ഹൃദയാഘാതത്തിനെ നെഞ്ചെരിച്ചിലായി തെറ്റിദ്ധരിച്ച് പലരും വേണ്ട ചികിത്സ നേടാത്തത് പലപ്പോഴും അപകടകരമാകാറുണ്ട് . നേരേ തിരിച്ച് നെഞ്ചെരിച്ചിലിനെ ഹൃദയാഘാതമായി കാണുന്നവരും ഒട്ടും കുറവല്ല.
നെഞ്ചിന്റെ മധ്യഭാഗത്തായി സ്റ്റെര്‍ണം എന്ന എല്ലിന് പിന്നില്‍ വരുന്ന ഒരു എരിച്ചിലാണ് നെഞ്ചെരിച്ചില്‍. ഇത് സംഭവിക്കുന്നതാവട്ടെ വയറില്‍ നിന്ന് അന്നനാളിയിലൂടെ ദഹനരസങ്ങള്‍ തിരിച്ച് കയറി വരുന്ന ആസിഡ് റീഫ്ളക്സ് കൊണ്ടാണ്. ഹൃദയത്തിലേക്കുള്ള രക്ത വിതരണം ഹൃദയപേശികളുടെ ക്ഷതം കൊണ്ട് നിന്നു പോകുന്ന സാഹചര്യമാണ് ഹൃദയാഘാതം.
ഭക്ഷണം കഴിച്ചതിന് ശേഷമാണ് പലപ്പോഴും നെഞ്ചെരിച്ചില്‍ അനുഭവപ്പെടുന്നതെന്നും കിടക്കുമ്പോള്‍ ഇതിന് രൂക്ഷതയേറുമേന്നും കൊച്ചിയിലെ ഗ്യാസ്ട്രോ എന്ററോളജിസ്റ്റും ഐ എം എ കേരള റിസര്‍ച്ച് സെല്‍ ചെയര്‍മാനുമായ ഡോ രാജീവ് ജയരാജന്‍ ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തില്‍ പറയുന്നുണ്ട്.
അമിതമായ ഉമിനീരും കഴിച്ച ഭക്ഷണത്തിന്റെ അംശങ്ങള്‍ തിരിച്ച് തൊണ്ടയിലെത്തുന്ന സാഹചര്യവും ഇത് മൂലം ഉണ്ടാകാം. കൂടുതല്‍ തീവ്രമായ വേദനയാണ് ഹൃദയാഘാതം ഉണ്ടാക്കുന്നത്. അമിതമായ രീതിയില്‍ വിയര്‍പ്പും ഛര്‍ദ്ദിയും ഇതിനാല്‍ ഉണ്ടാകാം. ഹൃദയാഘാത സമയത്തുള്ള വേദന കഴുത്തിലേക്കും തോളിലേക്കും കൈകളിലേക്കും പടരാമെന്നും ഡോക്ടര്‍ വ്യക്തമാക്കുന്നുണ്ട്.
ജീവിതശൈലി മാറ്റങ്ങള്‍ ആസിഡ് റീഫ്ളക്സ് കുറയ്ക്കാന്‍ സഹായിക്കും. സമയം തെറ്റിയ ഭക്ഷണം കഴിപ്പ്, എണ്ണ,കാപ്പി, മദ്യം എന്നിവയും ആസിഡ് റിഫ്ളക്സിലേക്ക് നയിച്ചേക്കാം.
