ടെക്സാസ്: യു.എസിലെ ടെക്സാസില് നടന്ന ചെസ് പ്രദര്ശന മത്സരത്തില് ഇന്ത്യയുടെ ലോകചാമ്പ്യന് ദൊമ്മരാജു ഗുകേഷിന്റെ ‘രാജാവി’നെ കാണികള്ക്കിടയിലേക്ക് വലിച്ചെറിഞ്ഞ് യു.എസിന്റെ ഹിക്കാരു നക്കാമുറ. ”ചെക്ക്മേറ്റ്: യു.എസ്.എ./ഇന്ത്യ” എന്ന പ്രദര്ശന മത്സരത്തിലാണു സംഭവം.
ഗുകേഷിനെ തോല്പ്പിച്ചതിനു പിന്നാലെയാണു നക്കാമുറ ‘രാജാവി’നെ എടുത്ത് കാണികള്ക്കിടയിലേക്കു വലിച്ചെറിഞ്ഞ് നക്കാമുറ വിജയാഘോഷം നടത്തുകയായിരുന്നു. ഇതിന്റെ വീഡിയോ സാമൂഹിക മാധ്യമങ്ങളില് വൈറലായതോടെ വിമര്ശനങ്ങള് സജീവമായി.
കരു വലിച്ചെറിഞ്ഞത് അനാദരവാണെന്നും അത്തരം വിജയാഘോഷം ചെസ് താരങ്ങള്ക്കു യോജിച്ചതല്ലെന്നുമാണു വിമര്ശനം. മുന് ലോക ചാമ്പ്യന്മാരുള്പ്പെടെയുള്ളവര് താരത്തെ വിമര്ശിച്ച് രംഗത്തെത്തി. നക്കാമുറയുടെ നടപടി ആധുനിക ചെസിനെ അപമാനിക്കുന്ന തരത്തിലാണെന്നു റഷ്യന് ഗ്രാന്മാസ്റ്റര് വ്ളാദിമിര് ക്രാംനിക് പറഞ്ഞു.
മത്സരം ജയിക്കുമ്പോള് താന് ഇത്തരത്തില് ആഘോഷിക്കാറുണ്ടെന്നും കാണികള് ആസ്വദിച്ചെന്നും നക്കാമുറ വിശദീകരിച്ചു. നക്കാമുറയെ പിന്തുണച്ചാണ് സംഘാടകര് പ്രതികരിച്ചത്. കാണികളെ രസിപ്പിക്കാനായി അദ്ദേഹത്തോട് അങ്ങനെ ചെയ്യാന് ആവശ്യപ്പെട്ടെന്നാണ് നല്കുന്ന വിശദീകരണം. ഒരു ഷോ എന്ന രീതിയില് മാത്രമാണ് ഇത്തരത്തില് ചെയ്തതെന്നും അനാദരവില്ലെന്നും നക്കാമുറ ഗുകേഷിനോട് മത്സരശേഷം പറഞ്ഞതായും സൂചനയുണ്ട്.
