ലേഡി സൂപ്പര്‍സ്റ്റാര്‍ നയന്‍താരയുടെ ബോളിവുഡ് എന്‍ട്രിയുടെ തരംഗം ഇപ്പോഴും തുടരുകയാണ്. ഷാരൂഖ് ഖാനൊപ്പം അഭിനയിച്ച ‘ജവാന്‍’ വന്‍ ഹിറ്റായതോടെ നയന്‍സിന്റെ പ്രശസ്തി ബോളിവുഡില്‍ നിറയുകയാണ്. തമിഴില്‍ ജയം രവിയുടെ സൈക്കോ ത്രില്ലര്‍ ചിത്രമായ ‘ഇരൈവന്‍’ ആണ് നയന്‍സിന്റേതായി ഉടന്‍ വരാനിരിക്കുന്ന സിനിമ. സെപ്തംബര്‍ 28 ന് റിലീസ് ചെയ്യാനിരിക്കുന്ന സിനിമ ആകാംഷയാണ് ഉയര്‍ത്തുന്നത്.
ഇതിനിടയില്‍ വിനായക ചതുര്‍ത്ഥി സ്പെഷ്യലായി അവളുടെ പുതിയ ചിത്രത്തിന്റെ പേരും ഫസ്റ്റ് ലുക്കും അനാച്ഛാദനം ചെയ്തു. പ്രശസ്ത യൂട്യൂബര്‍ ഡ്യൂഡ് വിക്കിയ്ക്കൊപ്പമുള്ള സിനിമയാണ് ഇത്. പ്രിന്‍സ് പിക്ചേഴ്സ് നിര്‍മ്മിക്കുന്ന, ഏറെ പ്രതീക്ഷയോടെ കാത്തിരിക്കുന്ന ചിത്രത്തിന് ‘മണ്ണങ്ങാട്ടി സിന്‍സ് 1960’ എന്നാണ് പേരിട്ടിരിക്കുന്നത്. നീതിദേവതയുഴെട പ്രതിമ കേന്ദ്രീകരിച്ച് വനത്തിനുള്ളില്‍ സ്ഥാപിച്ചിരിക്കുന്ന ക്ഷേത്രം കാണിക്കുന്ന മോഷന്‍ പോസ്റ്ററാണ് നിര്‍മ്മാതാക്കള്‍ അവതരിപ്പിച്ചിരിക്കുന്നത്.
മിനിറ്റുകള്‍ ദൈര്‍ഘ്യമുള്ള വീഡിയോയില്‍ കറന്‍സി നോട്ടുകള്‍ കടലാസ് വിമാനങ്ങളായി പറക്കുന്നത് കാണാം. നയന്‍താര, യോഗി ബാബു, ദേവദര്‍ശിനി, ഗൗരി കിഷന്‍, നരേന്ദ്ര പ്രസാത് തുടങ്ങിയവരാണ് അഭിനയിക്കുന്നത്. ഷോണ്‍ റോള്‍ഡന്‍ സംഗീതവും, ഡി ഒ പി ആര്‍ ഡി രാജശേഖറും, എഡിറ്റിംഗ് ജി മദനും, കലാസംവിധാനം മിലനും നിര്‍വ്വഹിക്കുന്നു. ഈ ചിത്രത്തിന്റെ ഷൂട്ടിംഗ് ഉടന്‍ ആരംഭിക്കും.
