കാനഡയിലെ ഏറ്റവും വലിയ സ്വർണ്ണ കൊള്ളയുമായി ബന്ധപ്പെട്ട് പോലീസ് അന്വേഷിക്കുന്ന എയർ കാനഡയുടെ മുൻ മാനേജർ സിമ്രാൻ പ്രീത് പനേസർ, കുടുംബത്തോടൊപ്പം ചണ്ഡീഗഡിന്റെ പ്രാന്തപ്രദേശത്ത് താമസിക്കുന്നതായി ദി ഇന്ത്യൻ എക്സ്പ്രസ് റിപ്പോർട്ട് ചെയ്യുന്നു. പത്രം സിബിസി ന്യൂസുമായി സഹകരിച്ച് നടത്തിയ അന്വേഷണത്തിലാണ് സിമ്രാന്‍പ്രീത് പനേസറിനെ കണ്ടെത്തിയത്.
2023 ഏപ്രിൽ 17 ന്, ടൊറന്റോ പിയേഴ്സൺ അന്താരാഷ്ട്ര വിമാനത്താവളത്തിലെ സുരക്ഷിത സംഭരണ കേന്ദ്രത്തിൽ നിന്ന് 22 മില്യൺ കനേഡിയൻ ഡോളറിലധികം (20 മില്യൺ യുഎസ് ഡോളറിൽ കൂടുതൽ) സ്വർണ്ണക്കട്ടികളും വിദേശ കറൻസിയും വഹിച്ചുകൊണ്ടുള്ള ഒരു എയർ കാർഗോ കണ്ടെയ്നർ മോഷ്ടിക്കപ്പെട്ടു. സ്വിറ്റ്സർലൻഡിലെ സൂറിച്ചിൽ നിന്നുള്ള എയർ കാനഡ വിമാനത്തിലാണ് കണ്ടെയ്നർ എത്തിയതെന്നും വ്യാജ രേഖകൾ ഉപയോഗിച്ച് നീക്കം ചെയ്തതായും പീൽ റീജിയണൽ പോലീസ് റിപ്പോർട്ട് ചെയ്തു.
ഭാര്യ പ്രീതി പനേസറും അദ്ദേഹത്തോടൊപ്പം താമസിക്കുന്നതായി കണ്ടെത്തി. മുന്‍ മിസ് ഇന്ത്യ ഉഗാണ്ടയും ഗായികയും അഭിനേതാവുമാണ് പ്രീതി. അവര്‍ക്ക് മോഷണത്തില്‍ പങ്കില്ലെന്ന് വിശ്വസിക്കപ്പെടുന്നു.
ലാന്‍ഡിംഗിന് ശേഷം, വിമാനത്തില്‍ നിന്ന് കണ്ടെയ്നർ ഇറക്കി എയര്‍പോര്‍ട്ട് പ്രോപ്പര്‍ട്ടിയിലെ മറ്റൊരു സ്ഥലത്തേക്ക് കൊണ്ടുപോയി. ഒരു ദിവസത്തിനുശേഷം ഏപ്രില്‍ 18ന് പുലര്‍ച്ചെ, ചരക്ക് കാണാതായതായി റിപ്പോര്‍ട്ട് ചെയ്തു. ഒരു വര്‍ഷത്തോളം നീണ്ട അന്വേഷണത്തിന് ഒടുവില്‍, ഇന്ത്യൻ വംശജരായ ആർച്ചിത് ഗ്രോവർ, പർമ്പാൽ സിദ്ധു, അമിത് ജലോട്ട, അമ്മദ് ചൗധരി, അലി റാസ, പ്രസാത് പരമലിംഗം എന്നിവരുൾപ്പെടെ നിരവധി വ്യക്തികളെ അധികൃതർ അറസ്റ്റ് ചെയ്തു.
എന്നാല്‍, രണ്ട് പ്രധാന പ്രതികളായ ബ്രാംപ്ടണിൽ നിന്നുള്ള സിമ്രാൻ പ്രീത് പനേസർ (31), മിസിസാഗയിൽ നിന്നുള്ള അർസലൻ ചൗധരി എന്നിവർ ഒളിവിലാണ്. മോഷണം നടന്ന സമയത്ത് എയർ കാനഡ മാനേജരായി ജോലി ചെയ്തിരുന്ന പനേസർ, കവർച്ചയ്ക്ക് ശേഷം പോലീസിന് സംഭരണ കേന്ദ്രം സന്ദർശിക്കാൻ സൗകര്യമൊരുക്കിയതായി റിപ്പോർട്ടുണ്ട്. 2024 മെയ് മാസത്തിൽ സിദ്ധുവിനെ അറസ്റ്റ് ചെയ്തപ്പോൾ, പനേസർ അപ്പോഴേക്കും കാനഡ വിട്ടിരുന്നു. സിദ്ദുവും പനേസറും ഒരുമിച്ച് വെയര്‍ഹൗസില്‍ ജോലി ചെയ്തിരുന്നവര്‍ ആയതിനാല്‍ മോഷണം സുഗമമാക്കാന്‍ പനേസര്‍ സഹായിച്ചെന്ന് പിആര്‍പി ഉദ്യോഗസ്ഥര്‍ വിശ്വസിക്കുന്നു.
പനേസറിന് കാനഡയിലുടനീളം വാറണ്ടുകള്‍ പുറപ്പെടുവിച്ചിരുന്നു. പനേസര്‍ ജീവിച്ചിരിക്കുന്നതിനാല്‍, ‘പ്രോജക്റ്റ് 24 കാരറ്റ്’ എന്ന സ്വര്‍ണ്ണ കവര്‍ച്ചയെക്കുറിച്ച് പീല്‍ റീജിയണല്‍ പോലീസും അന്വേഷണം തുടരുകയാണ്.
