വിവാഹത്തിൽ പങ്കെടുത്ത അതിഥികളിൽ നിന്ന് പണം ഈടാക്കി, അത് ജീവകാരുണ്യ പ്രവർത്തനങ്ങൾക്കായി നൽകി ഈ ദമ്പതികൾ. അമേരിക്കയിൽ നിന്നുള്ള സ്റ്റീവ് ജെ. ലാർസൺ, മാർലി ജാക്വസ് എന്നിവരാണ് ഈ വ്യത്യസ്തമായ ആശയം നടപ്പാക്കിയത്. ഇവർ തങ്ങളുടെ വിവാഹത്തെ ഒരു ഫണ്ട് റെയ്സിങ് പരിപാടിയായാണ് നടത്തിയത്.
വേറിട്ടൊരു വിവാഹം
ബിസിനസ് പരിപാടികൾ സംഘടിപ്പിക്കുന്നതിൽ വിദഗ്ധരായ സ്റ്റീവും മാർലിയും, പരമ്പരാഗത വിവാഹങ്ങളുടെ ഉയർന്ന ചിലവ് ഒഴിവാക്കാനാണ് ഇങ്ങനെയൊരു വഴി തിരഞ്ഞെടുത്തത്. അതിഥികൾ സാധാരണയായി ദമ്പതികൾക്ക് നൽകുന്ന സമ്മാനങ്ങൾ വാങ്ങുന്നതിന് പകരം, വിവാഹ സൽക്കാരത്തിലെ ഭക്ഷണത്തിന്റെ ചിലവ് വഹിക്കാൻ അവർ ആവശ്യപ്പെട്ടു. ഇത് ഒരു ജീവകാരുണ്യ പ്രവർത്തനത്തിന് ഉപയോഗിക്കുകയും ചെയ്തു.
പങ്കെടുക്കുന്ന അതിഥികൾക്കായി രണ്ട് തരം ടിക്കറ്റുകളാണ് ദമ്പതികൾ ഒരുക്കിയത്. സാധാരണ ടിക്കറ്റ്: ഏകദേശം 4750 രൂപ ആയിരുന്നു ഇതിന്റെ വില. ഈ ടിക്കറ്റ് എടുത്തവർക്ക് ആഡംബര ഐസ്ക്രീം, കുക്കികൾ, കേക്ക് എന്നിവയും ലൈവ് ഡിജെ, കലാകാരന്മാരുടെ പ്രകടനങ്ങളും ആസ്വദിക്കാൻ അവസരം ലഭിച്ചു.
വിഐപി ടിക്കറ്റ്: ഏകദേശം 83,000 രൂപ വില വരുന്ന ഈ ടിക്കറ്റ് എടുത്തവർക്ക് (രണ്ടുപേർക്ക് വീതം) സാധാരണ ടിക്കറ്റിലുള്ള സൗകര്യങ്ങൾ കൂടാതെ ബ്രീത്ത് വർക്ക്, റെഡ് ലൈറ്റ് തെറാപ്പി, ബ്രെയിൻ ഒപ്റ്റിമൈസേഷൻ തുടങ്ങിയ വെൽനസ് പരിപാടികളിൽ പങ്കെടുക്കാനുള്ള അവസരവും ലഭിച്ചു.
100 സാധാരണ ടിക്കറ്റുകളും 30 വിഐപി ടിക്കറ്റുകളും വിറ്റുപോയിരുന്നു. അടുത്ത സുഹൃത്തുക്കൾക്കും കുടുംബാംഗങ്ങൾക്കും വിവാഹത്തിൽ സൗജന്യ പ്രവേശനം നൽകിയിരുന്നു.
ജീവകാരുണ്യ പ്രവർത്തനത്തിന്
ഈ നീക്കം വിമർശനങ്ങൾക്ക് വഴിവെച്ചപ്പോൾ, സ്റ്റീവും മാർലിയും തങ്ങളുടെ യഥാർത്ഥ ഉദ്ദേശം വെളിപ്പെടുത്തി. സാമ്പത്തിക ലാഭത്തിനായിട്ടല്ല, മറിച്ച് ജീവകാരുണ്യ പ്രവർത്തനങ്ങൾക്കായിട്ടാണ് ഇങ്ങനെയൊരു വിവാഹം സംഘടിപ്പിച്ചതെന്ന് അവർ വ്യക്തമാക്കി. ഇങ്ങനെ സമാഹരിച്ച ഏകദേശം 1.16 കോടി രൂപ കെനിയയിലെ കുട്ടികളുടെ വിദ്യാഭ്യാസത്തിനും അടിസ്ഥാന സൗകര്യങ്ങൾക്കും വേണ്ടി പ്രവർത്തിക്കുന്ന വില്ലേജ് ഇംപാക്റ്റ് എന്ന ലാഭേച്ഛയില്ലാത്ത സംഘടനയ്ക്ക് കൈമാറി.
