മദ്യപാനികളിൽ കണ്ടുവരുന്ന കുടവയർ കേവലം ഒരു സൗന്ദര്യപ്രശ്നമല്ല, മറിച്ച് ഗുരുതരമായ ആരോഗ്യപ്രതിസന്ധിയാണ്. പലപ്പോഴും തമാശരൂപേണ ഇതിനെ കാണാറുണ്ടെങ്കിലും ശരീരത്തിനുള്ളിൽ അടിഞ്ഞുകൂടുന്ന ഈ കൊഴുപ്പ് ദൂരവ്യാപകമായ പ്രത്യാഘാതങ്ങൾ ഉണ്ടാക്കുന്നു. പ്രധാനമായും രണ്ടുതരത്തിലാണ് വയർ ചാടുന്നത്; ആരോഗ്യപരമായ കാരണങ്ങളാലും നമ്മൾ സ്വയം വരുത്തിവെക്കുന്ന ശീലങ്ങൾ മൂലവും.
ഇതിൽ മദ്യപാനം മൂലം ഉണ്ടാകുന്ന കുടവയറിനെ ‘ബിയർ ബെല്ലി’ എന്നാണ് വിളിക്കുന്നത്. മദ്യം ശരീരത്തിന് യാതൊരു പോഷകഗുണവുമില്ലാത്ത ‘എംപ്റ്റി കലോറി’ (Empty Calories) ആണ് നൽകുന്നത്. ഒരു ഗ്രാം ആൽക്കഹോളിൽ ഏഴ് കലോറി ഊർജ്ജം അടങ്ങിയിട്ടുണ്ടെന്നാണ് കണക്ക്.
മദ്യം ശരീരത്തിലെത്തുമ്പോൾ നമ്മുടെ ഉപാപചയ പ്രവർത്തനങ്ങളിൽ (Metabolism) വലിയ മാറ്റങ്ങൾ സംഭവിക്കുന്നു. സാധാരണഗതിയിൽ ശരീരം കൊഴുപ്പിനെയും കാർബോഹൈഡ്രേറ്റിനെയുമാണ് ഊർജ്ജത്തിനായി ഉപയോഗിക്കുന്നത്. എന്നാൽ മദ്യം അകത്തെത്തിയാൽ, അത് വിഘടിപ്പിക്കാനാണ് ശരീരം മുൻഗണന നൽകുന്നത്. ഈ സമയത്ത് മറ്റ് കൊഴുപ്പുകൾ കത്തുന്ന പ്രക്രിയ സാവധാനത്തിലാവുകയും അവ ശരീരത്തിൽ സംഭരിക്കപ്പെടുകയും ചെയ്യുന്നു. ഇങ്ങനെ അടിഞ്ഞുകൂടുന്ന കൊഴുപ്പ് പ്രധാനമായും വയറിന് ചുറ്റുമുള്ള ആന്തരികാവയവങ്ങളിലാണ് കേന്ദ്രീകരിക്കുന്നത്. ഇതിനെയാണ് ‘വിസറൽ ഫാറ്റ്’ (Visceral Fat) എന്ന് വിളിക്കുന്നത്. ഇത് പേശികളുടെ ആരോഗ്യത്തെയും ഹോർമോൺ സന്തുലിതാവസ്ഥയെയും ദോഷകരമായി ബാധിക്കുന്നു.
ബിയർ മാത്രമല്ല, കാർബണേറ്റഡ് പാനീയങ്ങളും ഇത്തരത്തിൽ തടി കൂടാൻ കാരണമാകാറുണ്ട്. ആന്തരികാവയവങ്ങൾക്ക് ചുറ്റും കൊഴുപ്പ് അമിതമായി പടരുന്നത് ഹൃദയസംബന്ധമായ അസുഖങ്ങൾക്കും മറ്റ് ദീർഘകാല ആരോഗ്യപ്രശ്നങ്ങൾക്കും വഴിവെക്കും. മിതമായ അളവിൽ മദ്യപിക്കുന്നവരിൽ പോലും അരക്കെട്ടിന് ചുറ്റും കൊഴുപ്പ് അടിഞ്ഞുകൂടാൻ സാധ്യതയുള്ളതിനാൽ, കുടവയർ കുറയ്ക്കാനാവശ്യമായ മുൻകരുതലുകൾ എടുക്കുന്നത് ആരോഗ്യകരമായ ജീവിതത്തിന് അനിവാര്യമാണ്.
