ചെന്നൈ: തമിഴ്നാട്ടില് മന്ത്രിയുടെ മുന്നില് നൃത്തം ചെയ്യുന്ന വനിതാ നര്ത്തകരുടെ വൈറല് വീഡിയോയില് പ്രതിരോധത്തിലായി ഡി.എം.കെ. ശിവഗംഗയില് ഉപമുഖ്യമന്ത്രി ഉദയനിധി സ്റ്റാലിന്റെ പിറന്നാള് ആഘോഷത്തോടനുബന്ധിച്ച് നടത്തിയ വിരുന്നില് സഹകരണ മന്ത്രി എസ്. പെരിയകറുപ്പന് യുവതികളുടെ നൃത്തം ആസ്വദിക്കുന്ന ദൃശ്യങ്ങളാണ് പുറത്തുവന്നത്. ഇതിനുപിന്നാലെ മന്ത്രിക്കെതിരേ കടുത്ത വിമര്ശനങ്ങള് ഉയര്ന്നത്.
തമിഴ് സംസ്കാരത്തിനും സ്ത്രീകളുടെ അന്തസിനും ഹാനികരമായ പ്രവൃത്തിയാണ് മന്ത്രിയുടെ ഭാഗത്തുനിന്നുണ്ടായതെന്ന് ബി.ജെ.പി. ആരോപിച്ചു. ‘പരിപാടിയെ അശ്ലീല കാഴ്ചയാക്കി മാറ്റുന്നവര്ക്ക് ആത്മാഭിമാനത്തെക്കുറിച്ചോ യുക്തിസഹമായ ചിന്തയെക്കുറിച്ചോ സംസാരിക്കാന് പോലും യോഗ്യതയില്ല. അര്ദ്ധനഗ്ന വസ്ത്രം ധരിച്ച സ്ത്രീകളെ വിളിച്ചുവരുത്തി നൃത്തംചെയ്യിക്കുകയും ആസ്വദിക്കുകയും ചെയ്യുന്ന ഡി.എം.കെ. നേതാക്കളെ ആശ്രയിക്കേണ്ടിവരുമ്പോള് തമിഴ്നാട്ടിലെ സ്ത്രീകള് എങ്ങനെ പരാതികള് ഉന്നയിക്കുമെന്നും’ എക്സില് പങ്കുവച്ച പോസ്റ്റില് ബി.ജെ.പി ചോദിച്ചു.
അതിനിടെ, മന്ത്രി സ്ത്രീകളോട് നൃത്തം ചെയ്യാന് ആവശ്യപ്പെട്ടു എന്ന ആരോപണം ഡി.എം.കെ വൃത്തങ്ങള് നിഷേധിച്ചു. സ്ത്രീകള് സ്വയം വേദിയില്നിന്ന് ഇറങ്ങി മന്ത്രിയുടെ മുന്നില് നൃത്തംചെയ്യുകയായിരുന്നെന്നാണ് ഇവരുടെ വാദം. അണ്ണാഡി.എം.കെയും വിരുന്നുകളില് നൃത്ത പ്രകടനങ്ങള് നടത്താറുണ്ടെന്ന് ഡി.എം.കെ നേതാക്കള് ചൂണ്ടിക്കാട്ടി.
