒരു ഐപിഎല്‍ റെക്കോര്‍ഡിന് ഒപ്പമെത്തി. ലീഗിന്റെ ചരിത്രത്തില്‍ ഏറ്റവും കൂടുതല്‍ മൂന്ന് വിക്കറ്റ് വീഴ്ത്തിയ ടോപ്പ് ബൗളറായി ചഹല്‍ മാറി. ജസ്പ്രീത് ബുംറയ്ക്കൊപ്പം ചാഹലും 20 തവണ മൂന്ന് വിക്കറ്റ് വീതം വീഴ്ത്തി ഒന്നാം സ്ഥാനത്താണ്. മുംബൈ ഇന്ത്യന്‍സിന്റെ മറ്റൊരു ഇതിഹാസം ലസിത് മലിംഗ 19 തവണ ഈ നേട്ടം കൈവരിച്ചു.
ട്രെന്റ് ബോള്‍ട്ടിന്റെ ഇടിമുഴക്കത്തിന് ശേഷം മുംബൈ ഇന്ത്യന്‍സിന്റെ ടോപ്പ് ഓര്‍ഡറിനെ പുറത്താക്കി, ക്യാപ്റ്റന്‍ ഹാര്‍ദിക് പാണ്ഡ്യയും ബാറ്റര്‍ തിലക് വര്‍മ്മയും തങ്ങളുടെ ടീമിനെ മത്സര സ്ഥാനത്തേക്ക് വലിച്ചിടാനുള്ള ഉത്തരവാദിത്തം ഏറ്റെടുത്തു. പാണ്ഡ്യയും വര്‍മ്മയും ചേര്‍ന്ന് 50 റണ്‍സ് കൂട്ടുകെട്ട് ഉണ്ടാക്കി ആതിഥേയ ടീമിന് ഒരു പുതുജീവന്‍ നല്‍കി. അതിന് ശേഷമായിരുന്നു ചഹലിന്റെ ഇടപെടല്‍.
മുംബൈ ഇന്ത്യന്‍സിന്റെ മദ്ധ്യനിരയിലെ റണ്‍വേട്ടയെ നിയന്ത്രിച്ചത് ചഹലായിരുന്നു. 32ഉം 34ഉം വീതം നേടിയ പാണ്ഡ്യയും വര്‍മയും ക്ഷമയോടെ പരിശ്രമിച്ചിട്ടും 20 ഓവറില്‍ 125 റണ്‍സെടുക്കാനേ എംഐക്ക് കഴിഞ്ഞുള്ളൂ. ചഹലിന് ഈ ടൂര്‍ണമെന്റ് ഏറെ നിര്‍ണ്ണായകമാണ്. ജൂണില്‍ ടി20 ലോകകപ്പ് നടക്കാനിരിക്കെ സെലക്ടര്‍മാരുടെ കണ്ണില്‍പെടാന്‍ തക്ക പ്രകടനത്തിന് വേണ്ടിയാണ് താരം ഒരുങ്ങുന്നത്.
