ഭക്ഷണം കഴിഞ്ഞാലുടൻ ഉറങ്ങുന്നവരാണോ നിങ്ങൾ? എങ്കിൽ ഇതറിഞ്ഞിരിക്കണം

നിറങ്ങളുടെ ഉത്സവമായ ഹോളി കേവലം വർണ്ണങ്ങളുടേത് മാത്രമല്ല, രുചികരമായ ഭക്ഷണങ്ങളുടേത് കൂടിയാണ്. ഖോയയും അണ്ടിപ്പരിപ്പും നിറച്ച ഗുജിയകൾ, മത്രി, മൽപുവ, തണ്ടായ് എന്നിങ്ങനെ വിഭവസമൃദ്ധമായ വിരുന്നുകൾ പലപ്പോഴും അമിതാഹാരത്തിലേക്ക് നയിക്കാറുണ്ട്. ആഹാരം കഴിഞ്ഞാലുടൻ കണ്ണ് തളരുകയും ശരീരം തളർച്ചയിലേക്ക് വീഴുകയും ചെയ്യുന്നത് സ്വാഭാവികമാണ്. ഈ സമയത്ത് ഒരു ഉറക്കം അനിവാര്യമാണെന്ന് തോന്നാം. എന്നാൽ ആ പ്രലോഭനത്തിന് വഴങ്ങണോ?

ഭക്ഷണം കഴിഞ്ഞാലുടൻ ഉറങ്ങുന്നത് സുഖകരമായി തോന്നാമെങ്കിലും, ഇത് ദഹനപ്രശ്നങ്ങൾ, അസിഡിറ്റി , മന്ദത എന്നിവയ്ക്ക് കാരണമാകും. അമിതഭക്ഷണത്തിന് ശേഷം എപ്പോൾ ഉറങ്ങണം എന്നതിനെക്കുറിച്ച് കൂടുതൽ അറിയാം.

ദഹനം എങ്ങനെ നടക്കുന്നു?

ഭക്ഷണം ആമാശയത്തിലെത്തുന്ന നിമിഷം മുതൽ ദഹനം ആരംഭിക്കുന്നു. അടുത്ത 2 മുതൽ 4 മണിക്കൂർ വരെ ഗ്യാസ്ട്രിക് ജ്യൂസുകൾ ഭക്ഷണത്തെ ലഘൂകരിക്കുന്നു. തുടർന്ന് 3 മുതൽ 6 മണിക്കൂർ എടുത്ത് ചെറുകുടൽ പോഷകങ്ങൾ ആഗിരണം ചെയ്യുന്നു. കാർബോഹൈഡ്രേറ്റുകൾ കഴിക്കുമ്പോഴുണ്ടാകുന്ന ഇൻസുലിൻ വർദ്ധനവ് ഉറക്കം വരാൻ കാരണമാകുന്നു. ഈ സമയത്ത് രക്തയോട്ടം ദഹനത്തിനായി കുടലുകളിലേക്ക് കേന്ദ്രീകരിക്കുന്നതും ഉറക്കത്തിന് കാരണമാകുന്നു. എന്നാൽ ആഹാരം കഴിഞ്ഞ് 30 മിനിറ്റിനുള്ളിൽ കിടക്കുന്നത് നെഞ്ചെരിച്ചിലിനും ഉറക്കത്തിന്റെ ഗുണനിലവാരം കുറയ്ക്കാനും കാരണമാകുമെന്ന് പഠനങ്ങൾ പറയുന്നു.

കൃത്യസമയത്തുള്ള ലഘുനിദ്രയുടെ ഗുണങ്ങൾ

• മാനസിക ഉന്മേഷം: 20-30 മിനിറ്റ് നീളുന്ന ചെറിയ ഉറക്കം തലച്ചോറിന് ഉന്മേഷം നൽകുകയും ഏകാഗ്രതയും ഓർമ്മശക്തിയും വർദ്ധിപ്പിക്കുകയും ചെയ്യുന്നു.
• ദഹനത്തെ സഹായിക്കുന്നു: വിശ്രമം ഭക്ഷണത്തെ ദഹനപ്രക്രിയയിലൂടെ കടന്നുപോകാൻ സഹായിക്കുകയും വയറിലെ ഭാരവും വീക്കവും കുറയ്ക്കുകയും ചെയ്യുന്നു.
• ഹൃദയാരോഗ്യം: 30 മിനിറ്റിൽ താഴെയുള്ള ഉറക്കം രക്തസമ്മർദ്ദം കുറയ്ക്കാനും ഹൃദയത്തിന് ആശ്വാസം നൽകാനും സഹായിക്കും.

പെട്ടെന്നുള്ളതോ നീണ്ടതോ ആയ ഉറക്കത്തിന്റെ ദോഷങ്ങൾ

• അസിഡിറ്റിയും ദഹനക്കേടും: ഭക്ഷണത്തിന് ശേഷം 30 മിനിറ്റിനുള്ളിൽ ഉറങ്ങുന്നത് വയറ്റിലെ ആസിഡ് മുകളിലേക്ക് വരാനും നെഞ്ചെരിച്ചിലിനും കാരണമാകും.
• ശരീരഭാരം കൂടുന്നു: 30 മിനിറ്റിൽ കൂടുതൽ ഉറങ്ങുന്നത് രാത്രിയിലെ ഉറക്കത്തെ ബാധിക്കുകയും വിശപ്പ് വർദ്ധിപ്പിക്കുന്ന ഹോർമോണുകളുടെ ഉത്പാദനം കൂട്ടുകയും ചെയ്യും. ഇത് കൂടുതൽ കലോറി കഴിക്കാൻ നിങ്ങളെ പ്രേരിപ്പിക്കും.
• രക്തത്തിലെ പഞ്ചസാര: നീണ്ട ഉറക്കം രക്തത്തിലെ പഞ്ചസാരയുടെ അളവിൽ വ്യതിയാനങ്ങൾ ഉണ്ടാക്കിയേക്കാം.
• ഉറക്കചക്രം തെറ്റുന്നു: ഉച്ചകഴിഞ്ഞ് 3 മണിക്ക് ശേഷമുള്ള ഉറക്കം രാത്രിയിലെ അഗാധ നിദ്രയെ തടസ്സപ്പെടുത്തും.

ഭക്ഷണം കഴിഞ്ഞാൽ എപ്പോൾ ഉറങ്ങണം?

നാഷണൽ സ്ലീപ്പ് ഫൗണ്ടേഷൻ നിർദ്ദേശിക്കുന്ന സമയക്രമം താഴെ നൽകുന്നു:

• ഭക്ഷണം കഴിഞ്ഞ് 0-30 മിനിറ്റ്: ഉറങ്ങരുത്. ഈ സമയം നിവർന്നു തന്നെ ഇരിക്കുക. 10-15 മിനിറ്റ് സാവധാനം നടക്കുന്നത് ദഹനത്തിന് നല്ലതാണ്.
• 30-60 മിനിറ്റ്: ഒരു ചെറിയ ‘പവർ നാപ്പിന്’ (Power nap) ഏറ്റവും അനുയോജ്യമായ സമയമാണിത്. 10-20 മിനിറ്റ് മാത്രം ഉറങ്ങാൻ ശ്രദ്ധിക്കുക.
• 1-2 മണിക്കൂർ: നിങ്ങൾക്ക് അല്പം കൂടി കൂടുതൽ സമയം (20-30 മിനിറ്റ്) ഉറങ്ങണമെന്നുണ്ടെങ്കിൽ ഈ സമയം തിരഞ്ഞെടുക്കാം.
• 2 മണിക്കൂറിന് ശേഷം: ഈ സമയത്തിന് ശേഷം ഉറക്കം ഒഴിവാക്കുന്നതാണ് നല്ലത്. പകരം ലഘുവായ ജോലികളിൽ ഏർപ്പെടാം.