എന്തുകൊണ്ടാണ് താന്‍ ഇന്ത്യയില്‍ സ്വിം സ്യൂട്ട് ധരിയ്ക്കാതിരിയ്ക്കുന്നതെന്ന് തുറന്നു പറഞ്ഞ് ബോളിവുഡ് നടി സൊനാക്ഷി സിന്‍ഹ. അടുത്തിടെ നല്‍കിയ ഒരു അഭിമുഖത്തിലായിരുന്നു താരത്തിന്റെ ഈ തുറന്നു പറച്ചില്‍. ഇന്ത്യയില്‍ വെച്ച് സ്വിം സ്യൂട്ട് ധരിയ്ക്കുമ്പോള്‍ ആളുകള്‍ നോക്കുന്ന രീതി കാരണം തനിക്ക് അസ്വസ്ഥതയുണ്ടാകാറുണ്ടെന്ന് അവര്‍ പറഞ്ഞു.
തനിക്ക് നീന്തല്‍ ഇഷ്ടമാണെന്നും എന്നാല്‍ ഇന്ത്യയില്‍ സ്വിം സ്യൂട്ട് ധരിച്ചുള്ള നീന്തല്‍ ഒഴിവാക്കാറുണ്ടെന്നും സൊനാക്ഷി പങ്കുവെച്ചു. എന്നാല്‍ മറ്റ് രാജ്യങ്ങളില്‍ സ്വിം സ്യൂട്ട് ധരിച്ചു നീന്തുന്നതില്‍ തനിക്ക് ഭയമില്ലെന്നും അവിടെ ആളുകള്‍ തന്നെ തുറിച്ചു നോക്കാറില്ലെന്നും അവര്‍ പറഞ്ഞു. അവിടെ കൂടുതല്‍ സ്വാതന്ത്ര്യവും ആശ്വാസവും ലഭിക്കുന്നുണ്ട്. പല നടിമാരും സമാനമായ പ്രശ്നങ്ങള്‍ നേരിടുന്നതിനെക്കുറിച്ചും അവര്‍ പറഞ്ഞു. ഇന്ത്യയിലെ ആളുകള്‍ പലപ്പോഴും അവരുടെ വസ്ത്രത്തിന്റെ പേരില്‍ അവരെ വിലയിരുത്തുന്നതായി അവര്‍ കരുതുന്നു. എല്ലാവര്‍ക്കും ഭയമില്ലാതെ ഇഷ്ടമുള്ളത് ധരിക്കാന്‍ കഴിയണമെന്ന് സൊനാക്ഷി വിശ്വസിക്കുന്നു.
സ്വിം സ്യൂട്ട് ധരിക്കുന്നതില്‍ തനിക്ക് എപ്പോഴും നാണക്കേട് തോന്നിയിരുന്നു, പ്രത്യേകിച്ച് ചെറുപ്പത്തില്‍ എന്ന് സോനാക്ഷി സിന്‍ഹ പറഞ്ഞു. സോനാക്ഷി മുംബൈയിലോ ഇന്ത്യയിലെ മറ്റ് പ്രശസ്ത സ്ഥലങ്ങളിലോ സ്വിം സ്യൂട്ട് ധരിച്ച് നീന്തുന്നത് ഒഴിവാക്കുമായിരുന്നു. കാരണം ആരെങ്കിലും തന്റെ ചിത്രം രഹസ്യമായി എടുത്ത് ഓണ്‍ലൈനില്‍ ഷെയര്‍ ചെയ്‌തേക്കുമെന്ന് അവള്‍ ആശങ്കപ്പെട്ടിരുന്നു. തന്റെ അത്തരത്തിലുള്ള ഫോട്ടോകള്‍ സോഷ്യല്‍ മീഡിയയില്‍ വൈറല്‍ ആകുന്നത് തനിക്ക് ഇഷ്ടമല്ലെന്നും അവര്‍ പറഞ്ഞു.
ഇന്ത്യയിലെ സ്ത്രീകള്‍ നേരിടുന്ന സ്വകാര്യതയും ബഹുമാന്യതെയും ചോദ്യം ചെയ്യുന്നതാണ് സൊനാക്ഷിയുടെ ഈ വാക്കുകള്‍.
