ബ്രിട്ടനിൽ നിലവിലുള്ള വരൾച്ചാ പ്രതിസന്ധി പരിഹരിക്കുന്നതിനായി, ഇൻബോക്സിലെ ഇമെയിലുകളും ഉപയോഗിക്കാത്ത ചിത്രങ്ങളും ഡിലീറ്റ് ചെയ്യാൻ ലക്ഷക്കണക്കിന് പൗരന്മാരോട് പരിസ്ഥിതിവകുപ്പ് അധികൃതർ ആവശ്യപ്പെട്ടു. പ്രത്യക്ഷത്തില് യാതൊരു ബന്ധവുമില്ലാത്ത ഈ കാര്യങ്ങള് കേട്ട് അത്ഭുതപ്പെടാന് വരട്ടെ. കാരണമുണ്ട്.
“ഇമെയില് വിവരങ്ങള് സൂക്ഷിച്ചിരിക്കുന്ന ഡാറ്റാ സെന്ററുകൾക്ക് അവയുടെ സംവിധാനങ്ങൾ തണുപ്പിക്കാൻ ധാരാളം വെള്ളം ആവശ്യമാണ്” എന്ന് ചൂണ്ടിക്കാട്ടിയാണ് നാഷണൽ ഡ്രോട്ട് ഗ്രൂപ്പ് പൊതുജനങ്ങൾക്ക് ഈ നിർദ്ദേശം നൽകിയത്.
“നിലവിലെ സാഹചര്യം ദേശീയ പ്രാധാന്യമുള്ളതാണ്, നമ്മുടെ ജലക്ഷാമത്തിന്റെ സമ്മർദ്ദം കുറയ്ക്കാൻ എല്ലാവരും അവരവരുടെ പങ്ക് വഹിക്കണമെന്ന് ഞങ്ങൾ അഭ്യർത്ഥിക്കുന്നു. ടാപ്പ് ഓഫ് ചെയ്യുക അല്ലെങ്കിൽ പഴയ ഇമെയിലുകൾ ഡിലീറ്റ് ചെയ്യുക തുടങ്ങിയ ലളിതമായ കാര്യങ്ങള് ചെയ്യുക. നമ്മുടെ നദികളുടെയും വന്യജീവികളുടെയും ആരോഗ്യം സംരക്ഷിക്കുന്നതിനും സഹായിക്കും.” എൻവയോൺമെന്റ് ഏജൻസി ഡയറക്ടർ ഓഫ് വാട്ടർ ഹെലൻ വേക്ക്ഹാം പത്രക്കുറിപ്പിൽ പറഞ്ഞു.
ദി വെർജിന്റെ റിപ്പോർട്ട് അനുസരിച്ച്, പഴയ കൂളിങ് രീതികളെ ആശ്രയിക്കുന്ന ഒരു ചെറിയ ഡാറ്റാ സെന്റർ ഒരു വർഷം 25 ദശലക്ഷം ലിറ്ററിലധികം വെള്ളം ഉപയോഗിക്കുന്നുണ്ട്. ഇമെയിലുകൾ ഉൾപ്പെടെയുള്ള ആഗോള ഇന്റർനെറ്റ് ട്രാഫിക് പ്രോസസ്സ് ചെയ്യുന്ന ഡാറ്റാ സെന്ററുകൾക്ക് വർഷം മുഴുവൻ സെർവറുകൾ തണുപ്പിക്കാൻ വലിയ അളവിൽ വെള്ളവും ഊർജ്ജവും ആവശ്യമാണ്.
പ്രധാനമായും, 2021-ൽ, ഒറിഗോണിലെ ദി ഡാലെസിലുള്ള ഗൂഗിളിന്റെ ഡാറ്റാ സെന്റർ 355 ദശലക്ഷം ഗാലൺ വെള്ളം ഉപയോഗിച്ചു. ഇത് ഏകദേശം ഒളിമ്പിക്സ്സ് മത്സരത്തിന് തയാറാക്കുന്ന 538 നീന്തൽക്കുളങ്ങൾ നിറയ്ക്കാൻ മതിയാകും.
ഡാറ്റാ സെന്ററുകൾ പ്രവർത്തിപ്പിക്കാൻ അമിതമായ വെള്ളം ഉപയോഗിക്കുന്നതിനു പുറമേ, അവയ്ക്ക് വൈദ്യുതി ഉത്പാദിപ്പിക്കുന്നതും ഒരു വലിയ ഊർജ്ജ-ഉപഭോഗമാണ്. ഫോസിൽ ഇന്ധന പവർ പ്ലാന്റുകൾക്കും ആണവ റിയാക്ടറുകൾക്കും തണുപ്പിക്കാനും നീരാവി ഉപയോഗിച്ച് ടർബൈനുകൾ തിരിക്കാനും വെള്ളം ആവശ്യമായതിനാൽ, ജല ഉപയോഗം വളരെ വർദ്ധിക്കുകയും പരിസ്ഥിതിക്ക് ദോഷം വരുത്തുകയും ചെയ്യുന്നു.
ആർട്ടിഫിഷ്യൽ ഇന്റലിജൻസ് (AI) മേഖലയിലെ മുന്നേറ്റങ്ങൾക്കനുസരിച്ച്, വലിയ ഡാറ്റാ സെന്ററുകൾ തണുപ്പിക്കാൻ ഉപയോഗിക്കുന്ന വെള്ളത്തിന്റെ അളവ് വർധിക്കുമെന്നാണ് കണക്കാക്കുന്നത്. ഇമെയിലുകൾ ഡിലീറ്റ് ചെയ്യാൻ പൗരന്മാരോട് ആവശ്യപ്പെടുന്നതിന് പുറമെ, മഴവെള്ളം ശേഖരിക്കുക, ചോർച്ചയുള്ള ടോയ്ലറ്റുകൾ നന്നാക്കുക, പാചകത്തിന് ഉപയോഗിച്ച വെള്ളം ചെടികൾ നനയ്ക്കാൻ ഉപയോഗിക്കുക, കുളിക്കുന്ന സമയം കുറയ്ക്കുക തുടങ്ങിയ നിർദ്ദേശങ്ങളും അധികൃതർ നൽകിയിട്ടുണ്ട്.
യോർക്ക്ഷെയർ, കുംബ്രിയ, ലങ്കാഷെയർ, ഗ്രേറ്റർ മാഞ്ചസ്റ്റർ, മെർസിസൈഡ്, ചെഷയർ, ഈസ്റ്റ് മിഡ്ലാൻഡ്സ്, വെസ്റ്റ് മിഡ്ലാൻഡ്സ് എന്നിവിടങ്ങളിൽ ഔദ്യോഗികമായി വരൾച്ച പ്രഖ്യാപിച്ചിട്ടുണ്ട്. ഈ വർഷം ഈ സമയത്ത് സാധാരണയായി 80.5 ശതമാനം നിറഞ്ഞിരിക്കാറുള്ള ജലസംഭരണികൾ ഇപ്പോൾ 67.7 ശതമാനം മാത്രമാണ് നിറഞ്ഞിരിക്കുന്നത്.
