Sports

ട്രംപിനൊപ്പം ഗോള്‍ഫ് കളിക്കുന്ന എംഎസ് ധോണി ; പഴയ വീഡിയോ വീണ്ടും

അമേരിക്കന്‍ പ്രസിഡന്റായി വീണ്ടും തിരഞ്ഞെടുക്കപ്പെട്ട യുഎസ് പ്രസിഡന്റ് ഡൊണാള്‍ഡ് ട്രംപിനൊപ്പം മുന്‍ ഇന്ത്യന്‍ ക്രിക്കറ്റ് ക്യാപ്റ്റന്‍ എംഎസ് ധോണി ഗോള്‍ഫ് കളിക്കുന്ന പഴയ വീഡിയോ വീണ്ടും പ്രത്യക്ഷപ്പെട്ടു. ട്രംപ് നാഷണല്‍ ഗോള്‍ഫ് ക്ലബിലെ ഒരു ഗോള്‍ഫ് സെഷനില്‍ എടുത്ത ക്ലിപ്പ്, 2024 ലെ യുഎസ് പ്രസിഡന്റ് തിരഞ്ഞെടുപ്പില്‍ കമലാ ഹാരിസിനെ പരാജയപ്പെടുത്തിയ ട്രംപിന്റെ വിജയത്തെ തുടര്‍ന്ന് സോഷ്യല്‍ മീഡിയയില്‍ വൈറലായിരിക്കുകയാണ്.

ധോനിയുടെ ആരാധകര്‍ ഉടന്‍ തന്നെ വീഡിയോ തിരികെ കൊണ്ടുവരികയും വിവിധ സോഷ്യല്‍ പ്ലാറ്റ്ഫോമുകളില്‍ വ്യാപകമായി ഷെയര്‍ ചെയ്യുകയും ചെയ്തു. കഴിഞ്ഞ വര്‍ഷം യുഎസ് ഓപ്പണ്‍ 2023-ല്‍ കാര്‍ലോസ് അല്‍കാരസും അലക്സാണ്ടര്‍ സ്വെരേവും തമ്മിലുള്ള ക്വാര്‍ട്ടര്‍ ഫൈനല്‍ മത്സരം കാണാനെത്തിയപ്പോള്‍ മുന്‍ പ്രസിഡന്റും ഇന്ത്യയുടെ ക്രിക്കറ്റ് ഇതിഹാസവും തമ്മിലുള്ള അപ്രതീക്ഷിത സൗഹൃദം പ്രദര്‍ശിപ്പിച്ചുകൊണ്ട് അദ്ദേഹം ഒരു റൗണ്ട് ഗോള്‍ഫിനായി ട്രംപിനൊപ്പം ചേരുകയായിരുന്നു.

ട്രംപിനെ സംബന്ധിച്ചിടത്തോളം ഇന്ത്യന്‍ ക്രിക്കറ്റ് ഐക്കണുകളുമായുള്ള ഈ ബന്ധം പുതിയതല്ല. 2020 ലെ ഇന്ത്യാ സന്ദര്‍ശന വേളയില്‍, ക്രിക്കറ്റ് ഇതിഹാസങ്ങളായ സച്ചിന്‍ ടെണ്ടുല്‍ക്കറിനെയും വിരാട് കോഹ്ലിയെയും ‘ലോകത്തിലെ ഏറ്റവും മികച്ച രണ്ട് ക്രിക്കറ്റ് കളിക്കാര്‍’ എന്ന് പരാമര്‍ശിച്ച് അദ്ദേഹം ശ്രദ്ധ നേടിയിരുന്നു. ട്രംപ് സ്‌പോര്‍ട്‌സ് മനസ്സിലാക്കുക മാത്രമല്ല, ഇന്ത്യയുടെ ക്രിക്കറ്റ് സംസ്‌കാരത്തെ ബഹുമാനിക്കുകയും ചെയ്യുന്നതിലൂടെ അമേരിക്കയിലെ ഇന്ത്യാക്കാരുടെ പിന്തുണ നേടുകയും ചെയ്യുന്നു.

2019ല്‍ ന്യൂയോര്‍ക്ക് ഗോള്‍ഫ് കോഴ്സില്‍ വെച്ച് ട്രംപ് സുനില്‍ ഗവാസ്‌കറുമായി നടത്തിയ തമാശയും വലിയ ശ്രദ്ധ നേടിയിരുന്നു. പാകിസ്ഥാന്‍ ക്രിക്കറ്റ് ഇതിഹാസവും അന്നത്തെ പ്രധാനമന്ത്രിയുമായിരുന്ന ഇമ്രാന്‍ ഖാനെക്കുറിച്ചുള്ള ജിജ്ഞാസ ഗവാസ്‌കര്‍ ഓര്‍മ്മിപ്പിച്ചു. ”ഖാന്‍” എത്ര നല്ലയാളാണ്” എന്ന ട്രംപിന്റെ ചോദ്യത്തോട് സല്‍മാന്‍, ആമിര്‍, ഷാരൂഖ് തുടങ്ങിയ ബോളിവുഡ് താരങ്ങളില്‍ ഏതു ഖാന്റെ കാര്യമാണെന്ന് ചോദിച്ചായിരുന്നു ഗവാസ്‌ക്കര്‍ തിരിച്ചടിച്ചത്.