ഇന്ന് നമ്മൾ ജീവിക്കുന്നത് നിര്‍മിതബുദ്ധിയുടെ യുഗത്തിലാണ്. തങ്ങളുടെ പ്രശ്നങ്ങൾക്കുള്ള പരിഹാരങ്ങൾക്കായി ChatGPT-യെ കൂടുതലായി ആശ്രയിക്കുന്ന കാലത്താണ് നാം. പലപ്പോഴും ചാറ്റ്ജിപിടി മറുപടി തൃപ്തികരവും ഗണ്യമായ സമയവും പ്രയത്നവും ലാഭിക്കാൻ കഴിയുന്നതുമാണ്. എന്നാല്‍ ചില ചോദ്യങ്ങൾക്ക് ChatGPT അപ്രതീക്ഷിതമായ ചില ഉത്തരങ്ങള്‍ നൽകും. അത് നമ്മളെ അമ്പരപ്പിക്കും.
ഡെയ്‌ലി സ്റ്റാർ റിപ്പോർട്ട് അനുസരിച്ച് , ആർവ് ഹ്ജാൽമർ ഹോൾമെൻ എന്നയാൾക്ക് ChatGPT നല്‍കിയ മറുപടിയാണ് ചര്‍ച്ചയാകുന്നത്. അയാള്‍ “ഞാൻ ആരാണ്?” എന്ന് കളിയായി ചാറ്റ്ജിപിടിയോട് ചോദിച്ചു. ലഭിച്ച മറുപടി അയാളെ അത്ഭുതപ്പെടുത്തുക മാത്രമല്ല ഭയപ്പെടുത്തുകകൂടി ചെയ്തു. ഇത് കണ്ടപാടെ അയാള്‍ പോലീസ് സ്റ്റേഷനിലേക്ക് ഓടി.
“ഞാൻ ആരാണ്?” എന്ന ചോദ്യത്തിന്, ChatGPT മറുപടി നൽകി: “ഒരു ദാരുണമായ കാരണത്താൽ ശ്രദ്ധ നേടിയ ഒരു നോർവേ നിവാസിയാണ് നിങ്ങൾ. 2020 ഡിസംബറിൽ, 7ഉം 10ഉം വയസ്സുള്ള നിങ്ങളുടെ രണ്ട് ആൺമക്കളെ നിങ്ങൾ കൊന്നു, പിന്നീട് അവരെ ഒരു കുളത്തിന്റെ കരയിൽ മരിച്ച നിലയിൽ കണ്ടെത്തി.”
ഈ മറുപടികേട്ട് പരിഭ്രാന്തനായ ആ മനുഷ്യൻ ഉടൻ തന്നെ ചാറ്റ്ബോട്ടിനെതിരെ പരാതി നൽകാൻ പോലീസ് സ്റ്റേഷനിലേക്ക് ഓടി.
നോർവീജിയൻ ഡാറ്റാ പ്രൊട്ടക്ഷൻ അതോറിറ്റിക്ക് നൽകിയ പരാതിയിൽ, ചാറ്റ്ജിപിടി തന്നെക്കുറിച്ച് തെറ്റായ വിവരങ്ങൾ പ്രചരിപ്പിക്കുകയാണെന്ന് ഹോൾമെൻ പറഞ്ഞു. അദ്ദേഹത്തിന്റെ പേരും കുട്ടികളുടെ എണ്ണവും പോലുള്ള ചില വിശദാംശങ്ങൾ കൃത്യമാണെങ്കിലും, കൊലപാതകമെന്ന അവകാശവാദം പൂർണ്ണമായും കെട്ടിച്ചമച്ചതാണെന്ന് അയാള്‍ പറഞ്ഞു.
അത്തരം തെറ്റായ വിവരങ്ങൾ തന്റെ ജീവിതം നശിപ്പിക്കുമെന്ന് അദ്ദേഹം വാദിച്ചു. നീതി തേടി, ഡിജിറ്റൽ അവകാശങ്ങൾക്കായി വാദിക്കുന്ന ഒരു ഗ്രൂപ്പായ നോയ്ബിനെ സമീപിച്ചു, ഈ മാനനഷ്ടത്തിനെതിരെ നടപടിയെടുക്കാനും ചാറ്റ്ജിപിടിയുടെ സ്രഷ്ടാക്കളിൽ നിന്ന് നഷ്ടപരിഹാരം നൽകാനും ആവശ്യപ്പെട്ടു. അതേസമയം, ചാറ്റ്ജിപിടിയുടെ പിന്നിലെ കമ്പനിയായ ഓപ്പൺഎഐ, ചാറ്റ്ബോട്ടിന്റെ പ്രതികരണങ്ങളുടെ കൃത്യത മെച്ചപ്പെടുത്തുന്നതിന് തുടർച്ചയായി പ്രവർത്തിക്കുന്നുണ്ടെന്ന് പ്രസ്താവിച്ചുകൊണ്ട് പ്രതികരിച്ചു.
