ഭക്ഷണരീതി, മതം, സംസ്കാരം, ഭാഷ, രാഷ്ട്രീയ വ്യവസ്ഥ എന്നിവയുൾപ്പെടെ എല്ലാ കാര്യങ്ങളിലും പരസ്പരവിരുദ്ധമാണെങ്കിലും പാകിസ്ഥാൻ ഇപ്പോൾ ധനികരായ ചൈനീസ് പുരുഷന്മാർക്ക് വധുക്കളെ കണ്ടെത്താനുള്ള ഒരു കമ്പോളമായി മാറിയിരിക്കുന്നു. ദക്ഷിണേഷ്യയിലെ ദരിദ്ര ഇസ്ലാമിക രാജ്യമായ പാകിസ്ഥാനിലെ കുടുംബങ്ങൾക്ക് ഇവർ ഇന്ന് ഏറ്റവും കൂടുതൽ താൽപ്പര്യമുള്ള വരന്മാരാണ്.
മോശം ഭരണം, സർക്കാർ ഓഫീസുകളിലെ അഴിമതി, കാര്യക്ഷമമല്ലാത്ത വ്യവസായ മേഖല, തകർന്ന സേവന മേഖല, ക്ഷയിച്ചുകൊണ്ടിരിക്കുന്ന കൃഷി എന്നിവ കാരണം സാമ്പത്തിക പ്രതിസന്ധി നേരിടുന്ന ഒരു രാജ്യത്ത്, ബെയ്ജിംഗ് സ്പോൺസർ ചെയ്യുന്ന പദ്ധതികളിൽ ജോലി ചെയ്യുന്ന ചൈനീസ് പുരുഷന്മാർക്ക് വലിയ ഡിമാൻഡാണ്. തങ്ങളുടെ പെൺമക്കളെ ഉപരിപഠനത്തിന് അയയ്ക്കാൻ പണമില്ലാത്ത ദരിദ്രരായ മാതാപിതാക്കൾ, വരന് നല്ല ശമ്പളമുണ്ടെങ്കിൽ അവരെ വിദൂര രാജ്യത്തേക്ക് അയയ്ക്കാൻ എളുപ്പത്തിൽ തയ്യാറാകുന്നു.
ചൈന: ലിംഗ അസന്തുലിതാവസ്ഥ
യുഎൻ ലോക ജനസംഖ്യാ റിപ്പോര്ട്ട് 2024 അനുസരിച്ച്, ചൈനയിൽ 25-29 വയസ് പ്രായമുള്ള 44.4 ദശലക്ഷം പുരുഷന്മാരുള്ളപ്പോൾ, 38.4 ദശലക്ഷം സ്ത്രീകളേ ഉള്ളൂ. 20-24 വയസ് പ്രായമുള്ളവരിൽ 42.5 ദശലക്ഷം പുരുഷന്മാരും 36.3 ദശലക്ഷം സ്ത്രീകളുമുണ്ട്. മൊത്തത്തിൽ, വിവാഹ പ്രായമായ 20-29 വയസ് ഗ്രൂപ്പിൽ 86.9 ദശലക്ഷം പുരുഷന്മാരും 74.7 ദശലക്ഷം സ്ത്രീകളുമുണ്ട്. അതുകൊണ്ട്, ചൈനയിൽ 12.2 ദശലക്ഷം അധികമോ അഥവാ പെണ്ണുകിട്ടാത്ത പുരുഷന്മാരുണ്ട്. അവർക്ക് വധുക്കളെ കിട്ടുന്നില്ല. ലിംഗപരമായ ഇത്തരം അന്തരങ്ങള് ഇല്ലാതാക്കാനും വർദ്ധിച്ചു വരുന്ന പ്രായമായ ജനസംഖ്യ എന്ന വെല്ലുവിളി നേരിടാനും ഈ “ശേഷിക്കുന്ന” പുരുഷന്മാർ വിവാഹം കഴിക്കാനും കുട്ടികളുണ്ടാക്കാനും ചൈനീസ് സർക്കാർ പ്രോത്സാഹിപ്പിക്കുന്നു.
പാകിസ്ഥാനിലെ ലിംഗപരമായ അന്തരം
വേൾഡ് ഇക്കണോമിക് ഫോറത്തിന്റെ ഗ്ലോബൽ ജെൻഡർ ഗ്യാപ് റിപ്പോർട്ട് 2025 അനുസരിച്ച്, പാകിസ്ഥാനിൽ ഗണ്യമായ ലിംഗപരമായ അന്തരം നിലനിൽക്കുന്നുണ്ട്. ദീർഘകാലമായി ലിംഗസമത്വ സ്കോറിൽ ഇടിവ് രേഖപ്പെടുത്തുന്ന ഈ രാജ്യം കുറച്ചുകാലമായി സാമ്പത്തിക തകർച്ചയും അനുഭവിക്കുന്നുണ്ട്. സ്ത്രീകളുടെ സാക്ഷരത പോലുള്ള ചില മേഖലകളിൽ രാജ്യം പുരോഗതി കണ്ടിട്ടുണ്ടെങ്കിലും, അവര് വളരെക്കാലമായി സമൂഹത്തിൽ പിന്നോട്ട് നിൽക്കുകയാണ്.
ചൈനീസ് പുരുഷന്മാരെ വിവാഹം കഴിച്ച മിക്ക പാകിസ്ഥാനി സ്ത്രീകളും പൂർണ്ണമായും അന്യമായ ഈ നാട്ടിൽ ദുരിതമനുഭവിക്കുന്നു. അവിടെ അവർക്ക് ഒരു വാക്ക് പോലും ചൈനീസ് ഭാഷയിൽ മനസ്സിലാക്കാൻ കഴിയില്ല. ചൈനയിലെ പ്രധാന ഭക്ഷണമായ പന്നിയിറച്ചി അവർക്ക് കഴിക്കാൻ കഴിയില്ല; മിക്കവരും ബുദ്ധമതക്കാരോ ടാവോയിസമോ കൺഫ്യൂഷ്യനിസമോ പിന്തുടരുന്നവരോ ആയ ഒരു രാജ്യത്ത് അവർ ഇസ്ലാം മതം പിന്തുടരുന്നു. അവരിൽ മിക്കവരും ഗാർഹിക പീഡനത്തിന് ഇരയാകുകയും ലൈംഗിക അടിമകളായി മാറുകയും ചെയ്യുന്നു. ചിലർ വേശ്യാലയങ്ങളിൽ എത്തിപ്പെടുന്നു.
പാകിസ്ഥാനിലെ ദാരിദ്ര്യ വിവാഹങ്ങൾ
2019-ലാണ് ഇത്തരം വിവാഹങ്ങൾ ആദ്യമായി വാർത്തകളിൽ ഇടം നേടിയത്. അന്ന് പാകിസ്ഥാന്റെ ഫെഡറൽ ഇൻവെസ്റ്റിഗേഷൻ ഏജൻസി (എഫ്ഐഎ) യുവതികളെ ചൈനയിലേക്ക് കടത്തുന്നതായി സംശയിക്കുന്ന വേശ്യാവൃത്തി ശൃംഖലയെ തകർത്തതായി പ്രഖ്യാപിച്ചു. 52 ചൈനീസ് മനുഷ്യക്കടത്തുകാരെയും അവർ അറസ്റ്റ് ചെയ്തു. എന്നിരുന്നാലും, മാസങ്ങൾക്കുള്ളിൽ, തെളിവുകളുടെ അഭാവം മൂലമോ രാഷ്ട്രീയ സമ്മർദ്ദം മൂലമോ ഇവരിൽ മിക്കവരെയും കേസിൽ നിന്ന് ഒഴിവാക്കി.
ബ്രൂക്കിംഗ്സ് പഠനം: ചൈനീസ് വധുക്കൾ
2022-ൽ ബ്രൂക്കിംഗ്സ് ഇൻസ്റ്റിറ്റ്യൂഷൻ നടത്തിയ ഒരു പഠനമനുസരിച്ച്, ചൈനീസ് നിക്ഷേപവും സാമ്പത്തിക സഹായവും കാരണം ഇസ്ലാമാബാദ് ഈ പ്രശ്നത്തോട് കണ്ണടച്ചിരിക്കുകയാണ്. മാധ്യമ റിപ്പോർട്ടുകൾ വിശ്വസിക്കാമെങ്കിൽ, ദരിദ്രരായ മുസ്ലീം പെൺകുട്ടികൾക്ക് പുറമെ, പാകിസ്ഥാനിലെ ന്യൂനപക്ഷമായ ക്രിസ്ത്യൻ വനിതകളും ദാരിദ്ര്യത്തിൽ നിന്നും മതപരമായ പീഡനങ്ങളിൽ നിന്നും രക്ഷപ്പെടാൻ ധനികരായ ചൈനീസ് പുരുഷന്മാരെ വിവാഹം കഴിക്കാൻ സമ്മതിക്കുന്നു. “ഇരകളെ കുടുംബത്തിന് പണം നൽകിയും ചൈനയിൽ നല്ല ജീവിതം വാഗ്ദാനം ചെയ്തുമാണ് ആകർഷിച്ചിരുന്നത്, എന്നാൽ ചൈനയിൽ എത്തിക്കഴിഞ്ഞാൽ അവർ പീഡനം, ദുരിതപൂർണ്ണമായ ജീവിത സാഹചര്യങ്ങൾ, നിർബന്ധിത ഗർഭധാരണം, അല്ലെങ്കിൽ നിർബന്ധിത വേശ്യാവൃത്തി എന്നിവ അനുഭവിക്കേണ്ടി വരുന്നു” ബ്രൂക്കിംഗ്സ് ഇൻസ്റ്റിറ്റ്യൂഷൻ റിപ്പോര്ട്ട് പറയുന്നു.
ചൈനീസ് വധുക്കളെ കടത്തുന്ന ഇത്തരം കേസുകൾ പാകിസ്ഥാനിൽ മാത്രം ഒതുങ്ങുന്നില്ലെന്നും, ലാവോസ്, വടക്കൻ കൊറിയ, വിയറ്റ്നാം, മ്യാൻമർ, കംബോഡിയ എന്നിവിടങ്ങളിലും ഇത് റിപ്പോര്ട്ട് ചെയ്യപ്പെടുന്നുണ്ടെന്നും പഠനം വെളിപ്പെടുത്തുന്നു.
